Epelu 8 - Tokelauan New Testament

Ko Iehu to tātou Ulu Ohitāulaga

¹ Ko te uiga moni o te mea e lea atu ai ki mātou, e i ei to tātou Ulu Ohitāulaga, e nofo i te itū taumatau o te nofoāliki o te Atua i te lagi.

² E tautua ki te Atua e ala i tona tofi Ulu Ohitāulaga, i loto o te Nofoaga e Hili te Paia, ko te falekie moni tēnā na fakatū e te Aliki, kae hē i ni lima o ni tino.

³ Ko nā Ulu Ohitāulaga uma e tōfia ke ki lātou ofo atua ki te Atua nā meaalofa ma nā tāulaga e fai i nā manu. Ko to tātou Ulu Ohitāulaga foki la, e tatau ke i ei hana tāulaga ke ofo atu.

⁴ Anei ake nae i kinei ia i te lalolagi, e hēki mafai ke kavea ia ma ohitāulaga, auā e i ei lava nā ohitāulaga e ki lātou ofo atua nā meaalofa e vē ona fakatonugia e te Tūlāfono a Iutaia.

⁵ Ko te gāluega ohitāulaga a lātou e fai, kua nā ko he ata fakatuha ma ko he ataata o nā mea i te lagi. Nae vēnā foki lava te tūlaga nae i ei i te taimi o Mohe. I te kua hāuni o Mohe ke fakatū te Falekie Paia, na lea vē atu te Atua ki ei, “Ke mautinoa e koe ko nā mea uma lele e fua ki te ata na fakahino atu e au ki a te koe i luga o te mauga.”

⁶ Kae nei, kua tuku atu ki a Iehu ke faia te gāluega ohitāulaga, ma e hili lele atu te tāua o tana gāluega i lo nā gāluega a iētahi ohitāulaga, e vē foki lava oi hili lele atu te tāua o te feagaiga na ia faia i te va o te Atua ma ona tagata, ona e fakavae i luga o nā folafolaga mo nā mea e hili atu te lelei.

⁷ Anei ake e hēki i ei he mea na fakahētonu i te feagaiga muamua, e hēki i ei foki he mea na tatau ke fai ai hētahi feagaiga.

⁸ Kae kua kitea e te Atua nā mea hehē a ona tagata i te leaga vē, “E hau nā aho, kua vāgana ai te Aliki, e fai ai e au he feagaiga fou ma tagata o Ihalaelu vēnā ma tagata o Iuta.

⁹ Ka hē vē ko te feagaiga na kō faia ma o lātou tupuna i te aho na kō kukua ai ki lātou i o lātou lima ma takitaki ki fafo o Aikupito. Nae hē tauhi ki lātou ki te feagaiga a āku ma ki lātou, oi kō tiakia ai ki lātou.

¹⁰ Kae i te taimi nei, ko tēnei te feagaiga ka kō faia ma tagata o Ihalaelu i nā aho koi hau, kua vāgana ai te Aliki: ka tuku e au aku tūlāfono ki o lātou māfaufau ma tūhia ki o lātou fatu. Ka fai au ma o lātou Atua, ma ka kavea ki lātou ma oku tagata.

¹¹ E hēai he tino o ki lātou e ia tau akoako atua ki o lātou lava tagatānuku pe lea vē ki o lātou tagatānuku, ‘Ke iloa e koe te Aliki.’ Auā ka iloa au e ki lātou uma lele, mai tē e pito fakatauva ki tē e hili te tāua.

¹² Ka fakamāgalo e au a lātou agahala ma hē toe māfaufau au ki a lātou mea hehē.”

¹³ I te tautalaga o te Atua e uiga ki he feagaiga fou, na kavea ai loa te feagaiga muamua ma feagaiga tuai; ma ko ho he mea kua leva ma tuai, e hē mataloa kae mou kehe atu.