Fakaaliga 14 - Tokelauan New Testament

Ko te Punuamāmoe ma Ona Tagata

¹ Oi kikila atu ai au, ma kō kitea atu te Punuamāmoe e tū i luga o te Mauga o Hiona; e i ei fakatahi ma ia nā tino e 144,000 kua tūhia i o lātou muāulu tona igoa ma te igoa o tona Tamana.

² Ma na lagona e au he leo mai te lagi e vē ko te gugulu o he tai galu lahi, e vē ko te gāpāpā o he tāgulu. Ko te leo na lagona e au e vē ko nā muhika e ta i nā kītala.

³ Ko nā tino e toka 144,000 e tutū i mua o te nofoāliki ma nā meaola e fa ma nā toeaina, ma pepehe i he pehe fou e nā ko ki lātou lava oioti te iloa. Mai tagata uma o te lalolagi kātoa, nā ko ki lātou lava oioti nā tino na fakahao e te Atua.

⁴ Ko nā tino iēnei e hēki ki lātou faia lele ni mea ke hē mamā ai ki lātou, e vē ko te momoe ma ni fafine; ni taupou uma ki lātou. Nae mulimuli ki lātou ki te Punuamāmoe i ho he mea e fano ki ei. Kua fakahao ki lātou kae ke ofo atu o lātou tagata mo te Atua ma te Punuamāmoe, e vē ko te vāega muamua o te helehelega e ofo atu mo te Atua.

⁵ E hēki tala pepelo lele ki lātou, ma e hēai lele ni o lātou uiga hehē.

Ko nā Agelu e Toka Tolu

⁶ Oi kō kitea atu ai hētahi agelu e lele maualuga ake i te vānimonimo ma he fekau e uiga ki he Tala Lelei e tūmau pea ke pa ki te fakavavau, ke folafola ki tagata uma o te lalolagi, ki lanu uma, ki nuku uma, ki gagana uma ma mālō uma.

⁷ Kua lea vē atu i he leo lahi, “Koutou ke mātataku i te Atua ma viviki atu ki a te ia, auā kua pa ki te taimi e fakamahino ai e ia ia tagata uma. Ifo atu ki tē na faia te lagi, te lalolagi, te tai, ma nā vaipuna.”

⁸ Oi hau ai hētahi agelu e mulimuli mai i tua o te agelu muamua, ma kalaga vē, “Ko te kakai takutakua ko Papelona kua fakahēaogāgia! Na ia fakainua ia tagata uma i tana uaina — te uaina mālohi o nā tuinanauga ki te tino.”

⁹ Kua hau hētahi agelu ko tona tolu ia, e mulimuli mai i tua o nā agelu muamua e lua, ma taukalaga vē, “Ko nā tino e ifo ki te manu fekai ma te fakatuha o ia, ma maua e ki lātou te fakailoga i o lātou muāulu pe i o lātou lima

¹⁰ ka feinu lava ki te uaina a te Atua, te uaina o tona tōkahā e liligi vē e hē talāgia ki loto o te ipu o tona ita. Ko ki lātou uma e faia te mea tēnei, ka fakatīgāina i te afi ma te teiō, i mua o nā agelu paia ma te Punuamāmoe.

¹¹ Ko te ahu o te afi e fakatīgāina ai ki lātou, e mumū pea lava ke pa ki te fakavavau. E hē maua he mapu i te ao ma te pō, e ki lātou e ifo ki te manu fekai ma te fakatuha o ia, ma kua ia te ki lātou te fakailoga o tona igoa.”

¹² Ona ko te mea tēnei, e tatau ai ia tagata o te Atua ke tūmau i te onohai ma te fakatuatua, nā tino e uhitaki ki nā fakatonuga a te Atua ma e talitonu ki a Iehu.

¹³ Oi kō lagona atu ai he leo mai te lagi e lea vē, “Tuhi te mea tēnei ki lalo: Amutia nā tino e oti i luga o te gāluega a te Aliki, kāmata atu nei!” “Io,” kua vāgana te Agaga, “Ka fakamapu ki lātou mai a lātou gāluega, auā e mulimuli lava ki a te ki lātou te ikuga o a lātou gāluega.”

Ko te Helehelega i te Lalolagi

¹⁴ Oi kikila atu ai au ma kō kitea atu he ao paepae, ma e nofo i luga o te ao paepae he tino ola e i ei he pale aliki aulo i tona ulu, ma he naifi helehele kakaha i tona lima.

¹⁵ Oi hau ai ki fafo o te mālumalu hētahi agelu, ma taukalaga leo lahi ki te tino e nofo i luga o te ao, kua lea vē atu ki ei, “Fakaaogā tau naifi helehele oi helehele ai te fuata, auā kua pa ki te taimi o te helehelega; ko te lalolagi kua pula ke helehele.”

¹⁶ Oi hahau ai te naifi helehele a te tino e nofo i luga o te ao ki luga o te lalolagi, ma na helehele ai loa.

¹⁷ Oi hau ai ki fafo o te mālumalu i te lagi hētahi agelu, ma na ia te ia foki he naifi helehele kakaha.

¹⁸ Oi hau ai hētahi agelu mai te fata faitāulaga, ko ia tēnei e pule i te afi. Kua kalaga leo lahi atu ki te agelu e ia te ia te naifi helehele kakaha, kua lea vē atu, “Fakaaogā tau naifi helehele, ma tipi kehe nā fuāvine mai te tōvine o te lalolagi, auā ko nā fuāvine kua pula.”

¹⁹ Oi hahau ai te naifi helehele a te agelu ki luga o te lalolagi, ma tipi kehe nā fuāvine mai te vine o te lalolagi, ma toli ki loto o te tānoa tatau fuāvine o te tōkahā o te Atua.

²⁰ Kua tatau nā fuāvine i te tānoa tatau fuāvine i fafo o te kakai, ma na gogolo mai ai ki fafo te toto mai te tānoa tatau fuāvine, ma tupu ai he lolo e tolu helau kilomita te loa ma tai lua mita te loloto.