Epelu 12 - Tokelauan New Testament

Ko te Atua to Tātou Tamana

¹ Ko te mea ia, ona ko ki tātou e hikomia e he kaifenua tokalahi o tagata e fai ma molimau, tuku kehe la nā mea uma e fai ma fakalavelave ki a te ki tātou, ma te agahala e pipiki mau mai ki a te ki tātou. Kae tātou fētutuli ma te onohai i te tūkuga ei mua nei o ki tātou,

² ma kikila pea ki a Iehu, tē na ia kamatagia ma fakakātoatoagia to tātou fakatuatua mai te kāmataga ki te ikuga. E hēki fakavāivai lele ia Iehu ona ko te hātaulo. Kae ona ko te fiafia e fakatalitali mo ia, e hēki popole lele ai ki te tūlaga takuvalea o te mate i luga o te hātaulo, ma i te taimi nei la, kua nofo i te itū taumatau o te nofoāliki o te Atua.

³ Māfaufau ki nā mea na pa ia ki ei; ki te lava o tona onohai ki faiga fakatauemu a nā tino agahala nae feita lahi ki ei. Koutou la nahe fakavāivai pe loto pala.

⁴ I nā taumafaiga a koutou ke teteke atu ki te agahala, ko hēki pa lele koutou ki te tūlaga e vē kua lamatia ai outou ola.

⁵ Ko koutou nei kua pupuli i nā kupu fakamākeke na vāgana atu ai te Atua ki a te koutou tana fānau? “Taku tama, fakalogo lelei kāfai koe e fakatonu atu e te Aliki, ma ia koe nā fakavāivai kāfai koe e akoaki e ia.

⁶ Auā e fakatonu e te Aliki ki lātou uma e alofa ia ki ei, ma akoaki e ia ki lātou uma e ia talia ni fānau e a ia.”

⁷ Onohai i nā puapuagā e pa koutou ki ei ona ko te akoaki faka-te-tamana; ko nā puapuagā o koutou e iloa ai ko te Atua e kikila ki a te koutou ko he fānau e a ia. Na kua i ei nei he tamaiti e hēki akoakiagia lele e tona tamana?

⁸ Kāfai koutou e hē akoakia lele e vē ko te mea e fai ki tana fānau uma lele, ko tona uiga ko koutou e hē ni fānau moni e a ia, kae ni tama pō.

⁹ E i ei o tātou tamana fakatelalolagi ke akoakia ki tātou, ma ko ki tātou e fakaaloalo ki ei. Ka hē hili atu nei la te tatau ke tuku atu o tātou tagata ke akoaki e to tātou Tamana fakateagaga, ma maua ai e ki tātou te ola!

¹⁰ Ko ki tātou e akoaki e o tātou tamana faka-te-lalolagi mo hina taimi, kāfai e kikila ki lātou e tatau. Kae ko ki tātou e akoaki e te Atua mo te tātou lava lelei, kae ke paia ai ki tātou e vē ko ia.

¹¹ Auā ko te akoakiga e fōliga ko he mea kua fai ke māhiahi ai kae hē ke fiafia ai. Kae i he taimi mulimuli, e maua e ki lātou na akoakia te taui, ko te ola i he ōlaga e fīlēmū ma āmiotonu.

Fakatonuga ma Apoapoakiga

¹² Ko te mea ia, tutū hako loa ki luga ma ke nahe tete outou tulivae!

¹³ Havavali pea lava i nā auala hahako, kae ke nahe mate ai te vae e faitauale kae ke mālōlō ai.

¹⁴ Taumafai ke maua te fīlēmū i te va o koutou ma iētahi tino uma lele, ma taumafai oi ola e vē ko nā tino kua ofo atu o lātou tagata mo te Atua, auā e hēai he tino e mafai ke kikila ki te Aliki kāfai e hē ia faia te mea tēnei.

