Fakaaliga 15 - Tokelauan New Testament

Ko nā Agelu ma nā Toe Mala

¹ Oi kō kitea atu ai ki te lagi hētahi fakaaliga uiga kehe ma te ofoofogia. Ni agelu e fitu e ia te ki lātou nā mala e fitu, ko nā toe mala iēnei, ma kāfai e uma nā mala iēnei oi kua uma ai foki ma te tōkahā o te Atua.

² Oi kō kitea atu ai he mea e vē he tai tioata e i loto ai ma he afi. Na kō kitea atu foki nā tino na ki lātou fakatōkilalogia te manu fekai ma tona fakatuha, tē e hui tona igoa i he nūmela. E tutū i tafa o te tai tioata ma tāofi a lātou kītala na fōki ki ei e te Atua,

³ ma pepehe i te pehe a Mohe, te kaukauna a te Atua, ma te pehe a te Punuamāmoe: “Te Aliki te Atua Hilihilikehe te Mālohi, kai te uiga kehe ma te gali o au gāluega! Te Tupu o mālō, kai te hako ma te tonu o nā mea e kē faia!

⁴ Te Aliki, ko ai nei te ka hē mataku ia te koe? Ko ai nei te ka hē vīkia e ia tō igoa? Ko koe lava oioti te paia. Ko mālō uma ka ōmamai ma ifo atu ki a te koe, auā kua kitea e tagata uma te tonu o tau fakamahinoga.”

⁵ Kua uma atu te mea tēnei, oi kō kitea atu ai te mālumalu o te Atua e i loto ai te Falekie Paia i te lagi, e matala.

⁶ Ma kua ōmamai ki fafo o te mālumalu nā agelu e toka fitu e ia te ki lātou nā mala e fitu, e kokofu i ni kofu paepae mamā gigila ma ni fuhi aulo e nonoa i o lātou fatafata.

⁷ Oi fōki ai e hētahi o nā meaola e fa ki nā agelu e fitu, ni tānoa aulo e fitu e tumu i te tōkahā o te Atua, tē e ola pea lava ke pa ki te fakavavau.

⁸ Kua tumu te mālumalu o te Atua i te ahu mai te pupula ma te mana o te Atua. E hēai he tino e mafai ke fano ki loto o te mālumalu o te Atua, vaganā kua uma nā mala e fitu na kaumai e nā agelu e toka fitu.