2 Timoteo 1 - Tokelauan New Testament

¹ Mai ia Paulo, he apohitolo a Keliho Iehu na filifilia e te Atua, ke fakailoa ki tagata te ola moni kua uma te ia folafolagia, e ala i te māfutaga ma Keliho Iehu —

² Ki a Timoteo, toku ataliki pele: Ke ia te koe te alofa tūnoa, te agalelei, ma te fīlēmū mai te Atua te Tamana ma Keliho Iehu to tātou Aliki.

Tatalo Fakafetai ma nā Fakamālohiga

³ Ko au e fakafetai ki te Atua, tē e kaukauna au ki ei ma te lotofuatia e mamā e vē ona faia e oku tupuna, ma e manatua pea lava koe i aku tatalo i te pō ma te ao.

⁴ E manatua e au ō loimata, ma ko au kua fia feiloaki lele ma koe, kae ke fakatumu ai au i te fiafia.

⁵ E manatua e au te moni o tō fakatuatua, te itūkāigā fakatuatua nae ia Loihe te mātua o tō mātua, ma Eunike tō mātua. E mautinoa e au koi tūmau lava koe i te tūlaga tēnā.

⁶ Ko te mea ia e fakamanatu atu ai e au ki a te koe, ke fakaolaola pea lava te meaalofa na fōki atu e te Atua ki a te koe, i te fakaeke atuga o nā lima o oku ki ō luga.

⁷ Auā ko te Agaga kua fōki mai e te Atua ki a te ki tātou e hē ke matamumuli ai ki tātou; kae ko tona Agaga e fakatumulia ai ki tātou i te loto mālohi, te loto alofa, ma te ola pūlea.

⁸ Ia koe la nahe mā oi molimau e uiga ki to tātou Aliki; ia koe foki nahe mā ona ko au, he pagotā ona ko Keliho. Kae ke talia e koe tō vāega o nā puapuagā mo te Tala Lelei, e vē ona fōki atu e te Atua te mālohi ki a te koe, ke fai ai e koe te mea tēnei.

⁹ Ko ki tātou na fakaola e te Atua ma ia filifilia ke kavea ma ona tagata, e hē ona ko nā gāluega kua ki tātou faia, kae ona ko ana lava fuafuaga ma tona alofa tūnoa. Na ia fōki maia tona alofa tūnoa tēnei e ala ia Keliho Iehu, ka ko hēki faia te lalolagi,

¹⁰ kae nei kua fakaalia ki a te ki tātou, e ala i te haele mai o to tātou Fakaola ko Keliho Iehu. Kua fakauma e ia te mālohi o te oti, ma fakailoa mai e ala i te Tala Lelei, te ola e hē uma.

¹¹ Kua tōfia au e te Atua ke tālaki te Tala Lelei ma ke kavea ma apohitolo vēnā foki ma faiakoga,

¹² ma ko te mea ia kua maua ai au i nā puapuagā. Kae ko au e hē mā, auā e iloa e au te tino e talitonu au ki ei, ma e mautinoa e au e puipui malu e ia ke pa ki te aho fakamahino, nā mea na ia tuku maia ki a te au,

¹³ Pipiki mau ki nā kupu moni na akoako atu ai koe e au ke fai ma takiala ki a te koe, ma tūmau i te fakatuatua ma te alofa e maua e ki tātou i te māfutaga ma Keliho Iehu.

¹⁴ Puipui lelei ki nā mea kua tuku atu ki a te koe e ala i te mana o te Agaga Paia e mau i loto o ki tātou.

¹⁵ E iloa e koe ko nā tino uma lele i Ahia e aofia ai ia Fugelo ma Hemokene, kua fulitua mai ki a te au.

¹⁶ Ke ia Onehifolou ma tona kāiga te alofa fakahao o te Aliki, auā e lahi nā taimi na fakafiafia mai ai ia ki toku loto. Nae hē mā lele ona ko au e i te falepuipui,

¹⁷ kae na pa mai lava ki Loma oi kāmata loa oi ia hakilia au, ma na iku lava oi ia maua au.

¹⁸ Ke ia te ia te alofa fakahao o te Aliki kāfai e pa ki te Aho Fakamahino! Ma e iloa lelei lava e koe te lahi o nā mea na fehoahoani mai ai ia ki a te au i Efeho.