Epelu 10 - Tokelauan New Testament

¹ Ko nā Tūlāfono Iutaia, e hē he ata fakatuha moni tēnā o te tūlaga hako e i ei nā mea iēnei, kae kua nā he ataata o nā mea lelei e tuku e pa mai. Ko nā tāulaga lava iēnā e ofo pea lava i tēia tauhaga ma tēia tauhaga. E mafai vēhea la e te Tūlāfono, e ala i nā tāulaga iēnā, ke ia fakakātoatoagia te lelei o nā tino e ōmamai ki te Atua?

² Anei nā tino e tāpuaki ki te Atua na fakamamāgia moni mai a lātou agahala, e vēnei ake kua hē toe popole o lātou loto ki te agahala, ma hē toe faiagia ni tāulaga.

³ Kae ko te mea e i ei nei, ko nā tāulaga e ofo ake i tauhaga uma, kua fai ma mea ke fakamanatu ai ki tagata a lātou agahala.

⁴ Auā ko te toto o nā povi ma nā oti, e hē mafai ke kave keheagia nā agahala.

⁵ Ko te mea ia na lea vēnei atu ai ia Keliho ki te Atua i te taimi kua lata ai ki tona haele mai ki te lalolagi, “Ko koe e hē fofou ki nā tāulaga ma nā meaalofa, kae kua hāunia e koe he tino mo ōku.

⁶ Ko koe e hē fiafia ki nā manu e mu kātoa i luga o te fata faitāulaga pe ko nā tāulaga ke kave kehea ai nā agahala.

⁷ Oi lea vē ai au, ‘Tēnei au, ke faia tō finagalo te Atua, e vē lava oi tūhia e uiga ki a te au i te tuhi o nā Tūlāfono.’ ”

⁸ Na lea muamua vē ia Keliho, “Ko koe e hē fofou ma hē fiafia ki nā tāulaga ma nā meaalofa, pe ko nā manu e mu i luga o te fata faitāulaga, ma nā tāulaga ke kave kehe ai nā agahala.” Na lea vēnei, e ui lava ko nā tāulaga uma lele, e ofo ake ki te Atua e tuha ai ma te Tūlāfono.

⁹ Oi lea vē ai, “Tēnei au, te Atua, ke faia tō finagalo.” Oi fakahēaogā ai e te Atua nā tāulaga uma nae fai muamua, kae hui ki ei te tāulaga ko Keliho.

¹⁰ Ona na fai e Iehu Keliho te mea na fofou ki ei te Atua, kua fakamamāgia uma ai ki tātou mai te agahala, e ala i te tāulaga na ia ofo atu ai tona lava tino i te taimi lava tēnā e fokotahi, mo tagata uma.

¹¹ Ko nā ohitāulaga Iutaia uma lele e fakatino a lātou gāluega i aho takitahi, ma ofo ake fakafia te tāulaga lava e fokotahi; kae e hē mafai e nā tāulaga iēnei ke kave kehea nā agahala.

¹² Kae e fokotahi lava te tāulaga na ofo ake e Keliho mo nā agahala, he tāulaga e aogā pea lava ke pa ki te fakavavau, ma na nofo ai loa i te itū taumatau o te Atua.

¹³ I kinā e fakatalitali ai ke tuku e te Atua nā tino e fili ki a te ia, ke vē he nofoa ke tuku ki luga ona vae.

¹⁴ Ko te tāulaga la tēnā e fokotahi, kua ia fakakātoatoa ai te lelei o ki lātou kua fakamamāgia mai te agahala, ke pa ki te fakavavau

¹⁵ Ma kua fakamāonia foki e te Agaga Paia ki a te ki tātou. Muamua e lea vē,

¹⁶ “Ko tēnei te feagaiga ka kō faia ma ki lātou i nā aho e hau, kua vāgana te Aliki: Ka tuku e au aku tūlāfono ki o lātou loto ma tūhia ki o lātou māfaufau.”

¹⁷ Oi lea ai vē, “Ka hē toe kō manatua a lātou agahala ma a lātou āmio kino.”

¹⁸ Kāfai la nā mea iēnei kua uma te fakamāgalo, kua hē i ei la he mea e tatau ai ke toe fai ni tāulaga ke kave kehea nā agahala.

Tātou Fakatafapili ki te Atua

¹⁹ Kua ia te ki tātou la, te kau uho, te haolotoga ke olo ai ki loto o te Nofoaga e Hili te Paia, e ala i te mate o Iehu.

