Epelu 7 - Tokelauan New Testament

Ko te Ohitāulaga ko Melekiheteka

¹ Ko te Melekiheteka tēnei nae fai ma tupu o Halema ma ko he ohitāulaga e a te Atua Hilihilikehe. I te foki ifoga o Apelaamo mai te taua na fakatōkilalo ai e ia nā tupu e toka fa, na fakafetaui ki ei ia Melekiheteka ma tuku atu ki ei tana fakamanuiaga;

² oi fōki ai e Apelaamo ki ei te tahi vaehefulu o nā mea uma lele na maua mai te taua. (Ko te uiga muamua o te igoa o Melekiheteka ko te “Tupu Fai Meatonu”; ma ona ko ia foki ko te tupu o Halema, e i ei ai foki tētahi uiga o tona igoa ko te “Tupu o te Fīlēmū.”)

³ E hēai ni fakamaumauga e tūhia ai te tamana pe ko te mātua o Melekiheteka, pe ko ona tupuna; e hēai ni fakamaumauga o tona fānau mai pe ko tona mate. E vē foki ia ko te Ataliki o te Atua; e tūmau pea lava i te tofi ohitāulaga ke pa ki te fakavavau.

⁴ Kua koutou kitea la te tāua lahi o Melekiheteka. Na fōki ki ei e to tātou tupuna takutakua ko Apelaamo, te tahi vaehefulu o nā mea uma a ia na maua i te taua.

⁵ Ma ko nā lāpuna o Levi kua kavea ma ohitāulaga, kua fakatonugia e te Tūlāfono ke ki lātou aoagia te tahi vaehefulu mai tagata Ihalaelu, ko tona uiga, ko nā tino lava o ki lātou, e ui lava ko ki lātou foki ni lāpuna e o Apelaamo.

⁶ Ko Melekiheteka e hēki tupuga mai ia Levi, kae na ia aoa te tahi vaehefulu mai ia Apelaamo ma ia fakamanuiagia ia, te tino na tuku ki ei e te Atua ana folafolaga.

⁷ E mautinoa lelei lava, e hili atu te tāua o te tino e ia faia te fakamanuiaga i lo te tino e fakamanuia.

⁸ Ko te tahi vaehefulu e ao e nā ohitāulaga, ni tino e olo lava e feoti; kae e vē la ki a Melekiheteka, ko te tahi vaehefulu na ao e he tino e ola, e vē ona lea mai ai te tuhituhiga paia.

⁹ E mafai foki ke fakakupu vē, i te totōgiga e Apelaamo o te tahi vaehefulu, e tuha lava kua totogi foki e Levi (tē e ōna nā fānau e ki lātou aoagia te tahi vaehefulu).

¹⁰ Auā ko Levi ko hēki fānau ai i te taimi tēnā, kae i hētahi fakakupuga, e i loto ai o te tino o tona tupuna ko Apelaamo, i te taimi na fetaui ai ma Melekiheteka.

¹¹ E ui lava la ko te Tūlāfono e lea mai ko nā ohitāulaga e tatau ke ōmamai mai te puikāiga o Levi, e hē mafai e nā ohitāulaga iēnā ke ki lātou fakalelei kātoatoagia he tino. Ma ko te mea ia e tatau ai ke i ei he ohitāulaga e vē ko Melekiheteka, i lo he tino mai te kāiga ohitāulaga o Alona.

¹² Auā kāfai kua i ei he hūiga ki nā ohitāulaga, kua tatau foki ke i ei he hūiga ki te tūlāfono.

¹³ Ma ko to tātou Aliki, tēia e fakatatau ki ei nā tuhituhiga iēnei, e kehe te puikāiga e hau ai, ma e hēai lele he tino mai tona puikāiga na kua kavea ma ohitāulaga.

¹⁴ Kua iloa e tagata uma na fānau mai i te puikāiga o Iuta, ma e hēki tākua e Mohe te puikāiga tēnei, i tana tautalaga e uiga ki nā ohitāulaga.

Hētahi Ohitāulaga e vē ko Melekiheteka

¹⁵ Ko te mea tēnei kua manino lele; kua i ei hētahi ohitāulaga kehe kua hau, he ohitāulaga e vē ko Melekiheteka

¹⁶ Na kavea ia ma ohitāulaga, e hē ona ni tonu fakatetagata e uiga kinā tofi tuku fakaholo, kae ona ko te mana o tona ola e hēai he gataaga.

¹⁷ Auā e vē oi tūhia i te tuhituhiga paia, “Ko koe ka fai ma ohitāulaga ke pa ki te fakavavau, i te puikāiga ohitāulaga a Melekiheteka.”

¹⁸ Ko te tūlāfono muamua la kua tuku kehe auā e vāivai ma hēai hona aogā.

¹⁹ Auā nae hē mafai e te Tūlāfono a Mohe ke fakalelei kātoatoagia he mea. Kae nei, kua kaumai e te Atua he fakamoemoe e hili atu te lelei, e tafapili ai ki tātou ki a te ia.

²⁰ E hē gata i tēnā, ko te tautōga foki na fai e te Atua. E hēki faia he tautōga vēnei e te Atua i te taimi na ia tōfia ai iētahi ohitāulaga.

²¹ Kae ko Iehu na kavea ma ohitāulaga e ala i he tautōga, i te leaga vē o te Atua ki ei, “Kua fai te tautōga a te Aliki ma e hē toe ia huia lele: ‘Ko koe ka fai ma ohitāulaga ke pa ki te fakavavau.’ ”

²² Ko te kehekehega la tēnei, kua kavea ai foki ia Iehu ma fakamāoniga o te hili atu o te lelei o te feagaiga fou.

²³ E i ei tētahi kehekehega: nae tokalahi lele atu iētahi ohitāulaga ona nae feoti ma hē mafai ai ke fakaauau a lātou gāluega.

²⁴ Kae ko Iehu e ola pea lava ke pa ki te fakavavau, ma ko tana gāluega ohitāulaga e hē tukua ki hētahi tino ke fakaauaua.

²⁵ Ma e ia mafaia la, i te taimi nei ma taimi uma, ke fakaola ki lātou e ōmamai ki te Atua kui ia te ia, auā ko ia e ola pea ke pa ki te fakavavau, ke fautua ki te Atua mo ki lātou.

²⁶ Ko Iehu la ko te Ulu Ohitāulaga e maua ai e ki tātou te fehoahoani i ho he mea e fofou ki tātou ki ei. E lelei lava ia i te kikila a te Atua, e hēai hona hehē pe he agahala; kua tuku kehe ia mai tagata agahala ma hiki ake e te Atua ki te lagi.

²⁷ Ko Iehu e hē vē ko iētahi ulu ohitāulaga; e hē tau ofo akea e ia ni tāulaga i aho uma, muamua, mo ana lava agahala, ma vēnā mo nā agahala a tagata. E fokotahi oioti lava te tāulaga na ia ofoa, ma e fakafokotahi oioti lava, ko te ofo atuga o ia e ia lava.

²⁸ E tōfia e te Tūlāfono a Mohe nā tino e hē kātoatoa te lelei, ke kavea ma ulu ohitāulaga; kae ko te folafolaga a te Atua na fai ai ma tana tautōga ka ko hēki i ei ai te Tūlāfono, kua tōfia ai te Ataliki, tē kua uma te fakakātoatoagia o tona lelei ke pa ki te fakavavau.