Fakaaliga 2 - Tokelauan New Testament

Ko te Fekau mo nā Kelihiano i Efeho

¹ “Tuhi vēnei ki te agelu o te Ekalehia i Efeho: “Ko tēnei te fekau mai tē e ia tāofia nā fetu e fitu i tona lima taumatau, ma e havali i te mea e i ei ai nā tugāmōlī aulo e fitu.

² E iloa e au nā mea a koutou kua fai; e iloa e au ko koutou e gālulue mālohi ma te onohai. E iloa e au e hē koutou talia lele nā tino kino, ma e hukehuke e koutou nā tino e lea ko ki lātou ni apohitolo kae e hē ni apohitolo, ma kua maua e koutou o lātou talapepelo.

³ E iloa e au ko koutou e onohai ma kua maua i nā puapuagā ona ko au, ma e hē fakavāivai lele ai koutou.

⁴ Kae ko tēnei te mea e hē fiafia ai au ki a te koutou: ko koutou e hē alolofa mai ki a te au i te taimi nei, e vē ko te taimi muamua.

⁵ Māfaufau ki te lahi o te agahala kua pakukū koutou ki ei. Liliu kehe loa lava mai autou agahala, ma fai nā mea nae koutou faia muamua. Kāfai koutou e hē liliu kehe mai autou agahala, ko au ka fanatu oi kave kehe te tugāmōlī a koutou mai te mea e tū ai.

⁶ Kae ko tēnei te mea e fiafia ai au ki a te koutou: ko koutou e inoino e vē ko au, ki nā mea e fai e nā tino e mulimuli ki a Nikolaito.

⁷ “Kāfai e i ei ni outou taliga, fakalogo la ki te mea e lea ai te Agaga ki nā Ekalehia! “Ki nā tino e ki lātou mauagia te manumālō, ka kō tukua ki ei te avanoa ke kakai ai ki nā fua o te lākau o te ola, e ola i te Fatoaga o te Atua.

Ko te Fekau mo nā Kelihiano i Himuna

⁸ “Tuhi vēnei ki te agelu o te Ekalehia i Himuna: “Ko te fekau tēnei mai tē e takua ko te muamua ma te mulimuli, na mate kae na toe ola mai.

⁹ E iloa e au nā fakafītāuli o koutou; e iloa e au ko koutou e mātitiva — kae ko te meamoni lava, ko koutou e maukoloa! E iloa e au nā kupu kino nae fai ki a te koutou e nā tino e lea ko ki lātou ni Iutaia, kae e hē ni Iutaia; ni tino e o Hātani!

¹⁰ Koutou nahe mātataku i nā mea ka puapuagātia ai koutou. Kikila, e i ei nā tino o koutou ka togi e te Tiāpolo ki te falepuipui ke tofotofo ai koutou, ma e hefulu ia aho ka maua ai koutou i nā fakafītāuli. Koutou ke fakamāoni pea lava e tuha lava pe oti ai koutou, oi fōki atu ai e au ki a te koutou te ola, ke fai ma pale e fakailoa ai te koutou manumālō.

¹¹ “Kāfai e i ei ni outou taliga, fakalogo la ki te mea e lea ai te Agaga ki nā Ekalehia! “Ko nā tino e ki lātou mauagia te manumālō, ka hē āfāina ki lātou i te oti tona lua.

Ko te Fekau ki nā Kelihiano i Pekamoni

¹² “Tuhi vēnei ki te agelu o te Ekalehia i Pekamoni: “Ko te fekau tēnei mai tē e ia te ia te pelu e taufai kaha uma nā itū.

¹³ E iloa e au te mea e nonofo ai koutou i kinā i te mea e i ei ai te nofoāliki o Hātani. E tūmau pea lava te koutou fakamāoni ki a te au, ma e hēki uma te koutou fakatuatua mai ki a te au, ke pa lava ki te taimi na tāmate ai ia Anitipaha, tē nae molimau fakamāoni e uiga ki a te au, i kinā te mea e nofo ai ia Hātani.

