Fakaaliga 4 - Tokelauan New Testament

Kua Kitea e Ioane te Atua i tona Nofoāliki i te Lagi

¹ I te taimi tēnā, oi kikila atu ai au ma kō kitea atu he faitotoka e matala i te lagi. Ma te leo e vē ko te tagi a he pu na lagona foki e au muamua e tautala mai, e lea vē mai, “Hau ki luga i kinei, oi fakaali atu ai e au ki a te koe nā mea e tatau ke tutupu kāfai e uma te mea tēnei.”

² Ko te taimi lava tēnā na ulufia ai au e te Agaga o te Atua, ma na kō kitea atu ai he nofoāliki ma he tino e nofo i luga.

³ Ko tona tino e huhulu pupula lanu hehega ma lanu meamata kukula, nā lanu o nā fatu mānanaia ma taugatā ko te iahepi ma te hationu, ma he nuanua e fakatāmilo i te nofoāliki kātoa, ko tona huhulu e lanu meamata e vē ko te lanu o te fatu manaia ma taugatā ko te himalato.

⁴ E hiko fakatāmilo te nofoāliki e iētahi nofoāliki e lua hefulufa, ma e nonofo i luga nā toeaina e toka lua hefulufa, e kokofu i nā kofu paepae ma fai o lātou pale aulo.

⁵ E kānapanapa nā uila mai te nofoāliki, ma gugulu ma gāpāpā nā tāgulu. I mua o te nofoāliki, e fitu ia lama e mumū ai, ko nā agaga iēnā e fitu a te Atua

⁶ I mua foki o te nofoāliki, e i ei ai he mea e fōliga ko he tai tioata, e mamā ma pāgilagila. E hiko fakatāmilo te nofoāliki i ona itū takitahi e ni meaola e fa e tumu o lātou tino i nā pukāmata, i mua ma tua.

⁷ Ko te meaola muamua e vē he leona; ko tona lua, e vē he povi poa; ko tona tolu, e vē ona fōliga ni fōliga e o he tino; ko tona fa, e vē ko he āeto e lele.

⁸ Ko nā meaola takitahi e taki ono o lātou kapahau, ma e tumu o lātou tino i nā pukāmata e fakatāmilo ke pa ki lalo o nā kapahau. I te pō ma te ao, e hē uma lele a lātou pēhega: “E paia, e paia, e paia, te Aliki te Atua Hilihilikehe te Mālohi, tē e ola nei, nae ola pea lava, ma ka haele mai.”

⁹ Ko nā meaola e uhu a lātou pepe e viviki ma kavatu ai te fakaaloalo ma te fakafetai ki te tino e nofo i te nofoāliki, tē e ola pea lava ke pa ki te fakavavau. Ko taimi uma lava e ki lātou faia ai te mea tēnei,

¹⁰ ko nā toeaina e toka luahefulufa e fakapakukū ki mua o tē e nofo i te nofoāliki, ma ifo atu ki tē e ola pea lava ke pa ki te fakavavau. E tuku o lātou pale ki lalo i mua o te nofoāliki ma lea vē,

¹¹ “To mātou Aliki ma to mātou Atua! E tatau ma onomea ke maua e koe nā vīkiga, te fakaaloalo ma te mana. Auā ko nā mea uma lele na fai e koe, ma ko koe lava na loto ke i ei ni mea vēnei, ma na kē gaohia ai loa.”