Efeho 4 - Tokelauan New Testament

Ko te Tukufakatahiga o te Tino o Keliho

¹ Ko au la, tē kua kavea ma pagotā ona ko au e tautua ki te Aliki, e fakatagi atu ki a te koutou: ola ko i he ōlaga e talafeagai ma te tāua o te kalaga kua kalagagia ai koutou e te Atua.

² Ke maua pea koutou i taimi uma i te lotomaulalo, te agamalū, ma te onohai. Fakaali te koutou alofa e ala i te talia o nā uiga o tētahi e tētahi.

³ Ko te Aliki te kua maua ai e koutou te tahi. Taumafai la ki te mea e gata ai te koutou mafai, ke tūmau pea te tahi o koutou. Ko te auala e mafai ai te mea tēnei, ko te fuhia fakatahi o koutou i te fīlēmū.

⁴ E tahi te tino ma tahi te Agaga, e vē foki lava oi tahi te fakamoemoe kua kalagagia ai koutou e te Atua.

⁵ E tahi te Aliki, tahi te talitonuga, tahi te papatihoga;

⁶ e tahi te Atua ma te Tamana o ki tātou uma, ko ia te Aliki o tagata uma, e galue i loto o tagata uma, ma e i loto o mea uma.

⁷ Ko te alofa tūnoa kua fōki mai e te Atua ki a te ki tātou tau tokatahi e vē foki lava ko te lahi o te meaalofa a Keliho ki a te ki tātou.

⁸ E vē oi lea mai te tuhituhiga paia, “I te fanakega o ia ki te mea e pito hili ona maualuga, na takitaki kehe e ia nā pagotā e tokalahi; ma fōki nā meaalofa ki tagata.”

⁹ He ā la te uiga o te fakakupuga, “fanakega o ia?” Ko tona uiga ko Keliho na mua fanaifo ki lalo ki te lolotoga o te kelekele.

¹⁰ Ko te tino la na fanaifo ki lalo ko ia foki lava te na fanake ki luga ki te lagi pito hili te maualuga, ke fakatumu kātoatoa ai te vānimonimo i tona i ei.

¹¹ Ko ia te na ia “fōkia nā meaalofa ki tagata”; na ia tōfiagia iētahi ke kavea ma apohitolo, ko iētahi ma pelofeta, ko iētahi ma tino tālaki, ko iētahi ma faifekau ma iētahi ma faiakoga.

¹² Na fai e ia te mea tēnei ke hāunia ai ia tagata uma o te Atua mo nā gāluega faka-Kelihiano, kae ke ati ake ai te tino o Keliho.

¹³ Oi ko ki tātou la ka fuhia fakatahi ke fai ma tino e tahi i to tātou talitonuga ma to tātou iloa o te Ataliki o te Atua; ka kavea ki tātou ma tagata kua kātoatoa te mātutua i to tātou talitonu ki te Atua, e vē foki lava ko Keliho.

¹⁴ Ka hē toe vē ki tātou ni tamaiti e fetolifaki e nā galu ma pūhia holo i matagi vale o nā akoakoga a nā tino faitogafiti kino, iē e ki lātou takitakia iētahi tino ki te mea hehē, e ala ia lātou togafiti popoto.

¹⁵ Kae ko ki tātou e tatau ke tautatala i te meamoni ma te agaga alofa o tētahi ki tētahi. Ko Keliho ko te ulu o te Ekalehia, e tatau ai la ki tātou ke tuputupu ake ke vē ko ia i ho he itū.

¹⁶ I lalo o tana taukikilaga, ko nā itūtino kehekehe uma o te tino e nofo tonu ma fetaui lelei, ma ko te tino kātoa e tamau fakatahi e nā hokoga takitahi uma kua hāunia e ia. Ko te mea ia, kāfai nā vāega kehekehe takitahi e gālulue e vē ona fuafuagia, ka vēnā foki oi tuputupu ake te tino kātoa ma fano e mālohi e ala i te alofa.

Ko te Ola Fou ia Keliho

¹⁷ I te igoa la o te Aliki e lapataki atu ai au ki a te koutou: koutou nahe toe ola e vē ko tagata fakapaupau ma o lātou manatu e hēai he aogā

¹⁸ ma e pōuliuli o lātou māfaufau. E hēai ho lātou tofi i te ola e fōki mai e te Atua, auā e matuā hē mālamalama lava ma, e loto makaka.

¹⁹ Kua hē ki lātou lagona lele he mā; kua tuku haoloto atu e ki lātou o lātou tino ki nā uiga kino ma itūkāigā faiamio mātagā kehekehe.

²⁰ E hē ko iēnei nā mea na akoako ai koutou e uiga ki a Keliho!

²¹ Ko hēki fakalogo moni nei lava koutou e uiga ki a te ia, ma akoakogia i te meamoni e i a Iehu.

²² Ko te mea ia, tīaki loa outou uiga tuai nae ola ai koutou muamua — nā uiga tuai e fakaumatia ai koutou ona e maua mai ai e koutou nā tuinanauga e fakahehē ai.

²³ E tatau outou loto ma outou māfaufau ke toe fakafougia kātoatoa,

²⁴ ma fakakitea outou tino fou e vē ni kofu fou, iēia e gaohia i te fakatuha o te Atua, ma fakaalia e ala i te ōlaga moni e tonu ma paia.

²⁵ Ko te mea ia, tuku loa te faitala pepelo. Ko ki tātou uma ni vāega e o te tino o Keliho, e tatau la ke tautala te uho Kelihiano ki tētahi ona uho, i te meamoni.

²⁶ Kāfai koutou e ita, nahe kavea te koutou ita ma mea e agahala ai koutou, ma nahe fano te aho kātoa koi ita koutou.

²⁷ Nahe tukua e koutou he avanoa ki te Tiāpolo.

²⁸ Kāfai koe he tino kaihohoa, tuku loa te kaihohoa kae kāmata galue mālohi ke ola koe i au gāluega ma mafai ai koe ke fehoahoani ki nā tino mātitiva.

²⁹ Nahe fakaaogā e koe ni kupu e ogohia ai hētahi tino, kae tautala i nā kupu e mafai ke fehoahoani ke ati ake ma maua ai ni fehoahoaniga, kae ke aogā ai autou kupu ki nā tino uma e fakalogo ki ei.

³⁰ Ma nahe koutou faia he mea ke fakanoanoa ai te Agaga Paia o te Atua. Auā ko te Agaga Paia ko te fakailoga ia a te Atua kua i outou luga e iloa ai ko koutou e a ia, ko he fakailoga mautinoa tēnā e iloa ai ka i ei te Aho ka fakahaoloto ai koutou e te Atua.

³¹ Tīaki te loto tīgā, te loto fekai ma te ita. Nahe toe taukekē pe faikupu fakakino, nahe toe i ei lele ni manatu e fakatupu ai te loto ita.

³² Kae ke agalelei ma loto lelei tētahi ki tētahi, ma fakamāgalo tētahi e tētahi e vē oi fakamāgalo koutou e te Atua e ala ia Keliho.