Epelu 1 - Tokelauan New Testament

Ko te Kupu a te Atua e ala i tona Ataliki

¹ I nā aho kua leva, ko te Atua na tautala ki o tātou tupuna e ala i nā pelofeta. Na ia faia te mea tēnei i ni auala kehekehe e lahi, ma i ni taimi kehekehe.

² Kae i nā toe aho iēnei, kua tautala mai te Atua ki a te ki tātou e ala i tona Ataliki. Na gaohia e te Atua te lagi ma te lalolagi e ala i tona Ataliki, tē kua ia tōfiagia ke fai ma ona tofi nā mea uma iēnei.

³ E kitea e ala i te Ataliki te uiga kehe o te mamalu o te Atua, ma e fōliga tutuha lelei lava ia ma te Atua, ma ko te mamana o tana kupu e tūmau ai pea nā mea i te lagi ma te lalolagi. I te kua uma o te fakamamāga e ia o agahala a te lalolagi, oi nofo ai ki lalo i te itū taumatau o te Tupu Hilihilikehe.

Ko te Ataliki o te Atua e Hili atu te Tāua

⁴ Ko te Ataliki e hili atu tona tāua i lo nā agelu, e vē foki lava oi hili atu te tāua o te igoa na fakaigoa ai e te Atua i lo ho he igoa o te kau agelu.

⁵ Auā ko te Atua e hēki lea lele vēnei ki hētahi o ana agelu, “Ko koe ko toku Ataliki i te aho nei ko au kua kavea ma o Tamana.” E hēki lea foki te Atua vēnei e uiga ki hana agelu, “Ko au ka kavea ma ona Tamana ma ka kavea ia ma oku Ataliki.”

⁶ Kae i te kua hāuni ka uga mai e te Atua tona Ataliki ki te lalolagi, na lea vēia, “Ko nā agelu uma a te Atua e tatau ke ifo ki a te ia.”

⁷ Kae e uiga ki nā agelu, na lea vē te Atua, “E fai e te Atua ana agelu e vē ni matagi, ma ana kaukauna ke vē ko te mumū o he afi.”

⁸ Kae e uiga ki tona Ataliki, na lea vē te Atua, “Ko tō Mālō, te Atua, ka tūmau pea lava ke pa ki fakavavau fakavavau lava! E pule e koe nā tino o koe ma te āmiotonu.

⁹ Ko koe e fiafia ki te mea e tonu kae inoino ki te mea e hehē. Ko te mea ia kua filifilia ai koe e te Atua, tō Atua ma kua ia fōki atua ki a te koe he mamalu e fiafia ai koe e hili atu i lo te mamalu kua ia fōkia ki nā hoa o koe.”

¹⁰ Na lea foki vē, “Ko koe te Aliki, na kē gaohia te lalolagi i te kāmataga, ma fai i ō lava lima te lagi.

¹¹ Ko nā mea iēnei e fano e mou kehe atu, kae ko koe e tūmau pea lava; e fano e gatu ki lātou e vē ko nā lākei.

¹² Ka fetufetu e koe ki lātou e vē he peleue, ma ka fai ma tahuihui ki lātou e vē ko nā lākei. Kae ka hēai lele he hūiga e pa ki a te koe, ma ko koe ka ola pea lava.”

¹³ E hēki lea lele te Atua ki hana agelu: “Nofo i toku itū taumatau ke pa ki te taimi e kō faia ai ō fili ma nofoa e mapu ki luga ō vae.”

¹⁴ Ko nā agelu la ni a? Ni agaga e tautua ki te Atua ma e uga atu e ia ke fehoahoani ki nā tino ka fakaolagia.