Efeho 1 - Tokelauan New Testament

¹ Mai ia Paulo, te apohitolo a Keliho Iehu, na filifilia e te Atua — Ki tagata o te Atua i Efeho, ki lātou e fakamāoni i o lātou ōlaga i te māfutaga fakatahi ma Keliho Iehu.

² Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Fakamanuiaga Fakateagaga e Maua ia Keliho

³ Ke hiki ake fakatahi e ki tātou he fakafetai ki te Atua, te Tamana o to tātou Aliki ko Iehu Keliho. Auā e ala i te tātou hokotaga ma Keliho, kua fakamanuia ai e ia ki tātou i nā fakamanuiagia fakateagaga kehekehe uma mai te lagi.

⁴ Ka ko hēki fakavaea te lalolagi ka kua uma te filifilia o ki tātou e te Atua ke fai mo ia, e ala i te tātou hokotaga ma Keliho, kae ke paia ai ki tātou ma hēai ni hehē i mua o ia. Ona ko tona alofa

⁵ na tonu ai muamua i te Atua, ke fai ki tātou ma ana fānau e auala ia Iehu Keliho — ko te mea tēnei na fiafia ma fofou ia ke fai.

⁶ Tātou viviki atu ki te Atua ona ko tona alofa tūnoa ma te meaalofa fōki fua mai e ia mo ki tātou — ko tona Ataliki fakapelepele.

⁷ Ona ko te mate o Keliho, kua maua ai e ki tātou te haolotoga — ko a tātou agahala kua fakamāgalo. E aloā e tūkehe te alofa tūnoa o te Atua,

⁸ tēia kua fōki mai e ia ki a te ki tātou i ni tūlaga mata lahi vēnei! I tona poto ma tona mālamalama,

⁹ na fakatino ai e te Atua te mea na fofou ia ke fai, ma fakailoa mai ki a te ki tātou tana fuafuaga lilo kua uma te tonu ia te ia ke fakataunuku e ala ia Keliho.

¹⁰ Ko te fuafuaga tēnei, te ka fakatino kātoatoa i te taimi e tatau ai, ka tuku fakatahi ai nā mea uma lele na gaohia i te lagi ma te lalolagi, ma kavea ai ia Keliho ma ulu.

¹¹ Ko nā mea uma e fakatino e tuha ai ma te fuafuaga vēnā ma te finagalo o te Atua; ma kua filifilia ki tātou e te Atua ke fai ma ona tagata i te hokotaga ma Keliho, ona ko te mea lava ia na fofou ia ki ei mai te kāmataga.

¹² Ko ki tātou la iēia na muamua oi tuku atu o tātou fakamoemoe ki a Keliho, keina tātou vīkia te mamalu o te Atua.

¹³ Ma ko koutou foki na kavea ma tagata o te Atua i te lagonaga e koutou te kupu moni — te Tala Lelei na maua ai e koutou te fakaolataga. Ko koutou kua talitonu ki a Keliho, ma kua tuku e te Atua ki outou luga tana fakailoga e iloa ai ko koutou e a ia, e ala i te Agaga Paia kua fōki atu e ia ki a te koutou, e vē oi folafola e ia.

¹⁴ Ko te Agaga, ko te fakamāoniga ia ka maua e ki tātou te mea kua uma te folafola mai e te Atua ki ona tagata, ma e mautinoa ai e ki tātou ka tuku mai e te Atua te haolotoga ki ona tagata. Ke vīkia la e ki tātou tona mamalu.

Ko te Tatalo a Paulo

¹⁵ Ona ko te māfuaaga tēnei, talu lava te lagona e au e uiga ki te koutou fakatuatua ki te Aliki ko Iehu ma te koutou alolofa ki tagata o te Atua,

¹⁶ kua hē uma lele toku fakafetai ki te Atua ona ko koutou. Ko koutou e manatua i aku tatalo

¹⁷ ma ko au e fakatoga ki te Atua o to tātou Aliki ko Iehu Keliho, te Tamana e uiga kehe tona mamalu, ke fōki atu ki a te koutou te Agaga, tē ka maua ai e koutou te mālamalama, ma fakailoa atua ki a te koutou te Atua, kae ke koutou iloa ai ia.

¹⁸ Ko au e talohaga atu ke tatala ko outou māfaufau ke kitea ai e koutou te mālamalama e hau mai ia te ia, kae ke iloa ai e koutou pe ko he ā tonu te fakamoemoe kua kalaga mai ai ki a te koutou, ma te lahi o nā fakamanuiaga gali kua folafola e ia ki ona tagata,

¹⁹ ma te uiga kehe o te lahi o tona mana e galue i loto ia te ki tātou kua talitonu. Ko te mana e galue i loto ia te ki tātou, e tutuha lava ma te mālohi lahi

²⁰ na fakatū ai ia Keliho mai te oti, ma fakanofo ai i tona itū taumatau i te mālō i te lagi.

²¹ E pule ia Keliho i kinā ki nā aliki uma o te lagi, nā taupulega, nā mālō ma aliki; e hili lele atu te maualuga ma te tāua o tona tūlaga, i lo nā tūlaga uma lele i te lalolagi nei ma te ōlaga i mua.

²² Kua tuku e te Atua nā mea uma ki lalo o nā vae o Keliho, ma tuku atu e ia ki te Ekalehia ke kavea ma Aliki hilihili e pule i nā mea uma.

²³ Ko te Ekalehia ko te tino ia o Keliho, ko te kātoatoaga ia o tē e ia fakakātoatoagia ia mea uma lele i ho he mea.