Epelu 9 - Tokelauan New Testament

Te Faiga o nā Tāpuakiga ki te Atua i te Lalolagi ma i te Lagi

¹ Ko te feagaiga muamua e i loto ai nā tūlāfono mo te faiga o nā tāpuakiga, vēnā ma te faiga o he mea ke fai ai nā tāpuakiga i te lalolagi.

² Na fakatū he Falekie, ko te Falekie ia e pito ki fafo nae fakaigoa ko te Nofoaga Paia. I loto i kinā, nae i ei ai he tugāmōlī ma he laulau e i luga ai nā falaoa kua fakatō mo te Atua.

³ I tua atu o te kie pupuni tona lua, nae i ei ai te Falekie nae fakaigoa ko te Nofoaga e Hili te Paia.

⁴ I loto i kinā, nae i ei ai te fata faitāulaga aulo mo te fakamūga o nā meamanogi. Nae i loto ai foki te Puha o te Feagaiga e ufiufi i te aulo ia fafo ma loto, ma nae i loto ai nā aulo vēnā ma he fagu aulo e i loto ai te mānai, te tokotoko o Alona na ola ake ai nā lau, ma nā pa tuhituhi e lua e gaohia i te papa, e tūhia ai i luga nā fakatonuga a te Atua.

⁵ I luga o te Puha e i ei ai nā kēlupi (e fakailoa ai te fakatahi ki ei o te Atua), ma o lātou kapahau e falōlō ma pa lele ki luga o te mea e fakamāgalo ai nā agahala. Kae e hē ko tēnei te taimi e fakamālamalama manino atu ai nā mea uma iēnei.

⁶ E vēnei la te fakatūlagaga o nā mea iēnei. Ko nā ohitāulaga e olo i aho uma ki loto o te Falekie pito ki fafo, mo te fakatinoga o nā tiute o ki lātou,

⁷ kae nā ko te Ulu Ohitāulaga oioti te fano ki loto o te Falekie pito ki loto, ma e fakafokotahi oioti i te tauhaga e fai ai e ia te mea tēnei. E fano oioti ki loto kāfai kua ia te ia ni toto mai nā manu kua ohi ai te tāulaga, ma ofo atu ki te Atua mo ia lava ma vēnā mo nā agahala kua fai e tagata kae hē ki lātou iloa.

⁸ E fakailoa manino mai e te Agaga Paia e ala i nā fakatūlagaga iēnei, ko te auala ki loto o te Nofoaga e Hili te Paia, ko hēki mafai ke tatala auā te Falekie pito ki fafo koi tū lava.

⁹ Ko he fakahinoga tēnei e fakatatau mo te taimi nei. Ko tona uiga ko nā meaalofa ma nā tāulaga ki te Atua e fai i nā manu, e hē mafai ke lelei kātoatoa ai nā loto o tagata tāpuaki e vē ko te tūlaga e tatau ke i ei ai,

¹⁰ ona ko nā mea iēnei ni mea tau meakai, meainu, ma nā faiga kehekehe e mafai ai ia tagata ke fakamamāgia. Ko nā mea uma iēnei ni tūlāfono mo te kikila atu i fafo, e fakaaogā oioti ke pa ki te taimi e hui ai e te Atua i ni mea fou e hili atu te lelei.

¹¹ Kae ko Keliho kua haele mai, ko ia ko te Ulu Ohitāulaga o nā mea lelei uma lele kua i kinei. Ko te falekie e galue ai e hili atu te tāua ma e lelei kātoatoa; e hē ko he falekie na fau i ni lima o ni tino, ma e hē o te lalolagi tēnei.

¹² I te fanoga o Keliho ki loto o te falekie ma ulu atu ki loto o te Nofoaga e Hili te Paia mo te toe taimi lava, e hēki ia kavea te toto o nā oti ma nā povi ke ofo atu ma tāulaga; kae na ia ofo atua tona lava toto ma na maua ai e ki tātou te fakaolataga e fakavavau.

¹³ Ko te toto o nā oti ma nā povi ma te lefulefu o nā povi kua huhunu, e lūlū ki luga o nā tino ma e mamā ai ki lātou i nā itū tau tāpuakiga.

