Epelu 3 - Tokelauan New Testament

E Tāua atu ia Iehu i lo Mohe

¹ Te kau uho Kelihiano, koutou iēnā kua kalagagia foki e te Atua! Māfaufau ki a Iehu, tēia na uga mai e te Atua ke kavea ma Ulu Ohitāulaga ke fehoahoani ki nā mea uma e tālaki e ki tātou, ma e talitonu ki tātou ki ei.

² Nae uhitaki ki te Atua, tē na ia filifiliagia ia ke faia tana gāluega, e vē lava ko te uhitaki o Mohe i te faiga o tana gāluega i loto o te fale o te Atua.

³ Ko te tino e ia fauagia he fale, e hili atu tona tāua i lo te fale. E vēnā foki lava oi hili atu te tāua o Iehu i lo Mohe.

⁴ Ko nā fale takitahi uma lele, e i ei lava te tino na ia faua — ma ko te Atua lava te na fau e ia nā mea uma.

⁵ Ko Mohe nae kaukauna ma te fakamāoni i loto o te fale o te Atua, ma na ia fakailoagia nā mea na tuku e folafola e te Atua i he taimi i mua.

⁶ Ko Keliho te Ataliki o te Atua, e fakamāoni i tona tūlaga ko te takitaki o te fale o te Atua. Ko ki tātou ko te fale o te Atua kāfai e tūmau pea to tātou loto mākeke ma te talitonu, ki te mea e fakamoemoe ki tātou ki ei.

He Malōlōga mo nā Tino o te Atua

⁷ Ko te mea ia, e vē oi lea ai te Agaga Paia: “Kāfai e lagona e koutou te leo o te Atua i te aho nei,

⁸ ia koutou nahe loto makaka, e vē ko nā tupuna o koutou i te fakatuikehega ki te Atua, i te aho na ki lātou tofotofoa ai ia i te vao.

⁹ Na tofotofo au e ki lātou i kinā, kua vāgana ai te Atua, e ui lava na ki lātou kitea nā mea na fai e au i nā tauhaga e fahefulu.

¹⁰ Ma ko au na ita ki nā tino iēnā ma na lea vē ai au, ‘Ko nā loto o nā tino iēnei e fakahehēgia pea lava, ko hēki ki lātou iloa nā mea e fofou au ke ki lātou faia.’

¹¹ Ko au na ita ma fai ai taku takutinoga e vēnei: ‘Ka hē pa lele ki lātou ki te nuku na mea e tuku atu ai e au ki a te ki lātou, he malōlōga.’ ”

¹² Koutou la ke mataala te kau uho, kae ke nahe i ei lele he tino o koutou e ia te ia he loto kino ma te hē talitonu, ma liliu kehe ai mai te Atua e ola.

¹³ E tatau koutou ke fakamālohi tētahi ki tētahi i aho takitahi, kae ke nahe i ei ai he tino o koutou e fakahehēgia e te agahala ma maua ai i te loto makaka. Kāfai te kupu “Aho nei” e vē oi tākua i te tuhituhiga paia e fakaaga ki a te ki tātou, e tatau la ke fai pea lava tēnei mea e tētahi ki tētahi.

¹⁴ Auā ko ki tātou uma e gālulue fakatahi ma Keliho, pe kāfai to tātou talitonu nae i ei i te kāmataga, e tūmau pea lava ke pa ki te ikuga.

¹⁵ Ko tēnei te mea e tūhia i te tuhituhiga paia: “Kāfai e fakalogo koutou ki te leo o te Atua i te aho nei, koutou nahe loto makaka, e vē ko nā tupuna o koutou i te fakatuikehega ki te Atua.”

¹⁶ Ko ai nā tino na ki lātou lagona te lea o te Atua ma fakatuikehe ki ei? Ko ki lātou uma lele na takitaki ki fafo mai Aikupito e Mohe.

¹⁷ Ko ai te nae ita ki ei te Atua i nā tauhaga e fahefulu? Nae ita ki nā tino nae faia te agahala ma na mamate i te vao.

¹⁸ I te faiga o te tautōga tēnei a te Atua, “Ka hē pa lele ki lātou ki te nuku na mea e tuku atu ai e au ki a te ki lātou he malōlōga” — ko ai te na fai agai ki ei? Na fai ki nā tino na fakatuikehe.

¹⁹ Kua kitea la e ki tātou, e hēki mafai ki lātou ke pa ki te nuku, ona e hēki talitonu.