Fakaaliga 16 - Tokelauan New Testament

Ko nā Tānoa o te Tōkahā o te Atua

¹ Oi lagona ai e au he leo lahi e tautala mai i te mālumalu o te Atua, ki nā agelu e fitu e lea vē mai, “Olo oi liligi nā tānoa e fitu o te tōkahā o te Atua ki luga o te lalolagi!”

² Oi fano ai te agelu muamua oi liligi tana tānoa ki luga o te lalolagi. I te taimi lava tēnā, na hahao ai nā fakafoa papala ma te tīgā i nā tino o ki lātou na tuku ki ei te fakailoga a te manu fekai, vēnā ma ki lātou nae ifo ki tona fakatuha.

³ Oi liligi ai te tānoa a te agelu tona lua ki luga o te tai. I te taimi lava tēnā, na liu toto ai te tai e vē he toto o he tino na tāmate, ma na mamate ai ia meaola uma i te tai.

⁴ Kua liligi te tānoa a te agelu tona tolu ki luga o nā vaitafe ma nā vaipuna, ma i te taimi lava tēnā na liu toto uma ai nā vai.

⁵ Oi kō lagona atu ai te agelu e pule i nā vai e lea vē, “Te Aliki e Paia, tē e ola nei ma nae ola pea lava, kai te tonu o tau fakamahinoga.

⁶ Na fakamaligi e ki lātou te toto o tagata o te Atua ma te kau pelofeta, ma kua fōki e koe nā toto ki a te ki lātou ke inu. Ko tēnā lava te mea e tatau mo ki lātou.”

⁷ Oi lagona ai e au he leo mai te fata faitāulaga e lea vē, “Io, te Aliki te Atua Hilihilikehe te Mālohi, te moni ma te tonu ko o au fakamahinoga!”

⁸ Oi liligi ai e te agelu tona fa tana tānoa ki luga o te la, ma na fakataga ai te la ke ia huhunua ia tagata i te kakaha o tona vevela;

⁹ kua mu ia tagata i te kakaha o te vevela, ma fai ai e ki lātou uma nā kupu kino ki te Atua, tē e ia te ia te pule ki nā mala uma iēnei. Kae e hēki liliu kehe ki lātou mai a lātou agahala ma viviki atu ki tona hilihilikehe.

¹⁰ Oi liligi ai e te agelu tona lima tana tānoa ki luga o te nofoāliki o te manu fekai. Na pōulitia haukatoa ai te mālō o te manu fekai, ma kāmata ai kua takati e tagata o lātou alelo ona ko te tīgāina kua pa ki lātou ki ei,

¹¹ ma fai a lātou kupu kino ki te Atua tē e pule i te lagi, ona ko te tīgā o nā fakafoa o ki lātou. Kae e hēki liliu kehe ki lātou mai o lātou uiga kino.

¹² Oi liligi ai e te agelu tona ono tana tānoa ki luga o te vaitafe lahi ko te Eufilate, ma na maha ai loa te vaitafe ke vē he auala ke hui ai nā tupu e ōmamai mai hahae.

¹³ Oi kō kitea atu ai ni agaga kino e tolu e vē ni lane o lātou fōliga, e ōmamai mai loto o te gutu o te tālako, te gutu o te manu fekai ma te gutu o te pelofeta pepelo.

¹⁴ Ko nā agaga iēnei o nā tēmoni e ki lātou faia nā vāvega. E olo ki tupu o mālō uma o te lalolagi, ke fakamāopoopo mai mo te taua i te Aho tāua lahi o te Atua Hilihilikehe te Mālohi.

¹⁵ Kua vāgana te Aliki, “Kikila, ko au e hau e vē he tino kaihohoa! Amutia te tino e hē moe lele kae kikila lelei ona lavalava kae ke nahe havali telefua lele ma māhiahi ai i mua o tagata!”

¹⁶ Oi fakapotopoto fakatahi ai nā tupu e nā agaga i te mea e takua i te gagana Epelu ko Amaketo.

¹⁷ Oi liligi ai e te agelu tona fitu tana tānoa ki loto o te ea, ma na fanaifo ai he leo lahi mai te nofoāliki i loto o te mālumalu e lea vē, “Kua taunuku!”

¹⁸ Kua kānapanapa nā uila, gugulu ma gāpāpā nā tāgulu, ma lūlū he mafuie fakamātakutaku. E hēki i ei lele he mafuie vēnei na kua tupu talu te gaohiga o tagata ola; ko te mafuie tēnei kua pito hili lele atu te kino.

¹⁹ Kua vae tolu te kakai i te mafuie, ma kua fakakino ia kakai o mālō uma. E hēki puli ia Papelona i te Atua, ma na ia fakainua i te uaina mai tana ipu — te uaina o tona tōkahā.

²⁰ Ma na mou kehe atu ai nā motu uma ma mauga uma.

²¹ Na to nā ua aiha matamatalalahi, ko te mamafa o te matāua aiha e fokotahi e maua te helau pauna. Kua malili ifo mai te lagi ki luga o tagata, ma na fai kupu kino ai ki lātou ki te Atua ona ko te mala o te ua aiha, he mala e aloā e matakutia.