2 Petelu 2 - Tokelauan New Testament

Nā Faiakoga Pepelo

¹ Nae i ei foki nā pelofeta pepelo fakatahi ma tagata o te Atua i nā aho kua teka, ma ka vēnā foki ona i ei nā faiakoga pepelo fakatahi ma koutou. Ka ki lātou kaumaia ni fakamatalaga tau fakakino ma te pepelo, ma hē ki lātou taliagia te Matai na ia totōgia to lātou haolotoga, ma ka fakaumatia vave ai lava ki lātou.

² E ui i tēia, e tokalahi nā tino Kelihiano ka mulimuli ki o lātou lava tuinanauga mātagā; ma e ona ko nā mea e fai e ki lātou, ka fāifāi ai iētahi tino ki te Auala o te meamoni.

³ Ko to lātou manako lahi ki nā tupe, ka fakatōhina ai koutou e ki lātou i nā kupu pepelo. Mai te kāloā ke pa mai nei, ko tē e fakamahinoa ki lātou kua nofo hāuni, ma ko tē e fakaumatiagia ki lātou e hē moe lele!

⁴ E hēki fakahaoa e te Atua nā agelu na agahala, kae na togi ki heoli, te mea e noanoa ai i nā filifili i te pōgihā, ma fakatalitali ai mo te Aho Fakamahino.

⁵ E hēki fakahaoa e te Atua te lalolagi i nā aho anamua, kae na ia kaumaia te lolo ki te lalolagi o tagata hē mātataku i te Atua; oioti lava nā tino na fakahao e ia ko Noa, tē nae ia tālakia ki tagata ke ola e tuha ai ma te finagalo o te Atua, fakatahi ai ma iētahi tino e toka fitu.

⁶ Na fakahalagia e te Atua nā kakai ko Hotoma ma Komolo ma fakaumatiagia i te afi, ma fai ki lātou ma fakatakitakiga ki te mea e pa ki ei nā tino e hē mātataku ia te ia.

⁷ Na fakaola e ia ia Lota, he tamāloa āmiotonu nae fakanoanoa lahi lele, ona ko tuinanauga mātagā o tagata holi tūlāfono.

⁸ Ko tēnei tino āmiotonu, nae nofo fakatahi ma ki lātou, ma nae tīgā lele tona loto i aho uma, ona ko nā uiga kino e fakalogo ma kikila ia ki ei.

⁹ E iloa la e te Aliki te auala e fakahao ai nā tino e mātataku i te Atua, mai o lātou puapuagā, ma ia iloa te auala e tāofi ai pea lava nā tino kino i te fakahalaga ke pa ki te Aho Fakamahino,

¹⁰ kae maihe lava ki lātou e mulimuli ki o lātou tuinanauga mātagā ki te tino, ma teteke lahi ki te pule a te Atua. Ko nā faiakoga pepelo iēnei e hē popoi lele pe mātataku oi fāifāi ki nā agelu mamalu.

¹¹ E pa foki lava ki nā agelu e hili atu to lātou mākeke ma te mālolohi i lo nā faiakoga pepelo iēnei, e hē ki lātou mōliagia nā agelu mamalu i ni kupu mātagā i mua o te Aliki.

¹² Kae ko nā faiakoga pepelo iēnei, e hē muamua māfaufau oi fātoā fai e ki lātou he mea. E vē ki lātou ko nā manu tāvao, e fānanau ke tapoki ma tāmate. E fāifāi ki nā mea e hēai ho lātou mālamalama ki ei, ma ka fakaumatia ki lātou e vē ko nā manu tāvao,

¹³ ma ka toe tauia lava ki lātou i nā puapuagā mo nā puapuagā na ki lātou fakatupuagia. He fiafiaga e o ki lātou te fai pātī i te ao teatea; te fakamā ma te fakatakuvalea kāfai e kakai fakatahi ma koutou, ma e fiafia pea lava oi fai o lātou uiga tau fakahehē.

¹⁴ Oioti lava te mea e fano ki ei o lātou māfaufau, ke i ei he avanoa ke fai ai e ki lātou te mulilua; ko to lātou umiti ki te agahala e hē mafai ke uma. E takitaki hehē e ki lātou nā tino e fakahehē gōfie, ma ko o lātou loto e akoako ke iloa oi manako lahi. Kua fakamālaia ki lātou e te Atua.

¹⁵ Kua olo kehe ki lātou mai te auala hako ma kua hē ki lātou iloa to lātou auala; kua mulimuli ki lātou i te auala na kui ai ia Palaama te ataliki o Poholo, tē nae fiafia ki nā tupe nae totogi ai ia e ni tino mo ana mea pikopiko nae fai,

¹⁶ ma na fakailoa ki ei e te Atua tona hē fiafia lahi ona ko ana agahala. Na tautala tana āhini i te leo tagata ola, ma na fai ma mea na fakauma ai nā uiga valea o tēnei pelofeta.

¹⁷ Ko nā tino iēnei e vē ni vaipuna kua māmaha, e vē ni ao e pūhia i he afā; kua uma te fakaavanoa e te Atua to lātou nofoaga i te mea e pito hili te loloto ma te pōgihā.

¹⁸ E fai e ki lātou nā tala mimita ma te valea, ma fakatōhina e ki lātou e ala i nā tuinanauga o te tino, nā tino fātoā mafai ke olo kehe mai i te ōlaga hehē.

¹⁹ E folafola e ki lātou te haolotoga, kae ko ki lātou foki ni pologa a nā uiga kino e fakaumatia ai lava ki lātou — auā ko te tagata ko he pologa a ho he mea kua fakatōkilalogia ia.

²⁰ Kāfai nā tino iēnei kua hao mai nā uiga kino o te lalolagi ona kua ki lātou iloa to tātou Aliki Fakaola ko Iehu Keliho, kae toe popoki ma fakatōkilalogia e nā mea iēnei, e hili atu la te kino o te tūlaga e i ei ki lātou i te fakaikuga, nai lo te mea nae i ei ai i te kāmataga.

²¹ Na hili lele atu ai kana he mea e hēki ki lātou iloa te auala o te āmiotonu, i lo te iloa kae toe liliu kehe mai nā fakatonuga paia na tuku ake ki a te ki lātou.

²² Ko te mea na tupu ki a te ki lātou e fakaalia ai te hako o nā alagākupu e vē: “Ko te kulī e toe foki lava ki ona puakiga” ma “Ko te puaka kua uma te fufulu kehe o te palapala mai tona tino, e toe foki lava oi takafili i te palapala.”