Fakaaliga 5 - Tokelauan New Testament

Ko te Tuhitākai ma te Punuamāmoe

¹ Na kō kitea he tuhitākai e i te lima o te tino e nofo i luga o te nofoāliki; ko loto ma tua o te tuhitākai e tumu kātoa i nā tuhituhiga, ma e fakamau i ni fakamaufakailoga e fitu.

² Ma na kō kitea atu he agelu e maualuga tona tūlaga pule, e fehili leo lahi vē, “Ko ai te tino e ia te ia te pule ke kave kehe ai nā fakamaufakailoga e fitu ma tatala ai te tuhitākai?”

³ Kae e hēai he tino i te lagi, pe ko te lalolagi, pe ko te lalolagi i lalo i te takele o te kelekele, e ia mafaia oi tatala te tuhitākai pe kikila ki loto.

⁴ Na tagi lahi lele au ona e hēki maua he tino e ia te ia te pule ke tatala ai te tuhitākai, pe kikila ki loto.

⁵ Oi lea vē mai ai hētahi o nā toeaina ki a te au, “Koe nahe tagi. Kikila, ko te leona, tē e hau mai te puikāiga o Iuta, te lāpuna takutakua o Tavita, kua ia fakatōkilalogia nā fili o ia, kae ke tatala e ia nā fakamaufakailoga, ma tatala ai te tuhitākai.”

⁶ Oi kitea atu ai e au he Punuamāmoe e tū i te va o te nofoāliki ma nā meaola ma nā toeaina. Ko te Punuamāmoe e fōliga kua tāmate, ma e fitu ona nifohua i tona ulu ma fitu ona mata, ko nā agaga iēnā e fitu a te Atua kua uga atu ki te lalolagi kātoa.

⁷ Oi fano ai te Punuamāmoe oi kave kehe te tuhitākai mai te lima taumatau o te tino e nofo i te nofoāliki.

⁸ I te kave kehega e ia, oi fakapakukū ai ki lalo nā meaola e fa ma nā toeaina e lua hefulufa, ki mua o te Punuamāmoe. E tofu nā toeaina ma te kītala ma te ipuloloto aulo e tumu i nā meamanogi fakamū, ko nā mea iēnei ko nā tatalo iēnā a tagata o te Atua.

⁹ Na uhu te lātou pehe fou e vē: “E ia te koe te pule ke kave ai te tuhitākai ma ke tatala ona fakamaufakailoga. Auā ko koe na tāmate, ma ko tō toto na totogi ai nā tino ke haoloto ke kavea ki lātou mo te Atua, nā tino mai nuku uma, mai gagana uma, mai mālō uma, mai lanu uma.

¹⁰ Kua fakatū e koe ki lātou ma mālō o ohitāulaga, ke kaukauna ki to tātou Atua, ma ka pule ki lātou i te lalolagi.”

¹¹ Na toe kikila atu foki au, ma kō lagona nā agelu e faitau afe ma afe ma miliona ma miliona, e tutū hiko fakatāmilo i te nofoāliki, i tua mai o nā meaola ma nā toeaina,

¹² ma e pepehe leo lahi: “Ko te Punuamāmoe na tāmate kua ia te ia te pule ke tuku atu ki ei te mana, te tamaokāiga, te poto ma te mālohi te fakaaloalo, te vīkiga ma te fakafetai.”

¹³ Ma na kō lagona atu nā meaola uma lele i te lagi, i te lalolagi, i te lalolagi i lalo i te takele o te kelekele, ma i loto o te tai — ma meaola uma i loto o iēnei mea uma, e pepehe: “Ke i tē e nofo i luga o te nofoāliki vēnā ma te Punuamāmoe, te fakafetai ma te fakaaloalo, te vīkiga ma te mana, ke pa ki te fakavavau fakavavau lava!”

¹⁴ Na tali mai nā meaola e fa, “Amene!” Oi fakapakukū ai nā toeaina ki lalo ma ifo atu ki te Atua ma te Punuamāmoe.