Epelu 5 - Tokelauan New Testament

¹ Ko nā Ulu Ohitāulaga takitahi uma e filifili mai i tagata, ma tōfia ke fai ma o lātou hui ke tautua ki te Atua, ma ofo atua nā meaalofa ma nā tāulaga mo a lātou agahala.

² Ona e vāivai foki ia i te lahi o itū, oi e hē ia honafaia ai foki nā tino e hē mālamalama ma i ei ni o lātou hehē.

³ Ona la ko tona vāivai, e tatau ai ke ohi atu e ia he tāulaga, e hē gata mo agahala a tagata, kae vēnā foki mo ana ia lava agahala.

⁴ E hēai he tino e ia filifilia mo ia lava te tofi Ulu Ohitāulaga. E fātoā kavea lava he tino ma Ulu Ohitāulaga pe kāfai kua kalagagia ia e te Atua — e vē ko Alona.

⁵ E vēnā foki lava ia Keliho. E hēki nofo lava ia ma filifili ia ia lava, ke kavea ma Ulu Ohitāulaga. Kae na vāgana te Atua ki a te ia, “Ko koe ko toku Ataliki; i te aho nei, ko au kua kavea ma ō Tamana.”

⁶ Na vāgana vē foki, “Ko koe ka fai ma ohitāulaga ke pa ki te fakavavau, i te puikāiga ohitāulaga a Melekiheteka.”

⁷ I te ōlaga o Iehu i te lalolagi nei, nae tatalo ma ole atu ma te leo lahi ma te maligi o loimata ki te Atua, tē e ia mafaia oi fakahao ia mai te mate. Ona ko Iehu e loto maulalo ma na ofo kātoatoa atu ia mo te Atua, na tali mai ai ki ei te Atua.

⁸ E ui lava ko ia ko te Ataliki o te Atua, kae na akoakogia e ala i ona puapuagā, ke uhitaki.

⁹ Na kavea ia ma auala na maua ai e nā tino uma e uhitaki ki a te ia te fakaolataga e fakavavau, i na kua uma te ia fakataunukua o nā mea uma na tuku e ia faia,

¹⁰ ma na tōfia ai ia e te Atua ke kavea ma Ulu Ohitāulaga i te puikāiga ohitāulaga a Melekiheteka.

Apoapoakiga ke Tūmau te Fakatuatua ki te Atua

¹¹ Te lahi ko o nā mea e fia lea atu ai ki mātou e uiga ki te matākupu tēnei, kae e faigatā ke fakamatala atu ona ko koutou e mālamalama gatā.

¹² I te taimi nei, ko koutou kua tatau ke fai ma faiakoga — kae koi manakomia pea lava e koutou he tino ke ia akoako atua nā lehona muamua o te fekau a te Atua. I lo te kakai ki nā meakai mamafa, ko koutou koi fakainu lava i te huāhuhu.

¹³ Auā ko te tino e fafaga i te huāhuhu ko he pepe, ko hēki ia iloa te mea e hako ma te mea e hehē.

¹⁴ Kae ko nā meakai mamafa e mo nā tino kua mātutua, kua i ei te poto māhani ma ki lātou iloa ai oi fakavahega te mea e hako ma te mea e kino.