²⁰ Na tatala mai e ia mo ki tātou he auala fou, he auala e kui ki te ola, kui atu i te kie pupuni — ko tona uiga, e ala i tona lava tino.

²¹ Kua i ei to tātou ohitāulaga tāua e pule i te fale o te Atua i te lagi.

²² Ko te mea ia, tātou olo fakatafapili ki te Atua ma te agaga talitonu moni ma te lotofuatia kino kua fakamamāgia, vēnā ma o tātou tino kua uma te fakatākekele i te vai mamā.

²³ Tātou tāofi mau ki te fakamoemoe kua folafola e ki tātou, auā e ki tātou mautinoa ko te Atua e tauhi ki tana folafolaga.

²⁴ Tātou tau fakamālohi tētahi ki tētahi, ke tupu ai te alofa ma ke fai ai ni gāluega lelei.

²⁵ Ki tātou nahe fakavāivai oi māfuta i nā fono māhani, e vē oi fai e iētahi tino. Kae ke fakamālohi ātili tētahi ki tētahi, auā kua iloa e koutou ko te Aho o te Aliki kua tafapili lele mai.

²⁶ Auā kāfai e fai pea lava e ki tātou te agahala ma te mautinoa ka kua uma ai te fakailoa mai o te meamoni ki a te ki tātou, kua hē toe i ei la hētahi tāulaga ke kave kehea ai nā agahala.

²⁷ Kae oioti lava te mea ko te fakatalitali ma te mataku, ke pa mai te Fakamahinoga ma te afi kakaha e fakaumatia ai ki lātou e teteke ki te Atua.

²⁸ Ho he tino e holia te Tūlāfono a Mohe, e tāmate e aunoa ma he alofa fakahao, pe kāfai kua hala i te molimau a ni tino e toka lua pe hili atu.

²⁹ He ā la te mea e pa ki ei ki lātou e teteke ki te Ataliki o te Atua? ki lātou e manatu māmā ki te toto o te feagaiga a te Atua e fakamamā ai ki lātou mai te agahala? ki lātou e tauemu ki te Agaga e hau ai te alofa tūnoa? Māfaufau ki te kino lahi lele o te fakahalaga ka pa ki lātou ki ei!

³⁰ Auā e ki tātou iloa ko te Atua na lea vē, “Ko au te faia te taui-ma-hui, ka toe totogi atu e au autou mea hehē na fai”; ma na lea vē foki, “Ko te Aliki ka ia fakamahinogia ona tagata.”

³¹ Ko he mea e matuā fakamātakutaku lele, kāfai he tino e i lalo o te pule a te Atua ola!

³² Māfaufau ki te tūlaga nae i ei koutou i nā aho kua teka. I nā aho iēnā, kua uma ai te huhulu atu o te mālamalama o te Atua ki a te koutou, e lahi nā mea nae pagātia ai koutou, kae ko koutou nae onohai lava.

³³ E i ei nā taimi nae fakamātagā ma fakahāuāgia ai koutou i mua o tagata, ma e i ei foki iētahi taimi nae fiafia lava koutou oi olo ke puapuagā fakatahi koutou ma nā tino nae fai ki ei nā faiga iēnei.

³⁴ Nae puapuagā fakatahi koutou ma nā tino nae falepuipui, ma i te kave fakamālohiga o autou meatōtino, na talia ma te fiafia e koutou, auā na iloa e koutou koi i ei lava ia te koutou nā mea e hili atu te tāua, ni mea e tūmau pea lava ke pa ki te fakavavau.

³⁵ Nahe uma te lototele ia te koutou, auā e maua e koutou he taui lahi.

³⁶ E tatau koutou ke onohai, kae ke fai ai e koutou te finagalo o te Atua, ma maua ai e koutou nā mea kua uma te folafola e ia.

³⁷ Auā e vē oi tākua i te tuhituhiga paia, “I he taimi kua hē mataloa, ko tē e haele mai ka haele mai; ka hē toe fakatali ia.

³⁸ Kae ko nā tino o oku e āmiotonu, ka talitonu ma ola; kae kāfai he tino o ki lātou e toe liliu kehe ma au, ko au la ka hē fiafia ki a te ia.”

³⁹ Ko ki tātou e hē ni tino e toe liliu kehe ma fakaumatiagia. Kae ko ki tātou e talitonu ki te Atua, ma e fakaolagia.