¹⁴ Kae e i ei ni nai mea e hē fiafia ai au ki a te koutou: E i ei nā tino o koutou e mulimuli ki nā akoakoga a Palaama, tēia na ia akoakoa ia Palaka i nā faiga ke takitaki ai ia tagata o Ihalaelu ki te agahala. Na fakaako e ia nā tino ke kakai ki nā meakai kua uma te fakatō mo nā tupua ta, ma fakamālohi te faiga o nā tuinanauga mātagā ki te tino.

¹⁵ Ma e i ei foki la nā tino o koutou kua talitonu ki nā akoakoga a nā tino e mulimuli ki a Nikolaito.

¹⁶ Liliu kehe loa mai autou agahala i te taimi nei! Kāfai koutou e hē liliu kehe, ko au ka fanatu i he taimi lata mai oi tau ma nā tino iēnā, i te pelu e hau ki fafo mai toku gutu.

¹⁷ “Kāfai e i ei ni outou taliga, fakalogo la ki te mea e lea ai te Agaga ki nā Ekalehia! “Ki nā tino e ki lātou mauagia te manumālō, ka kō fōkia ki ei he vāega o nā mānai nae mumuni. Ka kō fōkia foki ki a te ki lātou tau tokatahi, he fatu paepae e tūhia i luga he igoa fou e hē iloa e he tino, vaganā ai te tino e fōki e au ki ei.

Ko te Fekau ki nā Kelihiano i Tuateilo

¹⁸ “Tuhi vēnei ki te agelu o te Ekalehia i Tuateilo: “Ko te fekau tēnei mai te Ataliki o te Atua, ko ona mata e mumū e vē he afi, ko ona vae e gigila e vē he apamemea kua uma te pōlehi.

¹⁹ E iloa e au nā mea a koutou e fai. E iloa e au te koutou alolofa, te koutou fakamāoni, te koutou tautua, ma te koutou onohai. E iloa e au e lahi atu nā gāluega a koutou e fai i te taimi nei, i lo muamua.

²⁰ Kae ko tēnei te mea e hē fiafia ai au ki a te koutou: e hēai lele houtou teteke ki te fafine ko Iehapela, tēia e lea ko ia ko he pelofeta e a te Atua. E fakahehē e ia aku kaukauna e ala i ana akoakoga, ke ki lātou faia nā tuinanauga mātagā ki te tino, ma ke kakai ki nā meakai kua uma te fakatō mo nā tupua ta.

²¹ Kua kō tukua ki ei he taimi ke halamō ai i ana agahala, kae e hē fofou ke liliu kehe mai nā tuinanauga mātagā o te tino.

²² Kikila, ka fakahala e au te fafine i he tauale, ma fakahala fakatahi ai ma ki lātou na faia te mulilua fakatahi ma ia, ma ka matuā pagātia lava ki lātou uma i nā tauale. Ka kō faia te mea tēnei i te taimi nei, pe kāfai e hē halamō ki lātou i nā mea mātagā nae fai e ki lātou ma te fafine.

²³ Ka kō tāmatea foki nā tino e mulimuli ki te fafine, ma ka iloa ai e nā Ekalehia uma, ko au te tino e ia iloa ia manatu ma manakoga o tagata uma lele. Ka kō tauia koutou tau tokatahi uma, e tuha ai ma autou mea nae fai.

²⁴ “Kae ko te tokalahi o koutou i Tuateilo, e hēki mulimuli ki te akoakoga kino tēnei; ko hēki koutou iloa te mea e takua e iētahi tino ‘ko nā mea loloto hē mailoa a Hātani.’ E lea atu au ki a te koutou, ka hē kō fakauta atua hētahi kavega ki outou luga,

²⁵ kae tāofi mau ki nā mea kua ia te koutou, ke toe foki mai au.

^26-28 Ki nā tino e ki lātou maua te manumālō ma tūmau ma te fakamāoni i taku gāluega ke pa ki te ikuga, ka fōki e au ki ei te pule na tuku mai ki a te au e toku Tamana: ka ia te ki lātou te pule e pūlea ai iētahi mālō; ka ki lātou pūlea i te pule fakahāuā ma tamoi likiliki nā tino e vē ni ulo ōmea. Ka kō fōkiatua foki ki a te ki lātou te fetu o te taeao, ke fakailoa ai to lātou manumālō.

²⁹ “Kāfai e i ei ni outou taliga, fakalogo la ki te mea kua lea ai te Agaga ki nā Ekalehia!