2 Petelu 1 - Tokelauan New Testament

¹ Mai ia Himona Petelu, he kaukauna ma he apohitolo e a Iehu Keliho — Ki nā tino kua fōki ki ei he fakatuatua tāua e vē foki lava ko ki mātou, e ala i te āmiotonu o to tātou Atua ma to tātou Fakaola ko Iehu Keliho:

² Ke ia te koutou te kātoaga o te alofa tūnoa ma te fīlēmū e ala i te koutou iloa o te Atua ma Iehu to tātou Aliki.

Ko te Kalaga ma te Filifiliga a te Atua

³ Ko te mana o te Atua kua maua ai e ki tātou nā mea uma e manakomia e ki tātou ke ola ai ki tātou i he ōlaga e fiafia ki ei te Atua, e ala i to tātou mālamalama i tē kua ia kalagagia ki tātou ke i ei fakatahi ma ia i tona lava mamalu ma te lelei kātoatoa.

⁴ E ala i nā mea uma iēnei, kua ia fōki maia ai ki a te ki tātou nā meaalofa tāua lahi na ia folafola maia, kae ke fai tēnā ma auala ke hao ai koutou mai nā tuinanauga kino o te lalolagi e fakatāugā ai ia tagata, ma mafai ai koutou ke kavea ma tagata e faia te finagalo o te Atua.

⁵ Ko te mea ia e tatau ai koutou ke taumafai ki te mea e gata mai ai te koutou mafai ke fakaopoopo te āmio lelei ki te koutou fakatuatua; ki te āmio lelei fakaopoopo ki ei te mālamalama e uiga ki te mea e fiafia ki ei te Atua;

⁶ ki te mālamalama o koutou e uiga ki te mea e fiafia ki ei te Atua, fakaopoopo ki ei te loto pūlea; ki te loto pūlea, fakaopoopo ki ei te onohai; ki te onohai, fakaopoopo ki ei te mataku i te Atua;

⁷ ki te mataku i te Atua, fakaopoopo ki ei te alofa faka-Kelihiano; ki te alofa faka-Kelihiano, fakaopoopo ki ei te alofa ki tagata uma.

⁸ Ko nā uiga lelei iēnei e manakomia e koutou, ma kāfai e tuputupu pea lava nā mea iēnei ia te koutou, ka mafai ai koutou ke tuahā ma fakaatili ai te koutou mālamalama e uiga ki to tātou Aliki ko Iehu Keliho.

⁹ Kae ko nā tino e hē ia te ki lātou nā uiga lelei iēnei, e pukupuku lele te lātou kikila ma hē ki lātou kiteagia, ma pupuli lele ko ki lātou kua uma te fakamamā e te Atua mai ia lātou agahala i nā taimi kua teka.

¹⁰ Ko te mea ia oku uho ma tuafafine, taumafai ātili ke kavea te kalagagia ma te filifilia o koutou e te Atua ma mea e mautū i te koutou ōlaga; kāfai e koutou faia te mea tēnei, ka hē mafai lele foki ke tīaki te koutou fakatuatua;

¹¹ ma ka ia te koutou te aiā kātoatoa ke ulufale ai ki te Mālō e fakavavau o to tātou Aliki ma to tātou Fakaola ko Iehu Keliho.

¹² Ma ka fakamanatu atu pea lava e au ki a te koutou nā mea iēnei, e ui lava kua uma te koutou iloa ma kua mautū lelei koutou i te meamoni kua ia te koutou.

¹³ E manatu au ko he tiute e o oku, ke fakamanatu atu pea nā mea iēnei ki a te koutou ka koi ola au,

¹⁴ ona e iloa e au kua hē mataloa he taimi oi pa mai ai te oti ki a te au, e vē ona fakamanino lelei mai ki a te au e to tātou Aliki ko Iehu Keliho.

¹⁵ Ka taumafai la au ki te mea e gata mai ai toku mafai, ki he faiga ke manatua ai pea e koutou nā mea iēnei, kāfai e uma toku ola.

Nā Tino na Molimau ki te Mamalu o Keliho

¹⁶ Ko ki mātou e hēki fakalagolago ki ni tala fatu, i te ki mātou fakailoa atuga ki a te koutou e uiga ki te mana ma te haele mai o to tātou Aliki ko Iehu Keliho. Na kikila lelei lava o mātou mata ki tona mamalu lahi.

¹⁷ Nae i ei ki mātou i te tuku atuga ki a te ia e te Atua te Tamana, te mamalu ma te vīkiga, i te fanaifoga o te leo ki a te ia mai te Mamalu Hilihilikehe e vē ifo, “Ko toku Ataliki fakapelepele tēnei, e fiafia lahi au ki ei!”

¹⁸ Na lagona e ki mātou te leo tēnei mai te lagi, i te iēiga fakatahi o ki mātou ma ia i luga o te mauga paia.

¹⁹ Oi kua ātili ai la to mātou mautinoa e tuha ai ki te fekau na fakailoa mai e te kau pelofeta. E hili la te koutou talitonu ki ei, auā e vē ko he lāmepa e mumū i he mea pōuli ke pa ki te tafa o ata o te Aho, ma huhulu atu ai te fetu o te taeao ki outou loto.

²⁰ Kae fakahilihili ai lava ke koutou manatua, e hēai he tino e ia mafai oi fakamatala e ia lava, te uiga o he fekau na fakailoa mai e nā pelofeta, e vē oi tūhia i nā Tuhituhiga Paia.

²¹ Auā e hēai he fekau na fakailoa mai e nā pelofeta, na kaumai ona ko he loto o he tino, kae na kaumai e ni tino ei lalo o te pule a te Agaga Paia, i nā taimi e ki lātou fakailoa ai te fekau mai te Atua.