2 Kolinito 7 - Tokelauan New Testament

¹ Te kau uho pele, ko nā folafolaga iēnei kua uma te fai e te Atua mo ki tātou. Ko te mea ia, fakamamā loa ki tātou mai nā mea uma e hē mamā ai o tātou tino ma o tātou agaga, ma ke paia kātoatoa ki tātou e ala i te mataku i te Atua.

Kua Fiafia ia Paulo ona ko te Ekalehia

² Tatala mai ko outou loto ki a te ki mātou. E hēki ki mātou fakahehēa he tino; e hēki fai kino ki mātou ki he tino, ma e hēki fakavalea e ki mātou he tino.

³ Ko taku lea atu vēnei e hē ko he faitioga, auā kua uma lava toku lea atu ko koutou e pele lele i o mātou loto i taimi uma, pe ola ki mātou pe oti.

⁴ Ko au e talitonu kātoatoa ki a te koutou; e lahi toku fāfia ona ko koutou. E ui i te lahi o nā fakafītāuli e feagai ma ki mātou, ko au e loto tele pea lava; ko au e fakatumulia i te fiafia.

⁵ Ke pa lava ki te kua taunuku o ki mātou ki Maketonia, e hēki maua lele ha mātou malōlōga. Na maua ki mātou i nā fakafītāuli kehekehe; nae tauai kupu ma iētahi tino, ma lagona te mataku i o mātou loto.

⁶ Kae ko te Atua, tē e maua ai te fakamālohiaga e ki lātou kua tau hēai he fakamoemoe, na fakamālohi mai ki a te ki mātou, i te hauga o Tito.

⁷ E hē nā ko te hau o Tito te na ala ai to mātou fiafia, kae na vēnā foki to mātou fiafia i tana līpoti ko koutou nae fakamālohi ake ki a te ia. Na taku mai e ia e uiga ki te koutou naunau lahi ke feiloaki ma au, te koutou halamō ki te mea na tupu, te koutou naunau ke lagolago mai ki a te au; ko te mea ia kua hili atu ai toku fiafia i te taimi nei.

⁸ Auā e ui lava na maua koutou i te loto fakanoanoa ona ko taku tuhi na kavatu, ko au e fiafia ko au na tuhi atu. Na kō lagona te popole i te kō iloaga ko koutou nae hē fiafia, i he vāitaimi.

⁹ Kae ko au e fiafia i te taimi nei — e hē ona ko koutou na maua i te loto fakanoanoa, kae ona na fakaaogā e te Atua te koutou loto fakanoanoa, ke maua ai he hūiga ki outou ōlaga. E hēki i ei la he mea na āfāina ai koutou ona ko ki mātou.

¹⁰ Auā ko te fakanoanoa e fakaaogā e te Atua, e maua ai te loto halamō ma takitaki ai ki te fakaolataga — e hēai la he mea e tatau ke hē fiafia tauanoa ai, i he mea vēnei. Kae ko te fakanoanoa tēia e fakaaogā e te lalolagi, e maua ai te oti.

¹¹ Kikila ki te mea na fai e te Atua ki te loto fakanoanoa o koutou: kua fakaatili lele ai te koutou naunau ke fakamāonia e hēai he hehē o koutou! Te lahi o te koutou hē fiafia, te loto popole, te atuatuvale, te lagolago mālohi mai ki a te au, ma te naunau ke fakahalagia o tē kua faia he mea hehē. Kua fakamāonia lava e koutou te hako o koutou, i te mea kātoa tēnei.

¹² Ko te mea ia, e ui na kō tuhia te tuhi, e hēki kō tuhiagia ona ko te tino na faia te mea hehē pe ko te tino na āfāina ona ko te mea hehē tēnei. Na kō tuhia ke fakamanino atu ki a te koutou i mua o te Atua, te mālohi o te koutou lagolago mai ki a te au.

¹³ Ko te mea ia kua kavea ai tēnei mea ma fakamālohiaga ki a te ki mātou. E hē gata i te kua fakamālohi mai ki a te ki mātou, kae kua fakafiafiagia lahi foki ki mātou e Tito, i te kua ki mātou iloa nae fehoahoani koutou uma ki a te ia.

¹⁴ Na fakaali toku fāfia ki a Tito ona ko koutou, ma e hēki koutou faia lele he mea ke hui ai toku lagona tēnei. Ko ki mātou e tautatala lava ki a te koutou i te meamoni, ma e vēnā foki to mātou fāfifia na fai ki a Tito, ko tēia kua hako foki lava.

¹⁵ E alofa lahi lele atu ia Tito ki a te koutou uma, kae maihe lava kāfai e ia manatua te uhitaki o koutou uma ki nā mea nae lea atu ai, vēnā ma te gatete ma te mātataku o koutou, i te taimi na feiloaki ai koutou.

¹⁶ Kai au te fiafia lahi, auā e kātoatoa toku fakamoemoe atu ki a te koutou!