2 Timoteo 3 - Tokelauan New Testament

Ko nā toe Aho

¹ Ke manatua e koe te mea tēnei; ka i ei nā taimi faigatā lahi e pa mai i nā toe aho.

² Auā ko tagata ka manatu fakapito ifo lava te tino ki a te ia lava, ka mānumanu ki nā tupe, ka fāfifia ma fiahihili; ka fai kupu fakakino, ka hē uhitaki ki nā mātua, ka hē loto fakafetai ma hē āmio mamalu,

³ ka hē loto alolofa, hē loto fakamāgalo, ka tau fakakino, ka fakahāuā, ma hē pūlea; ka feita ki nā mea lelei;

⁴ ka hē fakamāoni, hē manatunatu lelei, ma tumu i te mimita; ka fiafia atu ki fiafiaga o te ōlaga i lo ki te Atua;

⁵ ka tāofi mau ki lātou ki nā auala e fakatino ai te tātou talitonuga, kae e hē talitonu ki te mana o te talitonuga.

⁶ Ko iētahi o ki lātou e olo ki loto o nā fale o iētahi tino, ma pule kātoa ai ki lātou ki nā fafine e vāivai nā loto ma tumu i te fakaatu ona ko a lātou agahala, ma e takitakia e te lahi o itūkāigā lagona,

⁷ nā fafine e fiafia pea lava oi fakalogologo ki nā akoakoga, kae e hē mafai lele ke ki lātou iloa te meamoni.

⁸ E vē oi teteke ia Ianehe ma Iamele ki a Mohe, e vēnā foki oi teteke nā tino iēnei ki te meamoni — nā tino kua kino nā māfaufau ma e hē moni to lātou fakatuatua ki a Keliho.

⁹ Kae e hē mataloa he taimi e hao ai a lātou mea iēnei, auā ka kitea e tagata te vālelea o ki lātou, e vē foki lava ko te mea na pa ki ei ia Ianehe ma Iamele.

Nā toe Fakahinoga

¹⁰ Kae kua kē kitea te faiga o aku akoakoga, taku āmio, ma te mea e fakamoemoe au ki ei i toku ōlaga; kua kē kitea toku fakatuatua, toku fakapalepale, toku alofa, toku onohai,

¹¹ nā fakahāuāga na pa au ki ei, ma oku puapuagā. Kua kē iloa nā mea uma na tutupu ki a te au i Anitioka, Ikononu, ma Luotala, nā fakahāuāga mātuiā na pa au ki ei! Kae na laveaki au e te Aliki mai nā mea uma iēnei.

¹² Ho he tino e fofou ke ola i he ōlaga āmiotonu i te māfutaga ma Keliho Iehu, ka maua i nā fakahāuāga;

¹³ ma ko nā tino āmio kino ma tau fakahehē, ka fakaatili te kino o a lātou mea e fai, i te fakahehēga o tagata ma te fakahehēga foki lava o ki lātou.

¹⁴ Kae e vē la ki a te koe, pipiki mau pea lava ki nā mea na akoako ai koe ma kua talitonu lelei koe ki ei. E iloa e koe nā tino na akoakoa koe,

¹⁵ ma e manatua e koe, na kē iloa mai lava nā Tuhituhiga Paia ka koi tamaiti koe, ma kua maua ai e koe te poto e uiga ki te fakaolataga e ala i te fakatuatua ki a Keliho Iehu.

¹⁶ Ko nā Tuhituhiga Paia uma e mai te Atua, ma e aogā ke akoakoga ai, ke akoaki ai, ke fakatonu ai, ma ke fakapoto ai i te āmiotonu,

¹⁷ kae ke kātoatoa ai te lelei o te tino e kaukauna ki te Atua, ma lava hāuni ke faia nā gāluega lelei uma lele.