Epelu 13 - Tokelauan New Testament

Ko te Mea e Fiafia ki ei te Atua

¹ Ke tūmau pea te alofa o tētahi ki tētahi e vē ona tatau ke fai e tagata uma kua mulimuli ki te Aliki.

² Ke mautinoa e talia e koutou nā tino kehe ki loto o outou fale. E i ei nā tino na ki lātou faia te mea tēnei ma ki lātou talia ni agelu, kae hē ki lātou iloa.

³ Ke manatua e koutou nā tino i te falepuipui, e vē lava koutou ni tino nae i te falepuipui ma ki lātou. Ke manatua nā tino puapuagā e vē lava ko koutou ni tino nae puapuagā e vē ko ki lātou.

⁴ Ke fakamamalu e koutou uma te āvaga fakaipoipo, ma e tatau te tāne ma te fafine kua fakaipoipo, ke fakamāoni tētahi ki tētahi. Ka fakamahinogia e te Atua nā tino e faia nā āmio kino ma te mulilua.

⁵ Koutou nahe mānumanu ki te tupe, kae talia ma te fiafia nā mea kua maua e koutou. Auā kua vāgana te Atua, “E hē kō tukua lele koutou; ka hē kō tiakia lele koutou.”

⁶ Tātou fakamākeke la ma lea vē, “Ko te Aliki ko toku fehoahoani ia, ko au ka hē mataku. He ā ta he tino e mafai ke fai mai ki a te au?”

⁷ Māfaufau ki nā takitaki muamua o koutou kua momoe atu, iēia na ki lātou fakailoa atua te kupu a te Atua ki a te koutou. Māfaufau ki o lātou ōlaga ma pe na vēhea ona feoti, ma fakatakitaki ki to lātou fakatuatua.

⁸ Ko Iehu Keliho e tutuha lava i te aho ananafi, te aho nei, ma ke pa lava ki te fakavavau.

⁹ Ia koutou nahe takitaki kehea mai te auala moni ona ko te mau akoakoga kehekehe. E lelei te maua o te loto mākeke mai te alofa tūnoa o te Atua, kae hē mai te uhitaki ki nā tūlāfono e uiga ki nā meakai; ko nā tino e uhitaki ki nā tūlāfono iēnei e hēki ki lātou mauagia he fehoahoani ona ko to lātou uhitaki ki ei.

¹⁰ Ko nā ohitāulaga e tautua i te Mālumalu o tagata Iutaia, e hēai he lātou aiātatau ke ki lātou kaia ai ho he tāulaga e ofo i luga o te fata faitāulaga.

¹¹ E kaumai e te Ulu Ohitāulaga Iutaia te toto o nā manu ki loto o te Nofoaga e Hili te Paia ke ofo atu ma tāulaga mo nā agahala; kae ko nā tino o nā manu e huhunu i fafo o te mea e nonofo ai ia tagata.

¹² Ko Iehu foki na oti i fafo o te kakai, kae ke fakamamā ai ia agahala a tagata i tona toto.

¹³ Tātou olo foki la ki a te ia i fafo o te kakai, ke fakamātagā fakatahi ai ki tātou ma ia.

¹⁴ Auā e hēai he nuku tūmau mo ki tātou i lalo nei; ko ki tātou e hakilikili ki te kakai e tuku e pa mai.

¹⁵ E tatau ai la ke ofo ake pea lava e ki tātou he tāulaga ki te Atua e ala ia Iehu, he tāulaga e ofo ake i nā laugutu kāfai ki tātou e lea vē, “ko ia ko to tātou Aliki.”

¹⁶ Tautuanā e fai e koutou ni gāluega lelei ma fehoahoani tētahi ki tētahi, auā ko iēnā nā tāulaga e fiafia ki ei te Atua.

¹⁷ Uhitaki ki nā takitaki o koutou ma fai nā mea e fakatonu atu ai koutou. E hē mapu lele ki lātou i te kikilaga o koutou, auā e tatau ke ki lātou tuku atua ki te Atua he fakamatalaga e uiga ki a lātou gāluega tautua. Kāfai koutou e uhitaki ki ei, ka fiafia foki ki lātou i te faiga o te lātou gāluega; kae kāfai koutou e hē uhitaki, ka gālulue foki ki lātou ma te fakanoanoa, ma e hē ko he mea tēnā e lelei mo koutou.

¹⁸ Nahe uma te koutou tatalo mo ki mātou. Ko o mātou lotofuatia e mamā, ma e taumafai lava ki mātou i taimi uma, ke fai te mea e tonu.

¹⁹ Ko au e toe talohaga atu lava ko koutou ke tatalo fakapitoa ki te Atua, ke mafai au ke ia toe uga atua ki a te koutou, i he taimi lata mai.

Tatalo Fakaiku

^20-21 Kua toe fakatū e te Atua to tātou Aliki ko Iehu mai te oti, ko ia ko te Leoleomāmoe Hili, ona ko tona toto kua fakamautū ai te feagaiga ke pa ki te fakavavau. Ke fōki atu ki a te koutou e te Atua o te fīlēmū nā mea lelei uma e manakomia e koutou, kae ke mulimuli ai koutou ki tona finagalo, ma ke fai e ia ki a te ki mātou e ala ia Iehu Keliho, nā mea e fiafia ia ki ei. Ma ke vīkia pea lava ia Keliho ke pa ki te fakavavau! Amene.

Nā toe Kupu

²² Ko au e talohaga atu ki a te koutou te kau uho, ko koutou ke fakalogo lelei ki te fekau tēnei e fakamālohi atu ki a te koutou; auā ko te tuhi tēnei e pukupuku.

²³ Ko au e fofou ke iloa e koutou ko te koutou uho ko Timoteo, kua tatala ki tua mai te falepuipui. Kāfai e vave mai, ka oatu fakatahi ki māua ke kikila koutou.

²⁴ Momoli atu o mātou alofaaga ki nā takitaki o koutou ma tagata uma o te Atua. E momoli atu foki nā alofaaga mo koutou mai nā tino kua talitonu ki te Atua i Italia.

²⁵ Ke ia te koutou uma te alofa tūnoa o te Atua.