Fakaaliga 7 - Tokelauan New Testament

Ko te 144,000 o Tagata o te Atua

¹ Kua uma atu te mea tēnei, oi kō kitea atu ai nā agelu e toka fa e tutū i nā tulimanu e fa o te lalolagi, e tāofiofi nā matagi e fa kae ke nahe i ei he matagi e agi ki luga o te laukelekele, pe ki luga o te tai, pe ki ho he lākau.

² Ma na kō kitea atu hētahi agelu e fanake ki luga mai te ohoga o te la, ma te fakamaufakailoga a te Atua ola. Kua kalaga leo lahi ki nā agelu e toka fa na tuku ki ei te pule e te Atua ke fakakino ai te laukelekele ma te tai.

³ Kua lea vē atu ki ei, “Nahe fakakinoa e nā matagi te laukelekele, te tai, pe ko nā lākau, heiloga kua uma te fakailoga e ki mātou nā kaukauna a te Atua i he fakamaufakailoga, ki o lātou muāulu.”

⁴ Ma na lagona atu e au, ko te aofaki o nā tino kua fakailoga i te fakamaufakailoga a te Atua e 144,000. E ōmamai i nā puikāiga uma e hefululua o Ihalaelu:

^5-8 12,000 mai te puikāiga o Iuta, 12,000 mai te puikāiga o Leupena, 12,000 mai te puikāiga o Kutē, 12,000 mai te puikāiga o Ahela, 12,000 mai te puikāiga o Nafatali, 12,000 mai te puikāiga o Manahe, 12,000 mai te puikāiga o Himeona, 12,000 mai te puikāiga o Levi, 12,000 mai te puikāiga o Ihakala, 12,000 mai te puikāiga o Hepulona, 12,000 mai te puikāiga o Iohefa, 12,000 mai te puikāiga o Peniamina.

Ko te Kaifenua e Tokalahi i te Lagi

⁹ Kua uma atu te mea tēnei, oi kō kitea atu ai he kaifenua e tokalahi — e hē mafai ke faitau e he tino te tokalahi! Na ōmamai mai lanu uma, nuku uma, mālō uma ma gagana uma, ma e tutū i mua o te nofoāliki ma te Punuamāmoe. E kokofu papae ma tāofi nā laupama i o lātou lima.

¹⁰ Kua tau kālalaga leo lahi vē ki lātou, “Ko te fakaolataga e mai te Atua tē e nofo i te nofoāliki, ma te Punuamāmoe!”

¹¹ Ko te kau agelu uma, nā toeaina ma nā meaola e fa, kua tutū fakatāmilo i te nofoāliki. Oi fakapakukū fakapūlou ai ki lalo i mua o te nofoāliki ma ifo atu ki te Atua,

¹² ma lea vē, “Amene! Ke i to tātou Atua te vīkiga, te mamalu, te poto, te fakafetai, te fakaaloalo, te mālohi ma te mana ke pa lava ki te fakavavau, Amene!”

¹³ Kua fehili mai vē tētahi o toeaina ki a te au, “Ko ai nā tino iēnei e kokofu i nā kofu papae, ma ko fea te ōmamai ai?”

¹⁴ Kua lea vē atu au ki ei, “Te aliki, e hē kō iloa kae e kē iloa.” Oi lea mai ai ki a te au, “Ko nā tino iēnei kua hao mai i nā puapuagā e lahi. Kua uma te ufi e ki lātou o lātou kofu, ma fakapaepae i te toto o te Punuamāmoe.

¹⁵ Ko te mea ia e tutū ai ki lātou i mua o te nofoāliki o te Atua ma tautua ki a te ia i te ao ma te pō, i tona mālumalu. Ko tē e nofo i te nofoāliki, ka ia puipuia ki lātou i tona ei ma ki lātou.

¹⁶ Ka hē toe fia kakaia lele pe fia inua ki lātou; ka hē mu ki lātou i te mālohi o te vevela o te la pe ho hētahi itūkāigā vevela mālohi,

¹⁷ auā ko te Punuamāmoe, tē ei lototonu o te nofoāliki, ka fai ia ma o lātou leoleomāmoe, ma ka ia takitakia ki lātou ki nā vaipuna o te vai o te ola. Ma ka holoi kehe e te Atua nā loimata uma mai o lātou mata.”