Efeho 5 - Tokelauan New Testament

Ola i te Mālamalama

¹ Ona ko koutou ni fānau fakapelepele e a te Atua, e tatau ai koutou ke taumafai ke vē koutou ko ia.

² E tatau nā ōlaga o koutou ke pūlea e te alofa, e vē ko te alofa o Keliho ki a te ki tātou ma na fōki ai tona ola mo ki tātou, ke fai ma tāulaga manogi e fiafia ki ei te Atua.

³ Ko koutou ni tagata e o te Atua, e hē tatau lele la ke tākua i autou talatalanoaga nā uiga tuinanau ki te tino, pe ko nā uiga mātagā, pe ko te manako lahi.

⁴ E hē tatau foki ke fakaaogā e koutou ni kupu kino, pe ni tala valea, pe ni kupu palapalā. Kae e tatau koutou ke fakafetai ki te Atua.

⁵ Ke mautinoa e koutou iloa te mea tēnei; e hēai he tino e faia ni uiga tuinanau ki te tino, pe ni uiga mātagā pe manako lahi (auā ko te manako lahi e tuha lava kua ifo ki tupua), e maua hona vāega o te tofi i te Mālō o Keliho vēnā ma te Atua.

⁶ Ia koutou nahe fakahehēa e he tino i ni kupu e hēai ni uiga; ko nā mea iēnei te ka pakū ai te tōkahā o te Atua ki luga o ki lātou e hē uhitaki ki a te ia.

⁷ Koutou la nahe fakapipiki ki nā tino vēnei.

⁸ Ko koutou foki nae māhani oi ola i te pōuliuli, kae talu lava te kavea o koutou ma tagata o te Aliki, ko koutou kua i te mālamalama. Ko koutou la e tatau ke ola e vē ko nā tino o te mālamalama,

⁹ auā ko te mālamalama te kaumaia te helehelega o nā itūkāigā lelei uma lele, te āmiotonu ma te meamoni.

¹⁰ Taumafai ke iloa e koutou te mea e fiafia ki ei te Aliki.

¹¹ Ia koutou lele nahe kau ki nā mea e hēai he uiga e fai e tagata; nā mea e fai i te pōuliuli. Kae kaumai ki fafo ki te mālamalama.

¹² (Ko he mea e fakamā lele ke tautala e uiga ki nā mea e fai munimuni e ki lātou.)

¹³ Ma kāfai nā mea uma e kaumai ki fafo ki te mālamalama, oi ka kitea lelei ai o lātou uiga moni;

¹⁴ auā ho he mea e kitea manino e fai tēnā ma mālamalama. E vē oi tūhia, “Ala ake koe tēnā e moe, ma tū ki luga mai te mate, ma ka huhulu atu te mālamalama o Keliho ki a te koe.”

¹⁵ Kikila lelei la pe ko he ā te itūkāigā ōlaga e ola ai koutou. Koutou nahe ola e vē ko nā tino e hē iloa he mea, kae ola e vē ko nā tino popoto.

¹⁶ Fakaaogā lelei nā avanoa uma e maua e koutou, auā ko nā aho iēnei ni aho kino.

¹⁷ Koutou la nahe vālelea, kae taumafai oi hakilikili pe he ā te fofou te Aliki ke fai e koutou.

¹⁸ Koutou nahe konanā i te uaina, auā nā ko te fakakino ai o koutou; kae ko koutou e tatau ke fakatumu i te Agaga.

¹⁹ Tautala tētahi ki tētahi i nā kupu o te Halamo, i nā pehe lotu ma i nā pehe fakateagaga; pepehe atu i nā vīkiga ki te Aliki ma outou loto kātoatoa.

²⁰ Ke fakafetai pea lava koutou ki te Atua te Tamana mo nā mea uma lele, i te igoa o to tātou Aliki ko Iehu Keliho.

Fafine ma a Lātou Tāne

²¹ Ke tuku atu kātoatoa tētahi ki te pule a tētahi ona ko te koutou fakaaloalo lahi ki a Keliho.

²² Koutou fafine, tuku atu koutou kātoatoa ki te pule a autou tāne, e vē ona koutou faia ki te Aliki.

²³ Auā ko te tāne e ia te ia te pule ki tana āvaga, e vē foki lava ona ia Keliho te pule ki te Ekalehia, tona tino, ma ko ia foki lava ko te Fakaola.

²⁴ Ko te mea ia e tatau ai nā fafine ke tuku atu kātoatoa ki lātou ki a lātou tāne, e vē foki lava oi tuku atu kātoatoa te Ekalehia ki a Keliho.

²⁵ Koutou tāne, alolofa ki autou āvaga e vē foki lava oi alofa ia Keliho ki te Ekalehia, ma na ia tuku atua ai tona ola mo te Ekalehia.

²⁶ Na ia faia te mea tēnei ke fakapaia ai te Ekalehia mo te Atua e ala i tana kupu (ka kua uma ai te fakamamāgia e ia i te vai),

²⁷ kae ke ia tukulima atu ai te Ekalehia ki a te ia lava, i tona gali kātoatoa — e mamā ma hēai he hehē, e hēai he ila pe he mafenu, pe ko hētahi lava mea e hē kātoatoa te lelei.

²⁸ E tatau ia taulelea ke alolofa ki a lātou āvaga, e vē foki lava oi alolofa ki lātou ki o lātou lava tino. Ko te tino e alofa ki tana āvaga, e alofa ki a te ia lava.

²⁹ (E hēai he tino e inoino ki tona lava tino, kae e ia fafaga ma tauhi lelei ki ei, e vē foki lava oi fai e Keliho ki te Ekalehia,

³⁰ auā ko ki tātou ni vāega e o tona tino).

³¹ E vē oi lea mai te tuhituhiga paia, “Ko te mea ia ka tukua ai e te taulealea tona tamana ma tona mātua, kae nonofo fakatahi ma tana āvaga, ma kavea ai ki lāua e toka lua ma tino e tahi.”

³² Ko te mealilo tēnei kua fakaalia e ala i te tuhituhiga paia, e matuā loloto lava te uiga. I toku mālamalama, e fakatatau ki a Keliho ma te Ekalehia.

³³ Kae e fakatatau foki ki a te koutou: ko tāne tau tokatahi uma e tatau ke alolofa ki a lātou āvaga, ma e vēnā foki ia fafine tau tokatahi uma, e tatau ke āva ki a lātou tāne.