¹⁵ Tautuanā e hēai he tino e liliu kehe mai te alofa tūnoa o te Atua. Nahe i ei lele he tino e vē he lākau kona e tupu ake ma fai ma fakafītāuli ona ko tona kona.

¹⁶ Nahe i ei lele he tino e fai āmio mātagā pe hē fakaaloalo ki nā mea e paia e vē ko Ehau, tē na fakafehuiaki e ia tona tofi ko ia ko te ulumatua, mo he meakai e fokotahi.

¹⁷ Auā e koutou iloa, i he taimi mulimuli ake, na fofou ke ia mauagia te fakamanuiaga a tona tamana; kae e hēki mafai te mea tēnei, ona e hēki ia maua he auala ke toe hui ai tana mea na fai, e ui lava nae hakili e ia ma te tagi.

¹⁸ Ko koutou e hēki ōmamai e vē ko te ōmamaiga o tagata Ihalaelu ki te mea e mafai ke iloa e ala i nā lagonaga ki te tino; ki te Mauga o Hinai ma te afi mumū, te pōgihā ma te kaupōuli, ma te matagi mālohi,

¹⁹ te tatagi o te pu ma te leo o he tino. I te lagonaga e tagata o te leo, na fakatagi ai ke nahe toe fakalogo lele ki lātou ki hētahi kupu e fokotahi,

²⁰ auā e hē fia fakalogo ki lātou ki te fakatonuga na lea vē mai, “E tuha lava pe ko he manu e paki ki te mauga, e tatau te manu tēnā ke fetogi i nā fatu ke mate.”

²¹ Ko te mea na tutupu i te Mauga o Hinai na matuā fakamātakutaku lele ma na lea vē ai ia Mohe, “Ko au e tete i te mataku.”

²² Kae ko koutou kua ōmamai ki te Mauga o Hiona, ma ki te kakai o te Atua e ola, te Ieluhalema i te lagi, fakatahi ma te afe ma afe o agelu.

²³ Ko koutou kua ōmamai ki te fakatahiga fiafia a nā ulumatua a te Atua, iē kua tūhia o lātou igoa i te lagi. Ko koutou kua ōmamai ki te Atua, ko ia ko te fakamahino o tagata uma, ma ko kinei foki te fakalelei kātoatoa ai ia agaga o nā tino e faia nā mea e tonu.

²⁴ Ko koutou kua ōmamai ki a Iehu, tē na ia tapenagia te feagaiga fou, ma ki te toto fakamaligi e maua ai nā mea e hili atu te lelei i lo te toto o Apelu.

²⁵ Tautuanā la ma koutou e hē koutou tetekeagia te tino tēia e tautala. Ko nā tino nae teteke ki te tino na kaumaia ki te lalolagi te fekau mai te lagi, e hēki fakahaoa. Ka hē hili atu nei la te hē mafai ona fakahaogia o ki tātou, kāfai ki tātou e teteke ki te tino e tautala hako ifo mai te lagi ki a te ki tātou?

²⁶ Ko tona leo na lūlū ai te lalolagi i te taimi tēnā, kae i te taimi nei kua uma te fai o tana folafolaga e vē, “Ka toe lūlū tahi e au e hē gata ko te lalolagi kae e vēnā foki te lagi.”

²⁷ Ko te uiga o nā kupu “lūlū tahi” e fakailoa manino mai ai, ko nā mea uma lele na gaohia ka lūlūgia ma kave kehe, kae ke tūmau ai pea nā mea e hē mafai ke lūlūgia.

²⁸ Ko ki tātou la e tatau ke fakafetai, auā e maua e ki tātou he mālō e hē mafai ke lūlūgia. Tātou fakafetai ma tāpuaki ki te Atua i he auala e fiafia ai ia, ma e mamalu lahi ma i ei te mataku;

²⁹ auā ko to tātou Atua e vē he afi e fakaumatia kātoatoa ai.