Fakaaliga 1 - Tokelauan New Testament

¹ Ko te tuhi tēnei e fakamaumau ai nā mea na fakaalia e Iehu Keliho. Na tuku atu e te Atua ki a te ia te fakaaliga tēnei, kae ke iloa ai e ana kaukauna nā mea e tatau ke tutupu i he taimi pili mai. Na fakaalia e Keliho nā mea iēnei i te ugaga e ia o tana agelu ki tana kaukauna ko Ioane,

² tē na fai ma molimau ki te kupu a te Atua ma ki te takutinoga a Iehu Keliho, e vē ona fakaalia uma ake ki a te ia.

³ Amutia te tino e faitau leo lahi e ia te tuhi tēnei, ma amutia nā tino e lagona e ki lātou tēnei vāloaga ma mulimuli ki nā mea kua tūhiagia! Auā kua pili mai te taimi e tutupu ai nā mea uma iēnei.

Fakafeiloakiga ki nā Ekalehia e Fitu

⁴ Mai ia Ioane, ki nā Ekalehia e fitu i Ahia. Ke ia te koutou te alofa tūnoa ma te fīlēmū mai te Atua, tē e ola nei, nae ola pea lava, ma ka haele mai, vēnā foki mai nā agaga e fitu kua i mua o tona nofoāliki;

⁵ ma vēnā foki mai ia Iehu Keliho, te molimau fakamāoni. Ko ia te tino muamua kua fakatū mai i te oti, ma e pule ia i tupu uma o te lalolagi. E alofa mai ia ki a te ki tātou, ma kua ia fakahaolotoagia ki tātou mai te agahala, e ala i tona toto na maligi,

⁶ ma na ia faia ki tātou ma ohitāulaga i tona mālō ke tautua ki tona Atua ma tona Tamana. Ke ia Iehu Keliho te vīkiga ma te mana ke pa ki te fakavavau lava! Amene.

⁷ Kikila, e haele mai ia i luga o nā ao! Ka kitea ia e tagata uma, ma kitea foki ia e ki lātou na veloa ia i te tao. Ka faitatagi leo lahi ia tagata uma i te lalolagi mo ia. Ma ka vēnā lava ona taunuku! Amene.

⁸ “Ko au ko te Alefa ma te Ōmeka,” kua vāgana ai te Aliki te Atua Hilihilikehe te Mālohi, tē e ola nei, nae ola pea lava, ma ka haele mai.

Kua Kitea e Ioane te Keliho na Toetū

⁹ Ko au ko Ioane, he uho ki a te koutou, ma ko he hoko e o Iehu. Ko au he hoa e o koutou, ma e talia ma te onohai e ki tātou nā puapuagā e maua ai nā tino e o ki lātou te Mālō. Ko au na kave ki te motu ko Patamo ona nae kō folafolagia te kupu a te Atua ma te meamoni na fakaalia e Iehu.

¹⁰ I te aho o te Aliki, na ulufia ai au e te Agaga o te Atua ma na kō lagona ai he leo lahi e vē he tagi o he pu e ili, e tautala mai ki a te au mai oku tua.

¹¹ E lea vē mai, “Tuhi ki lalo nā mea e kitea e koe ki he tuhi, ma kave ai te tuhi ki nā Ekalehia i nā kakai iēnei e fitu: ko Efeho, ko Himuna, ko Pekamoni, ko Tuateilo, ko Hateihi, ko Filatelefeia, ma Laotikeia.”

¹² Na fāliu atu au ke kikila pe ko ai te tino e tautala mai ki a te au, ma na kō kitea ai nā tugāmōlī aulo e fitu,

¹³ ma i te mea e i ei nā tugāmōlī, nae i ei ai he mea e vē he tagata ola, e kofu i he kofu tatao loloa e tau ki ona tapuvae, ma he fuhipaku aulo e fuhi ai tona fatafata.

¹⁴ Ko tona laulu e paepae e vē ko te fulufulu māmoe paepae, pe vē ko te kiona, ma ona mata e mumū e vē ko he afi;

¹⁵ ko ona vae e huhulu e vē ko te apamemea kua uma te toe fakalelei ma pōlehi, ma ko tona leo lahi e vē ko te gugulu o he tai galu lahi.

¹⁶ E kukuma i tona lima taumatau nā fetu e fitu, ma he pelu e taufai kaha uma nā itū e hau ki fafo mai loto o tona gutu. Ko ona fōliga e huhulu e vē ko te huhulu mālohi o te la i te vaeluaga o te aho.

¹⁷ I te kō kiteaga o ia, oi fakapakū ai au ki tafa o ona vae e vē he tino kua oti. Kae kua tuku mai tona lima taumatau ki oku luga ma lea vē mai, “Ia koe nahe mataku! Ko au ko te muamua ma te mulimuli.

¹⁸ Ko au ko tē e ola pea lava! Ko au na oti, kae nei ko au kua toe ola ke pa ki te fakavavau. E ia te au te pule e pūlea ai e au te Oti ma Heoli.

¹⁹ Tuhi la ki lalo nā mea e kitea e koe, nā mea e tutupu i te taimi nei ma nā mea ka tutupu mulimuli.

²⁰ Ko tēnei te uiga lilo o nā fetu e fitu e kitea e koe i toku lima taumatau, ma nā tugāmōlī aulo e fitu; ko nā fetu e fitu ko nā agelu ia o nā Ekalehia e fitu, ma ko nā tugāmōlī e fitu ko nā Ekalehia iēnā e fitu.