Efeho 3 - Tokelauan New Testament

Ko te Gāluega a Paulo mo Tagata Nukukehe

¹ Ona ko te mea tēnei, ko au ko Paulo, te pagotā a Keliho Iehu, e tatalo ki te Atua mo koutou tagata nukukehe.

² E talitonu au kua fakalogo koutou ki te alofa tūnoa o te Atua kua ia tuku maia ai ki a te au te gāluega tēnei ke fai, kae ke maua ai e koutou he fehoahoani.

³ Na fakailoa mai e te Atua ki a te au tana fuafuaga lilo i he fakaaliga, e vē lava oi tākua i taku tuhi.

⁴ Kāfai e faitau koutou ki te mea kua tuhi atu ai au, oi ka iloa ai e koutou e uiga ki toku mālamalama ki te mealilo e uiga ki a Keliho.

⁵ I nā aho kua teka, ko te mealilo tēnei e hēki fakailoa ki tagata, kae nei kua fakaalia e te Atua e ala i tona Agaga, ki tana kau apohitolo ma tana kau pelofeta paia.

⁶ Ko te mealilo la ko tēnei. Ona ko Keliho Iehu, kua maua ai e tagata nukukehe he vāega o te tofi na folafola e te Atua ki tagata Iutaia, e ala i te tala lelei. Kua tuku atu foki e te Atua ia tagata nukukehe ke kavea ma vāega o he tino e tahi.

⁷ Ko au na kavea ma kaukauna a te tala lelei e ala i te alofa tūnoa, te meaalofa fōaki fua a te Atua, na ia fakagaluegia i loto ia te au e ala i tona mana.

⁸ E ui lava ko au ko te tino ia e pito hili ona fakatauva i lo tagata uma o te Atua, kae na tuku mai te alofa tūnoa e te Atua ki a te au, ke kō tālakia ki tagata nukukehe e uiga ki nā fakamanuiaga e lahi ma hē mafai oi fuafuagia, e maua ia Keliho

⁹ ma ke fakakikila ia tagata uma ki te fuafuaga lilo a te Atua ma tona fakatinoga. Nae mumuni e te Atua, tē na gaohia ia mea uma, tana fuafuaga lilo mai te kāloā,

¹⁰ kae ke fai ai te Ekalehia i nā aho nei, ma auala ke iloa ai e te kau agelu pule ma mālohiaga i te lagi, te matalahi o te poto o te Atua.

¹¹ Na fai e te Atua te mea tēnei e tuha ai ma tana fuafuaga na fai i te kāmataga, tēia na ia fakataunukua e ala ia Keliho Iehu to tātou Aliki.

¹² Ona ko te hokotaga vāvālalata a ki tātou ma Keliho ma to tātou fakatuatua ki a te ia, kua loto toa ai ki tātou ke oatu ki mua o te Atua ma te mautinoa kātoatoa.

¹³ Ko te mea ia e lea atu ai au ki a te koutou, ia koutou nahe fakavāivai ona ko au e maua i puapuagā mo koutou; ko te mea tēnei e mo te manuia o koutou.

Ko te Alofa o Keliho

¹⁴ Ko au e tōtuli ma tatalo ki te Tamana,

¹⁵ tē e maua ai e kāiga takitahi uma i te lagi ma te lalolagi, o lātou igoa hako.

¹⁶ Ko au e tatalo ki te Atua ke fōki atu ki a te koutou mai te lahi o tona alofa tūnoa, te mālohi e ala i tona Agaga, ke mākekeke ai outou loto;

¹⁷ ma ko au e tatalo ko Keliho ke mau i nā loto o koutou e ala i te koutou fakatuatua. Ko au e tatalo ke mautū lelei te koutou fakavae i luga o te alofa,

¹⁸ kae ke maua ai e koutou fakatahi ma tagata uma o te Atua, te mālohiaga ke iloa ai te lauefa ma te loa, te maualuga ma te loloto, o te alofa o Keliho.

¹⁹ Io, ko au e tatalo ke iloa e koutou tona alofa, e ui lava e hē mafai ke iloa kātoatoa te uiga kehe o tona alofa — ma ke fakatumulia kātoatoa ai koutou i te natula o te Atua.

²⁰ Ki a te ia, tē e galue i loto ia te ki tātou e ala i tona mana, ma faia nā mea e hili lele atu te lahi i lo nā mea e gogō atu ki tātou ki ei, pe māfaufau foki ki ei:

²¹ ke i te Atua nā vīkiga a ala i nā Ekalehia ma Keliho Iehu, i nā aho uma lele, ke pa ki fakavavau fakavavau lava! Amene.