3 Ioane 1 - Tokelauan New Testament

¹ Mai te Toeaina — Ki a Kaio te uō pele, e alofa lahi au ki ei.

² Te uō pele, ko au e tatalo e holoholo lelei pea lava ia mea uma, ma e maua e koe te ola mālōlō lelei — auā e iloa e au ko koe e mālōlō lelei i te fakateagaga.

³ Ko au na fiafia lahi lele i te taunuku maiga o ni uho Kelihiano, ma ki lātou molimaugia te pipiki o koe ki te meamoni — e vē lava ona ola ai koe i aho uma, i te meamoni.

⁴ E hēai he mea e hili atu ona fiafia ai au i lo toku fakalogo atu ko taku fānau e ola i te meamoni.

Ko he Fakamālō ki a Kaio

⁵ Te uō pele, e aloā koe e fakamāoni ki au gāluega e fai mo iētahi tino Kelihiano, e ui lava ni tino e hē kē iloa.

⁶ Na ki lātou fakailoagia ki te Ekalehia i kinei, e uiga ki tō alofa. Fakamolemole fehoahoani ki te fakaauauga o te lātou malaga i he faiga e fiafia ki ei te Atua.

⁷ Auā kua malaga atu ki lātou ke tautua ki a Keliho, ma e hēki ki lātou taliagia he fehoahoani mai nā tino fakapaupau.

⁸ Ko ki tātou la nā tino Kelihiano, e tatau ke fehoahoani ki nā tino iēnei, kae ke mafai ke gālulue fakatahi ki tātou ma ki lātou, mo te meamoni.

Ko Tiotelefe ma Temetilio

⁹ Na tuhi taku tuhi pukupuku ki te Ekalehia; kae ko Tiotelefe, he tino e fofou ke kavea ia ma takitaki, e hē fia fakalogo mai ki a te au.

¹⁰ Kāfai la ia au e fanatu, oi ka kikila totoka ai au ki ana mea uma kua fai; ana tala mātagā e uiga ki a te ki mātou, ma ana tala pepelo. Kae e hē malie ai lava tona loto; ka hē ia taliagia foki nā uho Kelihiano kāfai e ōmamai, ma ia tāofiofia foki nā tino o te Ekalehia e fofou ke ki lātou taliagia, ma taumafai ke tuli kehe nā tino iēnei ma te Ekalehia.

¹¹ Te uō pele, nahe kē fakatakitaki ki te mea e kino, kae fakatakitaki ki te mea e lelei. Ko te tino e ia faia te mea e lelei e o te Atua ia; ko te tino e ia faia te mea e kino, ko hēki ia kiteagia te Atua.

¹² E tutuha lelei lava nā molimau a nā tino ki te lelei o Temetilio; e molimau foki lava te meamoni ki a te ia. Ma e fakaopoopo foki ki ei ma ta mātou molimau, ma e iloa lelei e koe ko te mea e lea ai ki mātou e hako.

Nā toe Kupu

¹³ E lahi lele nā mea e fia lea atu ai au, kae ko au e hē fofou ke tuhi i he peni ma he vaituhi.

¹⁴ E fakamoemoe au ka feiloaki ki tātou i he taimi lata mai, oi kua faitatala fakatahi ai ki tātou.

¹⁵ Ke ia te koutou te fīlēmū. E fakafeiloaki atu nā uō uma a koutou. E fakafeiloaki atu foki ki a mātou uō uma lele.