2 Petelu 3 - Tokelauan New Testament

Ko te Folafolaga e uiga ki te toe Haele mai o te Aliki

¹ Te kau uho pele, ko te lua tēnei o aku tuhi e kavatu ki a te koutou. I nā tuhi e lua iēnei, e fakamanatu atu lava e au nā mea iēnei kae ke fakatupu ai ni manatu mamā ia te koutou.

² Ko au e fofou ke koutou manatuagia nā kupu na tautatala ai nā pelofeta paia i nā aho kua leva, ma te fakatonuga mai te Aliki ma te Fakaola na tuku atu ki a te koutou e nā apohitolo o koutou.

³ Ko te mea muamua, e tatau koutou ke mālamalama e i ei nā tino e pūlea e o lātou lava tuinanauga kino, ka ōmamai ki a te koutou i nā toe aho. Ka fakatauemu atu ki a te koutou

⁴ ma lea vē atu, “Na folafola e ia ko ia e toe haele mai, ni? Tēfea nei la? Kua feoti atu o tātou tupuna, kae ko nā mea uma lele e tūmau lava i te mea nae i ei ai talu te kāmataga o te lalolagi!”

⁵ Kua fakatagā pupuli lele ia te ki lātou ko te lagi ma te lalolagi na faia i te fakatonuga a te Atua i nā aho kua leva. Ko te lalolagi na tutupu ake i te vai ma gaohia i te vai,

⁶ ma ko te vai foki lava, te vai o te lolo, te na fakaumatia ai te lalolagi i nā aho anamua.

⁷ Kae ko te lagi ma te lalolagi e i ei i te taimi nei e teu puipuia pea lava e ala i te fakatonuga foki lava tēnā e fokotahi a te Atua, kae ke fakaumatia ai i te afi. Ka tūmau pea ki lātou ke pa ki te aho e fakamahino ma fakaumatia ai nā tino e hē talitonu ki te Atua.

⁸ Kae ko koutou te kau uho pele, nahe puli lele i te mea tēnei e fokotahi! E hēai he kehekehega o te aho e fokotahi ma te afe tauhaga, i te kikila a te Aliki. E tutuha lava nā mea iēnei e lua ia te ia.

⁹ Ko te mea kua uma te folafola e te Aliki e hē tuai te fakataunukuga e ia, e vē oi manatu iētahi tino. Kae e onohai pea lava ia, auā e hē fofou ke i ei he tino o koutou e fakaumatia, kae e fofou ko tagata uma ke liliu kehe mai a lātou agahala.

¹⁰ Kae ko te Aho o te Aliki e hau e vē ko he tino kaihohoa. I te Aho tēnā, ka matafi kehe atu te lagi ma te tālili o he piha lahi, ka mu uma nā mea i te vāteatea ma fakaumatia, ma mou kehe atu

¹¹ Ona ko nā mea uma iēnei ka fakaumatia i te auala tēnei, he ā nei la te itūkāigā tagata e tatau ke i ei koutou? Ko nā ola o koutou e tatau ke fakapaiagia ma ofo atu kātoa mo te Atua,

¹² ka koi fakatalitali koutou ki te Aho o te Atua, ma ke fai e koutou nā mea ke vave ai oi pa mai te Aho — te Aho e mu ma fakaumatia ai te lagi, ma ka liu ai ia mea uma i te lagi i te vevela.

¹³ Kae ko ki tātou e fakatalitali ki nā mea kua uma te folafola mai e te Atua: he lagi fou ma he lalolagi fou, te mea ka fakatino ai te finagalo o te Atua.

¹⁴ Ko te mea ia te kau uho pele, ka koi fakatalitali koutou ki te Aho tēnā, taumafai mālohi ke mamā ma hēai he mea e kino ai koutou i te kikila a te Atua, ma ke i ei koutou i te fīlēmū ma ia.

¹⁵ E tatau ke kikila vē koutou, ko te onohai o te Aliki ko he avanoa tēnā kua ia fōkiatua ke mafai ai koutou ke fakaolagia, e vē lava ko te tuhi atu a to mātou uho pele ki a Paulo ma na ia fakaaogā ai te poto na fōki ki ei e te Atua.

¹⁶ Ko tēnei te mea e lea atu ai ki a te koutou i nā tuhi uma a ia e tākua ai te matākupu tēnei. E i ei nā mea e faigatā ona mālamalama ki ei i ana tuhi, ma ko nā mea iēnei e taumafai nā tino vālelea ma hē iloa he mea, ke fakauiga hehē, e vē oi fai e ki lātou ki iētahi fakamaumauga i nā Tuhituhiga Paia. Ona ko te tūlaga iēnei, ka fakatupu ai lava e ki lātou nā mea e fakaumatia ai ki lātou.

¹⁷ Kae ko koutou te kau uho pele, kua uma te koutou iloa o te mea tēnei. Koutou la ke mataala, kae ke nahe tataki kehea ai koutou i nā hehē o tagata hē tauhi ki te tūlāfono, ma hē toe mautū lelei ai koutou.

¹⁸ Kae ke tupu olaola pea koutou i te alofa tūnoa ma te mālamalama mai to tātou Aliki ma to tātou Fakaola ko Iehu Keliho. Ke ia te ia nā vīkiga, nei ma ke pa lava ki te fakavavau! Amene.