¹⁴ Ona ko te mea tēnei e moni, ka hē hili lele atu nei la te lahi o nā mea e mafai ke fakataunuku i te toto o Keliho? Na ia ofo atua ia ia lava ma tāulaga ki te Atua e kātoatoa te lelei, e ala i te Agaga o te Atua e tūmau pea lava ke pa ki te fakavavau. Ko tona toto ka fakamamā ai o tātou lotofuatia mai nā faiga e hēai he aogā, kae ke mafai ai ki tātou ke tautua ki te Atua e ola pea lava.

¹⁵ Ko Keliho la te na fautua ke i ei he feagaiga fou, kae ke mafai ai ke maua ki lātou kua filifilia e te Atua, te fakamanuiaga e fakavavau kua uma te ia folafolagia. E mafai te mea tēnei ke tupu, auā ko Keliho na mate ma ko tona mate, e fakahaoloto ai ia tagata mai o lātou hehē i te taimi o te feagaiga muamua.

¹⁶ I te tūlaga tau ki he māvaega, e tatau ke i ei he fakamāoniga ko te tino na faia te māvaega kua oti,

¹⁷ auā ko te māvaega e hēai hona uiga pe kāfai ko te tino na ia faia koi ola lava; e fātoā aogā lava kāfai te tino tēnā kua oti.

¹⁸ Ko te mea ia, ke pa foki lava ki te feagaiga muamua na fātoā kāmata oi aogā i te fakaaogāga o te toto.

¹⁹ Muamua, na folafola e Mohe ki tagata nā fakatonuga uma e vē ona tūhia i te Tūlāfono. Oi kave ai e ia te toto o nā povi ma nā oti, kua palu ki ei nā vai, oi lūlū ai ki luga o te tuhi o te Tūlāfono ma luga o tagata. Na fakaaogā e ia he tamā lālā mai te lākau e igoa ko te īhopo, ma ni vavae lanu kukula ke fai ai te mea tēnei.

²⁰ Na vāgana ai vēia, “Ko te toto tēnei e fakamautū ai te feagaiga kua fakatonu e te Atua ke uhitaki koutou ki ei.”

²¹ Na vēnā foki oi lūlū e Mohe te toto ki luga o te Falekie Paia, ma luga o nā mea uma e fakaaogā i nā tāpuakiga.

²² E tuha ai ma te Tūlāfono, toetoe lava ko mea uma lele e fakamamāgia i te toto, ma ko nā agahala e fātoā mafai ke fakamāgalo kāfai te toto e fakamaligi ki fafo.

Ko Keliho ko te Tāulaga e Kave Kehe ai nā Agahala

²³ Ko nā mea iēnā, nā ata fakatuha o nā mea i te lagi na gaohia muamua, e tatau ke fakamamā i te faiga tēnei. Kae ko nā mea lava ia o te lagi, e manakomia ni tāulaga e hili atu te lelei.

²⁴ Auā ko Keliho e hēki fano ki loto o he Nofoaga Paia na fai i lima o tagata, te ata fakatuha o te mea moni i te lagi. Na fano lava ki te lagi ke fai ma fautua mo ki tātou i mua o te Atua.

²⁵ Ko te Ulu Ohitāulaga Iutaia e fano ki loto o te Nofoaga e Hili te Paia i tauhaga uma ma te toto o nā manu. Kae ko Keliho e hēki fano ki loto ke ofo atu ia ma tāulaga i ni taimi e lahi,

²⁶ auā ka na he mea na fai e ia te mea tēnei, e vēnei ake e lahi lele nā taimi na puapuagā ai ia talu te foafoaga o te lalolagi. Kae i te taimi nei kua tafapili ai ia mea uma ki te ikuga, kua hau mo te taimi lava tēnei e fokotahi, ke ia kave kehea ia agahala a tagata e ala i te ofo atu o ia lava ma tāulaga.

²⁷ Ko tagata uma e tatau ke oti fakafokotahi, ma ka uma tēnā oi kua fakamahino ai e te Atua.

²⁸ E vēnā foki lava te auala na ofo fakafokotahi atu ai ia Keliho ma tāulaga, ke kave kehea ai ia agahala a te tokalahi. Ka toe haele mai ia, e hē mo te fakamāgaloga o nā agahala, kae ke fakaola ki lātou e fakatalitali ma te amanaki ki a te ia.