Epelu 4 - Tokelauan New Testament

¹ Ko te folafolaga a te Atua e uiga ki te nuku e maua ai e ki tātou te malōlōga, e i ei pea lava. E tatau la ki tātou ke fakaeteete, nā he tino o koutou e hē ia mauagia te malōlōga kua folafola mai.

² Auā kua fakalogo ki tātou ki te Tala Lelei e vē foki lava ona fakalogo ki lātou ki ei. Na fakalogo ki lātou ki te fekau, kae e hēki aogā mo ki lātou auā e hēki talia e ki lātou ma te loto fakatuatua.

³ Ko ki tātou la nā tino kua talitonu, ka maua e ki tātou te malōlōga kua folafola e te Atua. E vē lava oi vāgana ai ia: “Ko au na ita ma fai ai taku tautōga e vēnei: ‘Ka hē pa lele ki lātou ki te nuku na mea e tuku atu ai e au ki a te ki lātou, he malōlōga.’ ” Na lea vēnei e ui lava ko tana gāluega na uma lava i te taimi na ia gaohia ai te lalolagi.

⁴ Auā ko tēnei te mea e tūhia i nā Tuhituhiga Paia e uiga ki tona fitu o aho: “Ko te Atua na mālōlō mai ana gāluega uma, i tona fitu o aho.”

⁵ E tūhia foki vē: “Ka hē pa lele ki lātou ki te nuku na mea e tuku atu ai e au ki a te ki lātou, he malōlōga.”

⁶ Ko nā tino na muamua fakalogo ki te tala lelei, e hēki maua e ki lātou te malōlōga tēnā, ona e hēki talitonu. E i ei la iētahi tino e fakataga e te Atua ke ki lātou mauagia.

⁷ E iloa e ki mātou auā kua fakailoga e te Atua hētahi aho e takua i te tuhituhiga paia, ko te “Aho nei.” I nā tauhaga e lahi i tua mai, na fakailoa mai e ia nā mea iēnei e ala ia Tavita, i nā tuhituhiga e vē ona tākua: “Kāfai e fakalogo koutou ki te leo o te Atua i te aho nei, koutou nahe loto makaka.”

⁸ Auā anei ake na fōki e Iohua ki tagata te malōlōga na folafola e te Atua, e hēki toe tautala te Atua i tua mai, e uiga ki hētahi aho.

⁹ Ko te mea ia, koi i ei lava mo tagata o te Atua he malōlōga, e vē ko te malōlōga o te Atua i tona fitu o aho.

¹⁰ Auā ko nā tino e ki lātou maua te malōlōga e vē ona folafolagia e te Atua, ka mālōlō ia lātou gāluega, e vē lava ona mālōlō te Atua mai ana gāluega.

¹¹ Tātou taumafai la ma te fakamākeke ke maua e ki tātou te malōlōga tēnā, kae ke nahe i ei he tino e pakū e vē ko te mea na pa ki lātou ki ei, ona ko to lātou hē fakatuatua.

¹² Ko te kupu a te Atua e ola ma e mamana, e kaha atu ia i lo ho he pelu matalua. E ati lele tana tipi ki te fatumanava ma te agaga, ki te mea e i ei nā hokoga ivi ma te atilo. E ia fakamahinoagia ia manakoga ma manatunatuga o te loto.

¹³ E hēai lele he mea e mafai ke mumuni i te Atua; ko nā mea uma lele na gaohia e hula ma e manino lele i te kikila a te Atua. Ma ko ia te tatau ki tātou ke tali atu ki ei, e tuha ai ma a tātou mea uma na fai.

Ko Iehu te Ulu Ohitāulaga e hili te Tāua

¹⁴ Ko te mea ia, tātou tāofi mau la ki nā mea kua folafola e ki tātou e talitonu ki tātou ki ei. Auā e i ei to tātou Ulu Ohitāulaga e hili te tāua, kua fano ki te mea e i ei te Atua — ko Iehu, te Ataliki o te Atua.

¹⁵ Ko te Ulu Ohitāulaga mo ki tātou e mālamalama i nā mea e vāivai ai ki tātou. Auā na fakaohoohogia i nā auala kehekehe uma e vē foki lava ko ki tātou, kae e hēki agahala.

¹⁶ Ke ia te ki tātou la te loto mākeke, ma fakatafapili atu ki te Atua i tona nofoāliki, e i ei ai te alofa tūnoa. Ka maua ai e ki tātou i kinā, te alofa fakahao ma te alofa tūnoa ke fehoahoani ki a te ki tātou, i nā taimi e manakomia ai e ki tātou.