Fakaaliga 9 - Tokelauan New Testament

¹ Oi ili ai te pu a te agelu tona lima, ma na kō kitea atu ai he fetu kua pakū ifo ki lalo ki te lalolagi, ma kua fōki ki ei te kī ki te lua e hēai he gataga o tona loloto.

² Kua tatala e te fetu te faitotoka ki te lua e hēai he gataga o tona loloto, oi fanake ai ki luga te ahu e vē he ahu e hau mai he mea tafu afi lahi; ma ko te la vēnā ma te ea, kua pōulitia i te ahu mai te lua e hēai he gataga o tona loloto.

³ Na ōifo ki lalo nā hē akelihe mai te ahu ki luga o te lalolagi, ma na fōki ki ei te mālohiaga ke vē ko te akalava, ke takati ai ia tagata.

⁴ Na fakatonu ki lātou ke nahe ki lātou fakakinoa te mutia, pe ko nā lākau, pe ni iētahi tamā lākau; kae ke fakakino oioti nā tino e hē i o lātou muāulu te fakamaufakailoga a te Atua.

⁵ E hēki fakatagagia nā hē akelihe ke tāmate e ki lātou nā tino iēnei, kae nā ke fakatīgāina lahi lele oioti mo ni māhina e lima. Ko te tīgā e vē ko te tīgā e maua i te kati a te akalava.

⁶ I nā māhina iēnei e lima, ka hakili e tagata te oti kae ka hē maua e ki lātou; ka fofou ki lātou ko ki lātou ke feoti, kae ko te oti ka vili kehe mai te ki lātou.

⁷ Ko nā hē akelihe e vē ni holofanua kua hāuni mo he taua; i o lātou ulu e i ei ai nā mea e fōliga ni pale aulo, ma ko o lātou fōliga e vē ni fōliga tagata.

⁸ Ko o lātou lāulu e vē ni lāulu fafine, ma o lātou nifo e vē ni nifo leona.

⁹ Ko o lātou fatafata e pupuni i ni mea e vē ni talipupuni fatafata ukamea, ma ko te pākēkē o nā kapahau o ki lātou e vē ko te pākēkē o ni tāvale holofanua e lahi e tutuku ki he taua.

¹⁰ E i ei o lātou hikuhiku ma e kati e vē ko te kati a te akalava, ma ko o lātou hikuhiku te i ei te mālohiaga ke fakaogohia ai ia tagata mo he lima māhina.

¹¹ E i ei to lātou tupu e pule ki a te ki lātou, ko te agelu tēnā e pule i te lua e hēai he gataga o tona loloto. Ko tona igoa i te gagana Epelu ko Apatone; i te gagana Eleni ko te igoa tēnei ko Apolione (ko tona uiga “Te tino e Fakakinoagia”)

¹² Kua uma atu te mea fakamātakutaku muamua; e uma atu tēnei kae toe lua ia mea fakamātakutaku ko hēki pa mai.

¹³ Oi ili ai te pu a te agelu tona ono, ma na kō lagona he leo e hau mai he tulimanu o nā tulimanu e fa o te fata faitāulaga aulo e tū i mua o te Atua.

¹⁴ Kua lea vē mai te leo ki te agelu tona ono, “Tatala nā agelu e toka fa e noanoa i tafa o te vaitafe lahi ko Eufilate!”

¹⁵ Kua tatala nā agelu e toka fa, iē nae tāofiofi fakatalitali mo te itūlā tonu lava tēnei o te aho, te māhina ma te tauhaga, ke ki lātou tāmatea te tahi vaetolu o tagata uma o te lalolagi.

¹⁶ Na lagona atu e au ko te nūmela o nā fitafita e tiketike i nā holofanua, e toka lua helau miliona.

¹⁷ Ma e vēnei te mea na kō kitea ki nā holofanua i te fakaaliga: ko nā fitafita e tiketike i nā holofanua nae fai o lātou talipupuni fatafata kukula e vē he afi, e lanu moana e vē he hafilo, ma hehega e vē ko te teiō. Ko nā ulu o nā holofanua e vē ni ulu o ni leona, ma ko o lātou gutu e hau ai ki fafo te afi, te ahu ma te teiō.

¹⁸ Ko te tahi vaetolu o te tagata ola uma, na feoti i nā mala iēnā e tolu: ko te afi, ko te ahu ma te teiō e hau ki fafo mai nā gutu o nā holofanua.

¹⁹ Auā ko te mālohiaga o nā holofanua ei o lātou gutu vēnā ma o lātou hikuhiku. Ko o lātou hikuhiku e vē ni gata e fai o lātou ulu, ma e fakaaogā e ki lātou ke fakaogohia ai ia tagata.

²⁰ Ko nā tino na totoe, ki lātou e hēki feoti i nā mala, e hēki liliu kehe lele mai nā tupua na ki lātou gaohia. E hēki uma to lātou tāpuaki ki nā tēmoni, pe ko nā tupua e gaohia i te aulo, hiliva, apamemea, fatu ma nā lākau, nā mea e hē mafai ke kitea pe lagona he mea, pe mafai ke havavali.

²¹ E hēki mafai foki ki lātou ke halamō e tuha ai ma a lātou tāmate tino, a lātou mea fakataulaitu, te fai āmio mātagā, pe ko a lātou kaihohoa.