Fakaaliga 13 - Tokelauan New Testament

Ko nā Manu Fekai e Lua

¹ Oi kō kitea atu ai he manu fekai e fanake mai te tai. E hefulu ona nifo hua ma fitu ona ulu; ko nā nifo hua takitahi e tofu ma te tamā palealiki, ma ko ona ulu takitahi e tūhia ai he igoa fāifāi ki te Atua.

² Ko te manu fekai e vē ko he leopate, ko ona vae e vē ni vae o he uloha ma tona gutu e vē he gutu o he leona. Kua tuku atu e te tālako tona mālohi ki te manu fekai, vēnā tona nofoāliki ma tana pule lahi fakatupu.

³ Ko tētahi o ulu o te manu fekai e fōliga nae i ei he manuka kino na tatau ke oti ai, kae ko te manuka kua mate. Na ofo lahi ia tagata uma i te lalolagi ma na mulimuli ai ki lātou ki te manu fekai.

⁴ Kua ifo ia tagata uma ki te tālako ona na ia fōkia tana pule ki te manu fekai. Na ifo foki ki lātou ki te manu fekai, ma lea vē, “Ko ai nei te vē ko te manu fekai? Ko ai nei te ia mafai oi tau ki ei?”

⁵ Na fakataga te manu fekai ke fai ona gugutu ma ana kupu fāifāi ki te Atua, ma na fakataga ke ia te ia te pule mo he fahefulu lua māhina.

⁶ Kua kāmata oi fāifāi ki te Atua, ki te igoa o te Atua ma te mea e nofo ai, ma nā tino uma e nonofo i te lagi.

⁷ Na fakataga ke tau ma tagata o te Atua ma ke fakatōkilalogia ki lātou, ma na fōki ki ei te pule ke ia pūlea ai ia nuku uma, mālō uma, gagana uma ma lanu uma.

⁸ Ko tagata uma i te lalolagi ka ifo atu ki a te ia, vaganā ai ki lātou na tūhia o lātou igoa ki te tuhi o te ola, ka ko hēki faia te lalolagi. Ko te tuhi o te ola e a te Punuamāmoe, tē na tāmate.

⁹ “Kāfai e i ei ni outou taliga, fakalogo la!

¹⁰ Ko ai lava e tatau ke haihaitia, ka haihaitia lava; ko ai lava e tatau ke tāmate i te pelu, ka tāmate lava i te pelu. Ona ko te mea tēnei, e tatau ai ia tagata o te Atua ke tūmau i te onohai ma te fakatuatua.”

¹¹ Oi kō kitea atu ai hētahi manu fekai, na fanake mai te kelekele. E lua ona nifo hua e vē ni nifo hua o he punuamāmoe, ma na tautala e vē he tālako.

¹² Na fakaaogā e ia te pule lahi a te manu fekai muamua ka koi i ei ai i kinā te manu fekai muamua. Na fakamālohia e ia te lalolagi ma tagata uma e nonofo ai, ke ifo ki te manu fekai muamua, tēia kua mate ona manuka na tatau ke oti ai.

¹³ Na fai e te lua o manu fekai ni fakailoga uiga kehe; na fakatonu e ia he afi ke fanaifo mai te lagi ki te lalolagi kae kikila atu ia tagata uma.

¹⁴ Ma na ia fakahehēa ia tagata uma e nonofo i te lalolagi i nā fakailoga na fakataga ke fai e ia i mua o te manu fekai muamua. Na fakatonu ki lātou e te manu fekai ke fau he fakatuha o te manu fekai tēia na manuka i te pelu, kae na ola lava.

¹⁵ Na fakataga te manu fekai ke ia mānavagia te ola ki loto o te fakatuha o te manu fekai muamua, kae ke mafai ai te fakatuha ke tautala ma fakatonu e ia ke tāmate nā tino e hē ifo ake ki a te ia.

¹⁶ Na fakamālohia e te manu fekai ia tagata uma, ki lātou e fakatauva ma ki lātou e maualuluga nā tūlaga, ki lātou e maukoloa ma ki lātou e mātitiva, ki lātou e fai ma pologa ma ki lātou e haoloto, ke tuku he fakailoga ki o lātou lima taumatau pe ki o lātou muāulu.

¹⁷ E hēai he tino e mafai ke fakatau atu pe fakatau mai ni ana koloa, kāfai e hē ia te ia te fakailoga. Ko te fakailoga tēnei, ko te igoa o te manu fekai, pe ko te nūmela e iloa ai tona igoa.

¹⁸ Ko te mea tēnei e manakomia ai te poto ma te mālamalama. Ko ai lava e mālamalama, ka mafai e ia oi fuafua te uiga o te nūmela o te manu fekai, auā ko te nūmela e fakatatau ki te igoa o he tino. Ko te nūmela ko te 666.