Epelu 6 - Tokelauan New Testament

¹ Tātou olo la ki mua ki nā akoakoga mo nā tino mātutua, kae tuku nā lehona muamua e uiga ki a Keliho. E hē tatau ke haga talanoa pea lava ki tātou ki te māfuaaga e tatau ai ki tātou ke liliu kehe mai nā faiga e hēai he aogā, ma pe aiheā foki te tatau ai ki tātou ke talitonu ki te Atua.

² Ma e hē tatau ke haga akoako pea e ki tātou e uiga ki nā papatihoga, te tuku o nā lima ki luga o he tino ke fakamanuia; te toe fakatutū o tagata mai te oti ma te fakamahinoga a te Atua e hēai he gataaga.

³ Tātou olo la ki mua! Ma ko te mea tēnei e fai e ki tātou pe kāfai e finagalo ki ei te Atua.

⁴ Auā e vēhea ona mafai ke toe kaumai nā tino kua hē fakatuatua ki te Atua, ke toe halamō? Nae mālamalama ki lātou ki te moni o te fekau mai te Atua; na maua e ki lātou te meaalofa mai te lagi, ma talia fakatahi e ki lātou ma iētahi tino, te Agaga Paia;

⁵ na iloa e ki lātou e ala ia lātou gāluega nae tautua ai, ko te kupu a te Atua e lelei, ma na logo i o lātou tino te mālohiaga o te ōlaga koi hau.

⁶ Kae nei kua liliu kehe ki lātou mai te Atua. E hē mafai ke toe kaumai ki lātou ke toe halamō, auā e vē lava kua toe fakahātaulo e ki lātou te Ataliki o te Atua, ma faigōfie ai ke fakatauemu ki ei ia tagata.

⁷ E fakamanuia e te Atua te kelekele e goto ki loto te vai mai nā ua e to ho ki luga, ma e ola ake ai nā lākau e aogā mo ki lātou e totōagia.

⁸ Kae kāfai e ola ake ai ni lākau tālatala ma ni vao kino, e hēai hona aogā, ma e ono fetū e te Atua ma huhunu i te afi.

⁹ E ui lava ko ki mātou e tuhi atu i ni kupu vēnei te kau uho pele, e mautinoa e ki mātou ka koutou filifiliagia te auala e maua ai te fakaolataga.

¹⁰ Ko te Atua e fai meatonu. E hē mafai ke puli ia te ia autou gāluega nae fai, pe ko te koutou alolofa ki a te ia e ala i te koutou fehoahoani ki iētahi uho Kelihiano ke pa mai lava ki te taimi nei.

¹¹ Ko te mea e pito hili ona fofou ki mātou ki ei, ke mafai ke tūmau pea te koutou loto naunau ke pa ki te ikuga, kae ke mafai ai ona fakataunuku nā mea e fakamoemoe koutou ki ei.

¹² Ko ki mātou e hē fofou ko koutou ke nonofo tauanoa. Kae ko ki mātou e fofou ko koutou ke vē ko nā tino kua talitonu ma e onohai, ma mauagia nā mea kua uma te folafola e te Atua.

Ko te Folafolaga a te Atua e Taunuku

¹³ I te faiga o te folafolaga a te Atua ki a Apelaamo, na fai tana tautōga ko nā mea kua folafola e ia e taunuku lava. Ona e hēai hētahi tino e hili atu i lo ia, na fakaaogā ai lava e ia tona igoa, i te faiga o tana tautōga.

¹⁴ Na vāgana vē, “E folafola atu e au ki a te koe, ka kō fakamanuiagia koe ma fōki atu mo koe ni fānau e tokalahi.”

¹⁵ Ko Apelaamo nae onohai, ma na maua e ia nā mea na folafola e te Atua.

¹⁶ Kāfai e fai e tagata ni tautōga, e fakaaogā e ki tātou te igoa o he tino e hili atu tona maualuga i lo ki tātou, ma ko te tautōga e fakamautū kātoatoa ai he takutinoga.

¹⁷ Mo nā tino ka ki lātou mauagia nā mea kua uma te folafolagia, e fofou te Atua ke iloa e ki lātou ko tana folafolaga e hē hūia lele; ma ko te mea ia na fakaopoopo ai e ia tana tautōga ki tana folafolaga.

¹⁸ Ko nā mea la iēnei e lua, e hē mafai ke toe huia ma e hē mafai te Atua ke pepelo e uiga ki ei. Ko ki tātou la iē kua maua te haogalēmū i te Atua, ka ātili mautū ai to tātou pipiki ki te fakamoemoe kua ia kaumaia ki a te ki tātou.

¹⁹ Ko te fakamoemoe tēnei kua ia te ki tātou, e vē ko he taula mo o tātou ōlaga, e mautinoa e haogalēmū ai ki tātou; ma ko te fakamoemoe tēnei ko Iehu, ko tē kua fano kui atu i te kie pupuni i te Mālumalu i te lagi, ki loto o te Nofoaga e Hili te Paia

²⁰ Kua muamua ia ma o tātou hui, ma kua kavea ma Ulu Ohitāulaga e fakavavau, i te puikāiga ohitāulaga a Melekiheteka.