Efeho 2 - Tokelauan New Testament

Mai te Oti ki te Ola

¹ I nā aho kua teka, ko koutou nae ni tino kua feoti i te fakateagaga, ona ko koutou nae hē uhiuhitaki ma fai e koutou te agahala.

² I nā aho iēnā, ko koutou nae mulimuli ki nā uiga kino o te lalolagi; ko koutou nae uhitaki ki te pule o agaga i te vānimonimo, tē e ia pūlea nā tino e hē uhitaki ki te Atua.

³ Ko te mea moni lava, ko ki tātou uma lele nae vē foki lava ko ki lātou. Ko ki tātou nae ola e tuha ai ma o tātou manakoga fakatetagata, ma nae mulimuli ki ho he mea e nanau ki ei o tātou tino ma o tātou māfaufau. I to tātou natula tēnei, ko ki tātou e vē foki lava ko iētahi tino uma lele, na tuku e pa ki ei te tōkahā o te Atua.

⁴ Kae ko te Atua e tumu i te alofa fakahao, ma ko te tūkehe o te lahi o tona alofa mo ki tātou,

⁵ na toe fakaola ai e ia ki tātou fakatahi ma Keliho, e ui lava ko ki tātou na feoti i te fakateagaga. Ko te alofa tūnoa o te Atua te na fakaola ai koutou.

⁶ I te māfutaga a ki tātou ma Keliho Iehu na toe fakatutū ai ki tātou e te Atua ki te ola fakatahi ma Keliho, ma ia fakanonofoa ki tātou i tafa o Keliho, i nā nofoaga i te lagi.

⁷ Na fai e ia te mea tēnei ke fakaalia ai mo taimi uma lele koi mua, te tūkehe o te lahi o tona alofa tūnoa, e ala i te agalelei o Keliho Iehu ki a te ki tātou.

^8-9 Auā ko te alofa tūnoa o te Atua te kua fakaola ai koutou e ala i te fakatuatua. E hē ona ni gāluega e a koutou lava na fai, kae ko he meaalofa mai te Atua kae ke nahe fāfia tauanoa ai he tino.

¹⁰ Ko ki tātou na fai e te Atua ke vē lava ko te tūlaga kua i ei ki tātou, ma i te māfutaga ma Keliho Iehu na gaohia ai ki tātou e te Atua mo he ōlaga o gāluega lelei, tēia kua uma te ia hāunia ke fai e ki tātou.

Ke Tahi ki Tātou ia Keliho

¹¹ Ke manatua ko koutou na fānanau mai ni tagata nukukehe — nae takua “ni tino hē pelitomea” e nā tino Iutaia nae ki lātou takua ki lātou “ni tino kua pelitome” (he mea e fai ki te tino i nā lima).

¹² I te taimi tēnā, ko hēki koutou iloa ai ia Keliho, ma nae hē taua koutou i loto o te faigāmālō o tagata o Ihalaelu, ma hē aofia i loto o nā feagaiga na folafola e te Atua ki a te ki lātou. Ko koutou nae ola i te lalolagi tēnei e aunoa ma he fakamoemoe ma aunoa ma te Atua.

¹³ Kae nei, i te māfutaga ma Keliho Iehu, ko koutou nae mamao ma te Atua ka kua kaumai ke pili ki te Atua e ala i te toto o Keliho.

¹⁴ Auā ko Keliho ko to tātou fīlēmū ia, kua ia tuku fakatahia ia tagata Iutaia ma tagata nukukehe ke kavea ma tagata e tahi. Ko tona tino lava na tukimomo ai ki lalo te pa puipui nae vavae ai ki lātou, ma nae fai ai tētahi ma fili o tētahi.

¹⁵ Na fakahēai e ia te Tūlāfono Iutaia vēnā ma ona fakatonuga ma poloakiga, kae ke mafai ai ke tuku fakatahi ia tagata Iutaia ma tagata nukukehe ke vē he tino e tahi i te māfutaga ma ia, ma maua ai te fīlēmū.

¹⁶ Ko tona mate i luga o te hātaulo na fakauma ai e Keliho nā tauaimihaga; e ala i te hātaulo na ia tuku fakatahia ai ia tagata mai nā fevaevaeakiga ke kavea ai ki lātou ma tino e tahi, ma ke kaumai ki lātou ki te Atua.

¹⁷ Ko Keliho la na hau ma na ia tālakia te Tala Lelei o te fīlēmū ki tagata uma — ki a te koutou tagata nukukehe nae mamao ma te Atua, ma ki tagata Iutaia nae pili ki a te ia.

¹⁸ Ona ko Keliho kua mafai ai ki tātou uma lele, ia tagata Iutaia ma tagata nukukehe, ke oatu i te Agaga e fokotahi ki mua o te Tamana.

¹⁹ Ko te mea la ia, ko koutou tagata nukukehe kua hē toe ni tagata nukukehe pe ni tino kehe. Ko koutou kua fai ma tagatānuku fakatahi ma iētahi uma kua i loto o te kāiga o te Atua.

²⁰ Ko koutou foki, kua fau ake e vē he fale ki luga o te fakavae na tuku ki lalo e te kau apohitolo ma te kau pelofeta, ma ko Iehu Keliho ko te fatu tulimanu.

²¹ Ko ia te tamaua te fale kātoa ke mau, ma ia faua ke kavea ma mālumalu kua fakapaia mo te Aliki.

²² I te māfutaga ma Keliho, ko koutou foki la kua fau ake fakatahi ma iētahi tino uma ke kavea ma mea e nofo ai te Atua e ala i tona Agaga.