2 Kolinito 8 - Tokelauan New Testament

Ko te Lima Fōaki

¹ Te kau uho, ko ki mātou e fofou ke iloa e koutou te alofa tūnoa o te Atua, tēia kua fakaalia e ala i nā Ekalehia i Maketonia.

² Nae āfāina ki lātou i nā fakafītāuli, kae ko te lahi o to lātou fiafia na fakaatili ai to lātou limafoaki, e ui lava e mātitiva lahi lele.

³ E lea atu au ma te fakamāoni, ko te lātou fōaki na fai lava ki te mea na gata ai to lātou mafai, pe hili atu foki. I to lātou lava loto mālilie

⁴ na fakatagi mai ai ma te loto naunau, mo he avanoa ke mafai ai ki lātou ke fehoahoani ki tagata o te Atua i Iutea.

⁵ Kua lahi atu lele tēnei i lo te mea nae fakamoemoe ki mātou ki ei. Na muamua oi ofo atu o lātou tagata ki te Aliki; ma ofo mai ai ki a te ki mātou, e vē lava ko te finagalo o te Atua.

⁶ Ko te mea ia kua fakamālohi ai ki mātou ki a Tito, ona na ia kamatagia te gāluega tēnei, ke fakaauau pea ma ke fehoahoani atu ki a te koutou ke fakauma te gāluega lelei na ia kamatagia.

⁷ Kua tamaokāiga koutou i mea uma: i te fakatuatua, i te folafola, i te iloa ma te loto naunau ke fehoahoani, ma i te koutou alolofa mai ki a te ki mātou. Ma ko ki mātou foki la e fofou ko koutou ke lima fōaki i te gāluega lelei kua feagai ma koutou.

⁸ Ko koutou e hē kō fakatonua. Kae e fia kō iloa pe moni te koutou alofa, kāfai e fakatuhatuha ki te naunau lahi o iētahi tino ke fehoahoani.

⁹ Auā kua koutou iloa te alofa tūnoa o to tātou Aliki ko Iehu Keliho; e ui lava nae tamaokāiga, kae na mativa ona ko koutou, kae ke tamaokāiga ai koutou, e ala i tona mativa.

¹⁰ I toku manatu, e hili te fakauma e koutou i te taimi nei, te mea na kāmata e koutou i te tauhaga kua teka. Ko koutou te na muamua, e hē gata i te fakatinoga o te gāluega, kae vēnā foki i te koutou loto naunau ke fai loa.

¹¹ Fakaauau pea la, ma fakauma te gāluega! Iviivinaki ke fakauma te gāluega, e vē ko te koutou iviivinaki ki te fuafuaga i te kāmataga, ma fai i nā mea kua i outou lima.

¹² Kāfai koutou e naunau ke fōki, ka taliagia e te Atua tautou meaalofa fua kinā mea kua i outou lima, kae e hē fua kinā mea e hē tagolima koutou ki ei.

¹³ Ko au e hē lea atu ke fakamāmā te kavega mo iētahi tino kae fakamamafa mo koutou,

¹⁴ kae ona ko te koutou tūtūlelei i te taimi nei, kua tatau ai ke fehoahoani koutou ki nā tino e fia maua he fehoahoani. Oi ka faigōfie foki ke fehoahoani atu ki lātou, kāfai kua tūtūlelei ki lātou kae fia maua e koutou he fehoahoani. I te faiga tēnei, ka taufai tutuha uma koutou.

¹⁵ E vē oi lea mai te tuhituhiga paia, “Ko te tino na lahi ana mea na fakaputu, e hēki lahi ātili mo ia, ma ko te tino e taigole ana mea na fakaputu, e hēki taigole ātili mo ia.”

Ko Tito ma ona Hoa

¹⁶ Ko au e fakafetai ki te Atua ona ko ana faiga te kua lagona ai e Tito te agaga naunau e vē foki lava ko ki mātou, ke fehoahoani atu ki a te koutou.

¹⁷ E hē gata i te kua ia taliagia o ta mātou fakatagi ake; ko te lahi o tona naunau ke fehoahoani, na fai ai lava tana tonu i tona lava loto malie, ke fanatu ia ki a te koutou.

¹⁸ Kua ki mātou uga atua fakatahi ma Tito, te uho a kaukauna, kua lauiloa i nā Ekalehia uma, i tana gāluega ko te folafolaga o te Tala Lelei.

¹⁹ E hē gata i tēnā, kua filifilia foki ia e nā Ekalehia ke faimalaga fakatahi ma ki mātou, i te fakataunukuga o tēnei gāluega tāua, auā he vīkiga mo te Aliki, ma ke kitea ai foki to mātou agaga fia fehoahoani.

²⁰ Ki mātou e fakaeteete lele ke nahe faitiogia ki mātou e tuha ai ma te kikilaga e ki mātou o tēnei meaalofa lahi.

²¹ Ko te mea e fofou ki mātou ki ei, ke fai te mea e hako, e hē gata i te hilafaga a te Aliki, kae vēnā foki i te kikila a tagata.

²² Ko te mea ia ka uga atu ai e ki mātou hētahi o mātou uho a kaukauna ki a te koutou; kua lahi ana mea e fai kua ki mātou mautinoa ai tona loto naunau ke fehoahoani. Nei la, kua fakaatili lele tona naunau ke fehoahoani, ona e lahi tona talitonu ki a te koutou.

²³ E vē la ki a Tito, ko he hoa e ōku ma e gālulue fakatahi ki māua ke tautua atu ki a te koutou. Ko iētahi hoa a kaukauna, ni kavefekau e a nā Ekalehia, auā lava he vīkiga mo Keliho.

²⁴ Alolofa la ki ei, kae ke mautinoa ai ma iloa e nā Ekalehia, e hako lava o mātou fāfifia nae fai ake ki a te ki lātou e uiga ki a te koutou.