Fakaaliga 21 - Tokelauan New Testament

Ko te Lagi Fou ma te Lalolagi Fou

¹ Oi kō kitea atu ai he lagi fou ma he lalolagi fou. Ko te lagi muamua ma te lalolagi muamua kua mou kehe atu, ma kua hē toe i ei he tai.

² Ma na kō kitea atu te Kakai Paia, te Ieluhalema fou, kua fanaifo ki lalo mai te lagi mai te Atua, kua uma te tāpena ma hāuni, e vē ko he teine fakaipoipo kua teu mo tana tāne.

³ Na lagona atu e au he leo e tautala leo lahi mai te nofoāliki e lea vē: “Kikila, ko te fale o te Atua kua i te mea e i ei ona tagata! Ka nofo fakatahi ia ma ki lātou, ma ka kavea ki lātou ma ona tagata. Ko te Atua ka i ei ma ki lātou, ma ka fai ia ma Atua o ki lātou.

⁴ Ka holoi kehe e ia nā loimata uma mai o lātou mata. Ka hē toe i ei he oti, ka hē toe i ei he fakanoanoa pe he tagi pe he tīgā. Ko nā mea tuai kua mou kehe atu.”

⁵ Ma na lea vē ai te tino e tiketike i te nofoāliki, “Kikila, kua toe fakafou e au ia mea uma!” Ma na leamai foki ki a te au, “Tuhi te mea tēnei ki lalo, auā ko nā kupu iēnei e moni ma e fakamāoni.”

⁶ Ma na lea vē, “Kua taunuku nā mea uma iēnei! Ko au ko te Alefa ma te Ōmeka, te kāmataga ma te fakaikuga. Ko ai lava e fia inu, ka fōki e au ki ei e aunoa ma he totogi, te vai mai te vaipuna e maua ai te vai o te ola.

⁷ Ko nā tino e maua e ki lātou te manumālō, ka maua e ki lātou te mea tēnei mai ia te au, ma ka fai au ma o lātou Atua, ma fai ki lātou ma aku fānau.

⁸ Kae ko nā tino palakakai, vēnā ma nā tino kua toe liliu kehe mai te Atua, nā tino āmio kino, nā tino tāmate tino, nā tino e tuinanau ki te tino, nā taulāitu, nā tino e ifo ki tupua ma nā tino talapepelo uma lele — ko te nofoaga mo ki lātou ko te vaitūloto e mumū i te afi ma te teiō, ko te oti tēnā tona lua.”

Ko te Ieluhalema Fou

⁹ Ko tētahi o nā agelu e toka fitu nae ia te ki lātou nā tanoa e fitu e tūtumu i nā mala mulimuli e fitu, kua hau ki a te au ma lea vē mai, “Hau, ka fakahino atu e au ki a te koe te teine fakaipoipo, ka kavea ma āvaga a te Punuamāmoe.”

¹⁰ Oi ulufia ai au e te Agaga o te Atua, ma kua kave au e te agelu ki te tumutumu o he mauga maualuga. Kua fakaali mai e ia ki a te au ia Ieluhalema, te Kakai Paia, e fanaifo i te lagi mai te Atua

¹¹ ma e huhulu e vē ko te pupula o te mamalu o te Atua. Ko te kakai e huhulu lanu hehega ma lanu meamata kukula, te lanu o te fatu manaia ma taugatā ko te iahepi, ma mamā pāgilagila vē he tioata.

¹² E i ei tona pa maualuga, ma e hefululua ona faitotoka, ma e toka hefululua ia agelu e pule i nā faitotoka. E tūhia i nā faitotoka nā igoa o nā puikāiga e hefululua o tagata o Ihalaelu.

¹³ E taki tolu ia faitotoka i nā itū takitahi; e tolu i te itū ki hahae, tolu ki te itū ki mātū, tolu ki te itū ki haute, ma tolu ki te itū ki hihifo.

¹⁴ Ko nā puipui o te kakai na fau ki luga o ni fakavae e hefulu lua, ma e tūhia i luga nā igoa o nā apohitolo e toka hefululua a te Punuamāmoe.

¹⁵ Ko te agelu na tautala mai ki a te au, nae ia te ia he fua e gaohia i te aulo, ke fua ai te kakai, ona faitotoka ma ona puipui.

¹⁶ Ko te kakai e fakatāfafā lelei lava, e tutuha te loa ma te lauefa. Kua fua e te agelu te kakai i tana fua: e hefululua afe hitatiō te loa, ma e tutuha lava te lauefa, te maualuga, ma te loa.

¹⁷ Na fua foki e te agelu nā puipui, ma e helau fahefulufa kupita te māfiafia, e tuha ai ma te fua māhani o nā mea nae ia fakaaogāgia.

¹⁸ Ko te puipui e fau i te iahepi, ma ko nā mea uma i te kakai na fau i te aulo mamā, ma ko te mamā o te aulo kua pāgilagila ai e vē he tioata i te kikila ki ei.

¹⁹ Ko nā fatu fakavae o nā puipui o te kakai nae teuteu i nā itūkāigā fatu mānanaia kehekehe ma te taugatā. Ko te fatu fakavae muamua ko te iahepi, ko tona lua ko te hafilo, ko tona tolu ko te aketoni, ko tona fa ko te himalato,

²⁰ ko tona lima ko te hatonike, ko tona ono ko te hationu, ko tona fitu ko te luholito, ko tona valu ko te pelulo, ko tona iva ko te topahi, ko tona hefulu ko te kuhopaho, ko tona hefulutahi ko te huakito, ma ko tona hefululua ko te ametuto.

²¹ Ko nā faitotoka e hefululua ni pēnina e hefululua; ko nā faitotoka takitahi e fai i he pēnina e fokotahi. Ko te auala o te kakai e fola i te aulo mamā ma e pāgilagila e vē he tioata.

²² E hēki kitea e au he mālumalu i te kakai, auā ko tona mālumalu ko te Aliki te Atua Hilihilikehe te Mālohi, ma te Punuamāmoe.

²³ Kua hē toe manakomia e te kakai te la ma te māhina, auā ko te pupula o te mamalu o te Atua e huhulu ki ei, ma ko te Punuamāmoe ko tona mōlī ia.

²⁴ Ko tagata o te lalolagi ka havavali i te mālamalama o te mōlī e hau mai te kakai, ma ka kaumai e nā tupu o te lalolagi a lātou koloa tāua ki loto o te kakai.

²⁵ Ko nā faitotoka o te kakai ka tatala i te aho kātoa; ka hē toe tapunia lele — auā ka hē toe i ei he pō i kinā.

²⁶ Ka kaumai e ki lātou nā koloa ma te tamaokāiga o tagata o te lalolagi ki loto o te kakai.

²⁷ Kae ka hēai lele he mea e hē mamā e fakaulu ki loto o te kakai, pe he tino e fai āmio mātagā pe talapepelo. Nā ko nā tino lava e tūhia o lātou igoa i te tuhi o te ola a te Punuamāmoe, te ka mafai oi ulufale ki loto o te kakai.