Fakaaliga 11 - Tokelauan New Testament

Ko nā Molimau e Toka Lua

¹ Oi na fōki mai ki a te au he lākau e vē he fua, ma na lea vē mai, “Fano oi fua te mālumalu paia o te Atua ma te fata faitāulaga, ma faitau te aofaki o tagata e tāpuaki i loto.

² Kae nahe fuagia nā lōtoā i fafo, auā kua uma te fōki ki tagata fakapaupau, iē ka ki lātou holia te Kakai Paia mo ni māhina e fa hefululua.

³ Ka uga atu e au aku molimau e toka lua e lākei i ni kofutaga, ma ka ki lā folafolagia te fekau a te Atua i nā aho iēnā e 1,260.”

⁴ Ko nā molimau e toka lua, ko nā lākau ōlive e lua ma nā tugāmōlī e lua e tutū i mua o te Aliki, tē e pule i te lalolagi kātoa.

⁵ Ma kāfai e taumafai he tino ke fai he mea ke āfāina ai ki lāua, e hau te afi mai o lā gutu ma fakaumatia ai o lā fili. Ko ai lava la e taumafai ke fai hana mea ki nā molimau e toka lua, ka fahiotiagia.

⁶ Kua ia te ki lāua te pule ke tapuni ai te lagi kae ke nahe ua lele i te taimi e tālaki ai e ki lāua te fekau a te Atua. Kua ia te ki lāua foki te pule ke fakaliu ai nā vai ki te toto, ma ke fakatupu ai i te lalolagi ho he itūkāigā mala, i ho he taimi lava e fofou ki lāua ki ei.

⁷ Kāfai e uma te molimaugia e ki lāua te fekau a te Atua, e fanake ki luga te manu fekai mai te lua e hēai he gataga o tona loloto, oi tau ma ki lāua; ma ka ia fakatōkilalogia ma tāmatea ki lāua,

⁸ ma ka tatitia o lā tino i luga o te auala o te kakai tāua, te mea na fakahātaulo ai te Aliki. Ko te igoa tau fakaataata o te kakai tēnā ko Hotoma pe ko Aikupito.

⁹ Ko nā tino mai mālō uma, nuku uma, gagana uma ma lanu uma, ka kikila pea lava ki o lā tino oti mo ni aho e tolu ma te āfa, ma ka hē ki lātou fakatagagia ke tanu.

¹⁰ Ko tagata o te lalolagi ka fiafia ona kua feoti ki lāua. Ka fai a lātou fiafiaga ma fai meaalofa tētahi ki tētahi, ona na pakia lele ia tagata o te lalolagi i faiga a nā pelofeta iēnei e toka lua.

¹¹ Kua uma te tolu ma te āfa aho, oi fanaifo ai te mānava ola mai te Atua ma ulu ki a te ki lāua, ma na tutū ai ki lāua ki luga; ma ko ki lātou uma na kikila ki ei, na mātataku lahi lele.

¹² Oi lagona ai e nā pelofeta e toka lua he leo lahi mai te lagi e lea vē ifo ki a te ki lāua, “Ōmamai ki luga nei!” Ka koi kikila atu o lā fili, ka kua ōake ki lāua ki te lagi i he ao.

¹³ I te taimi lava tēnā na tō ai he mafuie lahi; na fakakino ai te tahi vae hefulu o te kakai, ma e fitu afe ia tagata na feoti ai. Ko nā tino na hao, na mātataku lahi lele ma na viviki ake ai ki te Atua o te lagi.

¹⁴ Kua uma atu tona lua o mea fakamātakutaku, kae kua tāli pa mai tona tolu!

Ko te Pu tona Fitu

¹⁵ Oi ili ai te pu a te fitu o agelu, ma na kō lagona atu ai nā leo i te lagi e lea leo lalahi vēia, “Ko te pule e pūlea kātoa ai te lalolagi i te taimi nei, kua i lima o to tātou Aliki ma tana Mehia, ma ka pule pea lava ia ke pa ki te fakavavau!”

¹⁶ Oi fakapakukū ai ki lalo nā toeaina e toka luahefulufa e nonofo i o lātou nofoāliki i mua o te Atua, ma ifo atu ki te Atua,

¹⁷ ma lea vē, “Te Aliki te Atua Hilihilikehe te Mālohi, tē e ola nei ma nae ola pea lava! Ko ki mātou e fakafetai atu auā kua kē fakaalia tō mālohi lahi ma ko tau pule kua kāmata!

¹⁸ Kua fakatumulia ia tagata fakapaupau i te ita lahi auā kua pa ki te taimi e pa mai ai tō tōkahā, te taimi e fakamahino ai nā tino oti. Kua pa ki te taimi e tuku atu ai te taui mo au kaukauna, nā pelofeta ma nā tino uma o koe, ki lātou e mātataku ia te koe, nā tino e maualuluga nā tūlaga vēnā ma ki lātou e fakatauva. Kua pa ki te taimi e fakaumatia ai nā tino e ki lātou fakaumatiagia te lalolagi!”

¹⁹ Oi tatala ai te mālumalu o te Atua i te lagi, ma na kitea ai i kinā te Puha o te Feagaiga. Oi kānapanapa ai nā uila, gāpāpā nā tāgulu, ma lūlū he mafuie, ma to nā ua aiha mamafa.