Efeho 6 - Tokelauan New Testament

Fānau ma Mātua

¹ Koutou te fānau, ko he tiute faka-Kelihiano e o koutou te uhitaki ki outou mātua, auā ko te mea tonu lava tēnā e tatau ke koutou faia.

² “Āva ki tō tamana ma tō mātua” ko te fakatonuga muamua ia kua i ei te folafolaga e fakaopoopo ki ei:

³ “kae ke lelei ai ia mea uma mo koe, ma fakaloaloa ai tō ola i te lalolagi.”

⁴ Ko koutou tamana, nahe koutou tautala pe faia ni mea e fakatupu ai te loto ita o te fānau ki a te koutou. Kae tauhi ma akoako i nā fakahinoga faka-Kelihiano.

Pologa ma Matai

⁵ Ko koutou pologa, uhitaki ki outou matai fakatetino i te mataku ma te gatete; fai te mea tēnei ma te loto fakamāoni moni, e vē lava ko koutou e kaukauna ki a Keliho.

⁶ Nahe koutou faia oioti kāfai e kikila atu, kae ke fiafia atu ai ki a te koutou; kae fai ma te loto kātoatoa, koutou nā pologa a Keliho, te mea e finagalo ki ei te Atua.

⁷ Fakatino autou gāluega ma te loto fiafia, e vē lava ko koutou e kaukauna ki te Aliki, kae hē nā ki tagata oioti.

⁸ Ke manatua e koutou, pe ni pologa ki tātou pe hēai, ka fōki mai e te Aliki ki a te ki tātou tau tokatahi te taui, mo a tātou gāluega lelei uma e fai.

⁹ Ko koutou matai, ke vēnā foki autou faiga ki autou pologa, ma nahe faia ni faiga ke fakamataku ai ki lātou. Ke manatua e koutou, ko koutou ma autou pologa, e a te Matai lava e fokotahi i te lagi, ma e hē fakapito ia ki he tino.

Nā Kofutau Kātoatoa o te Atua

¹⁰ Ko te toe mea e lea atu ai au, koutou ke fakamākekeke i te māfutaga a koutou ma te Aliki, e ala i tona mana hilihili kehe.

¹¹ Kokofu i nā kofutau kātoatoa uma e fōki atu e te Atua, kae ke koutou mafaia ai oi teteke atu ki nā togafiti kino a te Tiāpolo

¹² Auā ko ki tātou e hē tau ma tagata, kae ko ki tātou e fakahaga tau ki nā pūlega kino fakateagaga i te lagi, ki nā tupu, nā taupulega, ma nā mālohiaga i te vāteatea o te tupulaga pōgihā tēnei.

¹³ Ko te mea ia, kokofu loa i te kofutau kātoatoa o te Atua! Kāfai la e pa mai te aho kino, e koutou mafaia oi teteke atu nā ohofakiga a te fili, ma kāfai e uma te tau o koutou ke pa ki te ikuga, ka hē māluelue lele te koutou tutū.

¹⁴ Tutū la ma hāuniuni! Ke kavea te kupu moni ke vē he fuhipaku e fuhi ai outou taugātiti, ma te āmiotonu ke vē he talipupuni fatafata mo koutou,

¹⁵ ma ke kavea te koutou naunau ke tālaki te Tala Lelei o te fīlēmū, ke vē ko nā hēvae i outou vae.

¹⁶ Ke kavea te koutou fakatuatua ke vē he talipupuni i taimi uma; auā ko te talipupuni tēnei e mafai ai e koutou oi titina nā āū mumū uma e tafana e te Tiāpolo.

¹⁷ Ma ke kavea te fakaolataga ke vē he pūloutau, ma te kupu a te Atua ke vē ko te pelu e tuku atu ki a te koutou e te Agaga.

¹⁸ Fai nā mea uma iēnei i te tatalo, e gogō atu ai ki te fehoahoani a te Atua. Tatalo i taimi uma ma mulimuli ki te mea e lea atu ai te Agaga. Ko te mea la ia, koutou ke mataala ma nahe fakavāivai lele, kae tatalo pea lava mo tagata uma o te Atua.

¹⁹ Tatalo foki mo oku, ke tuku mai e te Atua ki a te au he fekau kāfai au kua lava hāuni ke tautala, kae ke tautala ai au e aunoa ma he mataku, ke fakailoa ki tagata te mea lilo e uiga ki te Tala Lelei.

²⁰ Ko au na uga mai ke fakatino te gāluega tēnei, ma ko te māfuaaga ia kua falepuipui ai au. Tatalo ke maua e au te lototele kāfai au e tautala e uiga ki te Tala Lelei.

Nā toe Kupu

²¹ Ko Tuhiko, to mātou uho pele ma ko he kaukauna fakamāoni i te gāluega a te Aliki, ka maua ai e koutou nā fakamatalaga uma e uiga ki a te au, kae ke koutou iloa ai te tūlaga e i ei ai au.

²² Ko te mea ia kua uga atu ai e au ki a te koutou — ke fakailoa atu te tūlaga e i ei ki mātou uma i kinei, ma ke fakamālohi atu ki outou loto.

²³ Ke maua e te kau uho Kelihiano uma te fīlēmū vēnā te alofa ma te fakatuatua mai te Atua te Tamana ma te Aliki ko Iehu Keliho.

²⁴ Ke ia te koutou uma e alolofa pea lava ki to tātou Aliki ko Iehu Keliho, te alofa tūnoa o to tātou Atua.