Fakaaliga 3 - Tokelauan New Testament

Ko te Fekau ki te Ekalehia i Hateihi

¹ “Tuhi vēnei ki te agelu o te Ekalehia i Hateihi: “Ko tēnei te fekau mai tē e pule i nā agaga e fitu o te Atua ma nā fetu e fitu. E iloa e au autou gāluega e fai; e iloa e au ko koutou e lauiloa i te mālohi o te koutou fakatuatua, kae ko te meamoni ko koutou e vē ni tino kua feoti i te fakateagaga.

² Āla la ki luga ma gālulue ke fakamautū nā mea koi ia te koutou ka ko hēki mou kehe uma atu. Auā kua kō kitea ko nā mea a koutou kua uma te fai, ko hēki kātoatoa te lelei i te kikila a toku Atua.

³ Ke manatua la nā mea na akoako atu ai koutou, ma nā mea na fakalogo koutou ki ei; uhitaki ki ei ma liliu kehe mai autou agahala. Kāfai koutou ka hē āla ki luga, ko au ka fanatu ki a te koutou e vē he tino kaihohoa, ma ka hē koutou iloa te taimi e fanatu ai au.

⁴ Kae e i ei nā tino o koutou i kinā i Hateihi, e hēki fakakelekelea lele o lātou kofu Ka havavali fakatahi ki lātou ma au, e kokofu i nā kofu paepae, auā kua tatau ma onomea tēnei mo ki lātou.

⁵ Ko nā tino kua ki lātou mauagia te manumālō, ka kokofu vēnei i nā kofu paepae, ma ka hē kave keheagia e au o lātou igoa mai te tuhi o te ola. I mua o toku Tamana ma ana agelu, ka fakailoa atu e au ko ki lātou e āku.

⁶ “Kāfai e i ei ni outou taliga, fakalogo la ki te mea e lea atu ai te Agaga ki nā Ekalehia!

Ko te Fekau ki te Ekalehia i Filatelefeia

⁷ “Tuhi vēnei ki te agelu o te Ekalehia i Filatelefeia: “Ko tēnei te fekau mai tē e paia, ma e fakamāoni. E ia te ia te kī a Tavita, ma kāfai e tatala e ia he faitotoka e hēai he tino e ia mafaia oi toe tapuni, ma kāfai e tapuni e ia, e hēai tino e ia mafaia oi toe tatala.

⁸ E iloa e au autou gāluega e fai. Kikila, kua kō tatalagia he faitotoka mo koutou, ma e hēai he tino e ia mafaia oi tapunia. E iloa e au ko koutou ko he Ekalehia e hē tokalahi, kae ko koutou e mulimuli pea lava ki taku kupu ma e hēki teteke lele koutou ki toku igoa.

⁹ Kikila, ko nā tino o Hātani, nā tino talapepelo e lea ko ki lātou ni Iutaia kae e hē ni Iutaia; ka kō kaumaia ki lātou ke tōtutuli pūnonou ki mua o outou vae. Ka iloa uma e ki lātou ko au e alofa atu ki a te koutou.

¹⁰ Ona ko koe kua mulimuli ki taku fakatonuga ke onohai, ka kō puipuia ai foki la koe ke haogalēmū kāfai e pa ki te taimi e maua ai te lalolagi i nā puapuagā, ke tofotofo ai ia tagata uma i te lalolagi.

¹¹ Kua pili mai te taimi e fanatu ai au. Tāofi mau ki nā mea kua ia te koe, kae ke nahe kaihohoagia e he tino te fakailoga o tō manumālō.

¹² Ko ai lava e manumālō, ka kō kavea ki lātou ke fai ma poutū o te mālumalu o toku Atua, ma ka hē toe olo kehe lele mai ai ki lātou. Ka kō tuhiagia ki o lātou luga te igoa o toku Atua ma te igoa o te kakai o toku Atua, te Ieluhalema fou, tēia ka fanaifo ki lalo mai te lagi mai toku Atua. Ka kō tuhiagia foki ki o lātou luga toku igoa fou.

¹³ “Kāfai e i ei ni outou taliga, fakalogo la ki te mea e lea atu ai te Agaga ki nā Ekalehia!

Ko te Fekau ki te Ekalehia i Laotikeia

¹⁴ “Tuhi vēnei ki te agelu o te Ekalehia i Laotikeia: “Ko te fekau tēnei mai tē e igoa ko te Amene, te molimau e fakamāoni ma e moni, ko ia ko te kāmataga o nā mea uma na gaohia e te Atua.

¹⁵ E iloa e au nā mea a koutou kua fai. I te ōlaga o koutou, ko koutou e hē tutū mālohi i te koutou fakatuatua pe loto fiafia mai foki ki a te au. Kai au te fofou ko te tūlaga e i ei koutou e i he mea o nā mea iēnei e lua!

¹⁶ Kae ona ko koutou e fakalotolotolua i te koutou fakatuatua, ka kō puakia ai koutou ki fafo mai toku gutu.

¹⁷ E lea koutou, ‘Ko au e maukoloa ma tūtūlelei; kua hē toe i ei he mea e fofou au ki ei.’ Kae e hē koutou iloa te kino lele ma te fakaalofa o koutou! Ko koutou e mātitiva, e hē lavalavā ma e tāuaho.

¹⁸ Ko te mea ia e fautua atu ai au ki a te koutou, ke fakatau ni autou aulo mai ia te au, nā aulo kua uma te fakamamā i te afi, kae ke maukoloa ai koutou. Fakatau foki ni kie papae ke kokofu ai koutou ma ke pupuni ai te mātagā o koutou. Fakatau foki ma ni vai mata mo outou mata, kae ke kitea lelei e outou mata.

¹⁹ Ko nā tino e alofa au ki ei, e akoaki ma fakahala e au; koutou la ke mataala ma liliu kehe mai autou agahala.

²⁰ Kikila, ko au e tū i te faitotoka ma tukituki atu; kāfai he tino e ia lagona toku leo ma tatala mai e ia te faitotoka, ka fanatu au ki loto o tona fale ma kakai fakatahi ki māua.

²¹ Ki nā tino e maua e ki lātou te manumālō, ka fōki e au ki ei te avanoa ke nonofo ai i oku tafa i luga o toku nofoāliki, e vē foki lava ko au na manumālō, ma kua nofo ai nei au i tafa o toku Tamana i luga o tona nofoāliki.

²² “Kāfai e i ei ni o koutou taliga, fakalogo la ki te mea e lea ai te Agaga ki nā Ekalehia!”