2 Timoteo 4 - Tokelauan New Testament

¹ I mua o te Atua ma i mua o Keliho Iehu, tē ka haele mai ko ia ko te Tupu ma ka ia fakamahinoagia nā tino ola ma nā tino oti, ko au e aioi atu ki a te koe

² ke tālaki te fekau. Ke fai pea lava e koe te mea tēnei, e tuha lava pe he taimi e talafeagai pe hēai. Fakahako nā tino ma fakailoa ki ei o lātou hehē. Fakamālohi ki a te ki lātou i au akoakoga ma ke lava tō onohai.

³ Auā e hau nā taimi ka hē toe fia fakalogo ai nā tino ki nā akoakoga moni, kae ka mulimuli lava ki o lātou tuinanauga, ma fakamāopoopo ai mo ki lātou lava ni faiakoga ke ki lātou taku akea nā mea e fia fakalogo ki ei o lātou taliga.

⁴ Ka liliu kehe ki lātou ma hē toe fakalogo ki te meamoni, kae ka fano lava o lātou māfaufau ki nā talakakai mai te vavau.

⁵ Kae e tatau koe ke pūlea ki a te koe lava i taimi uma; onohai i nā puapuagā, ma fai tau gāluega tālaki ke uma.

⁶ Kae vē la ki a te au, kua pa mai te taimi ke ofo atu ai au ma tāulaga; kua pa mai te taimi e tukua ai e au te ōlaga tēnei.

⁷ Kua vili mālohi au i te tūkuga ki te mea e gata mai ai toku mafai, kua pa au ki te taunukuga, ma na fakamāoni pea lava au ke pa ki te ikuga.

⁸ Nei kua fakatalitali mai ki a te au te pale o te manumālō, ko te fakaleleia tēnā o toku va ma te Atua, tēia ka tuku mai ki a te au i te Aho tēnā e te Aliki, te Fakamahino fakamāoni. Kae e hē nā ko au oioti te ka ia tuku mai ki ei, kae ka tuku atu foki e ia mo ki lātou uma e amanaki fiafia ki tona haele mai.

Kupu Apoapoaki a Paulo

⁹ Taumafai ko ke mafai vave koe ke hau ki a te au.

¹⁰ Ko Temahi kua fiafia ki nā mea o te lalolagi nei, ma kua ia tiakia au kae fano ki Tehalonika. Ko Keleoke kua fano ki Kalatia, ka ko Tito kua fano ki Talamatia.

¹¹ Nā ko Luka te i kinei ki māua. Hau ma kaumai ia Maleko, auā e mafai ke fehoahoani mai ki a te au i te gāluega.

¹² Kua uga e au ia Tuhiko ki Efeho.

¹³ Kāfai koe e hau, kaumai toku peleue loloa na tuku ki a Kalapō i Tolōata; kaumai foki ma nā tuhitākai, kae maihe lava nā tuhitākai e fai i nā pakumanu.

¹⁴ Ko au na pagātia lele i faiga a Alehana te tino fai ukamea; ka taui lava e te Aliki ki ei ana mea na fai.

¹⁵ Koe la ke fakaeteete i te tagata tēnei, auā e teteke lahi lele ki te fekau e ki tātou tālakia.

¹⁶ I te faiga o toku fakamahinoga, e hēai lele he tino na fehoahoani mai ki a te au; ko au na tīaki e ki lātou uma. Ko au e tatalo ke nahe tauia e te Atua te lātou mea tēnei na fai.

¹⁷ Kae na fakatahi mai te Aliki ki a te au ma ia fōki maia te mālohi, kae ke mafai ai e au oi tālaki atu te kātoatoaga o te fekau ki tagata nukukehe uma; ma ko au na laveaki mai gutu o leona.

¹⁸ Ma ka laveakia au e te Aliki mai nā faiga kino uma, ma ia kavea au ma te haogalēmū ki tona Mālō i te lagi. Ke ia te ia te vīkiga ke pa lava ki te fakavavau! Amene.

Nā toe Kupu

¹⁹ E momoli atu nā alofaaga ki a Pihila ma Akula, ma te kāiga o Onehifolou.

²⁰ Ko Elahito na nofo i Kolinito, ma na tuku e au ia Tolofimo i Mileto ona nae tauale.

²¹ Taumafai ke hau koe ka ko hēki pa ki te tau mālūlū. E momoli atu nā alofaaga o Eupoulo, Pouteha, Lino, ma Kalautia, vēnā ma iētahi Kelihiano uma.

²² Ke fakatahi te Aliki ma koutou. Ke ia te koutou uma te alofa tūnoa o te Atua.