2 Timoteo 2 - Tokelauan New Testament

He Fitafita Fakamāoni e a Keliho Iehu

¹ Ko koe la toku ataliki, ke fakamākeke e ala i te alofa tūnoa kua maua e ki tātou i te māfutaga ma Keliho Iehu,

² ma ko nā mea kua fakalogo koe e akoako e au i mua o tagata e tokalahi, ke vēnā foki oi tuku atu e koe ki ni tino fakamoemoegia, ke ki lātou akoako atua ki iētahi tino.

³ Ko koe he fitafita fakamāoni e a Keliho Iehu, ke talia la e koe tō vāega o nā puapuagā.

⁴ E hēai he fitafita e galue i ona tiute fakafitafita e fofou ke ia faia ni iētahi gāluega kehe, auā ko te mea e fakamuamua i tona māfaufau, ke fakafiafia tona pule i ana gāluega.

⁵ Ko he tino e vili i he tūkuga e hē mafai ke maua hona togi vaganā e uhitaki ki nā tūlāfono.

⁶ Ko te faifatoaga na galue mālohi te tatau ke maua muamua tona vāega o te helehelega.

⁷ Māfaufau ki nā mea e lea atu ai au, auā ka fehoahoani te Aliki ke fakamālamalama atu ki a te koe nā mea uma iēnei.

⁸ Ke manatua ko Iehu Keliho, tē na toe fakatū mai i te oti, na tupuga mai ia Tavita e vē ona akoakogia e te Tala Lelei e kō tālakia.

⁹ Ona e kō tālakia te Tala Lelei, kua maua ai au i nā puapuagā, ma noanoa i nā filifili ukamea e vē he tino holi tūlāfono. Kae ko te kupu a te Atua e hē noanoagia i ni filifili ukamea.

¹⁰ Ma ko au e onohai i nā mea uma iēnei mo te lelei o nā tino kua filifilia e te Atua, kae ke mafai ai foki ke ki lātou maua te fakaolataga e ala ia Keliho Iehu ma maua ai nā vīkiga e fakavavau.

¹¹ Ko te fakakupuga tēnei e moni: “Kāfai ki tātou kua oti fakatahi ma ia, ko ki tātou foki ka ola fakatahi ma ia.

¹² Kāfai e tūmau pea to tātou onohai, ka pule fakatahi foki ki tātou ma ia. Kāfai e fakafiti ki tātou ia te ia, ka fakafiti foki ia ia te ki tātou.

¹³ Kāfai ki tātou e hē fakamāoni e fakamāoni pea lava ia, auā e hē mafai ia ke fakafiti e hē ia iloa ia ia lava.”

He Tino Faigāluega kua Taliagia Kātoatoa e te Atua

¹⁴ Fakamanatu te mea tēnei ki a te ki lātou, ma lapataki mālohi ki ei i mua o te Atua, ke nahe ki lātou fai fīnauga ki te uiga o nā kupu. E hēai lele he mea lelei e maua ai, kae nā ko te āfāina lahi ai o nā tino e fakalogo ki ei.

¹⁵ Taumafai ki mea e gata mai ai tō mafai ke talia kātoatoa koe i mua o te Atua, e vē he tino faigāluega e hē mā i tana gāluega, ma e akoako hako e ia te kupu moni a te Atua.

¹⁶ Tau mamao ma nā talanoaga valea ma hēai he aogā, auā e nā ko te tuli kehe ai o tagata ke mamao ma te Atua.

¹⁷ Ko nā akoakoga iēnā e vē ko he manuka kua papala kino. E toka lua ia tino kua ki lā akoakoa ni mea vēnei ko Humenaio ma Fileto.

¹⁸ Kua olo kehe ki lāua ma te meamoni ma kua āfāina ai te talitonuga o iētahi, ona e lea vē ko te toetū ko he mea kua uma te fakatino.

¹⁹ Kae ko te fakavae mautū na fai e te Atua, e hē māluelue; ma e tuhi i luga nā kupu iēnei: “E iloa e te Aliki nā tino o ia” ma “Ko nā tino e lea ko ki lātou e a te Aliki, e tatau ke liliu kehe mai a lātou āmio hehē.”

²⁰ I he fale lahi, e i ei nā ipukai ma nā ipuloloto kehekehe: ko iētahi e gaohia i te hiliva ma te aulo, ko iētahi e gaohia i te lākau ma te ōmea; ko iētahi e fakaaogā mo nā mea fakapitoa, ko iētahi e mo nā mea māhani.

²¹ Ko nā tino e ki lātou fakamamāgia ki lātou mai nā mea kino uma iēnā, ka fakaaogā ki lātou mo nā mea fakapitoa, auā kua uma te fakapaiagia o ki lātou ma e aogā mo to lātou Matai, ma kua hāuni ke fakaaogā ki ho he gāluega lelei.

²² Tau mamao ma nā manatu fakataulealea, ma tauivi mo te āmiotonu, te fakamāoni, te alofa ma te fīlēmū, fakatahi ma ki lātou e tāpuaki atu ki te Atua ma te loto mamā.

²³ Tau mamao ma nā fīnauga valea ma hēai he uiga; e iloa e koe ko te ikuga o nā mea iēnei ko te tauaimiha.

²⁴ Ma ko te kaukauna a te Aliki e hē tatau ke fai fīnauga, kae e alofa ki ho he tino, ma ko he faiakoga lelei ma lava te onohai,

²⁵ e fakatonu mālie atu ki nā tino e fīnau mai. Ka ono tuku atu e te Atua ki a te ki lātou te avanoa ke halamō ai, ma ki lātou iloa ai te meamoni,

²⁶ ma ka mafai ki lātou ke hōhola kehe mai te māilei a te Tiāpolo, tē na ia pukea ki lātou ke mulimuli ake ki te mea e fofou ia ki ei.