2 Kolinito 6 - Tokelauan New Testament

¹ I ta mātou gālulue fakatahi la ma te Atua, e aioi atu ai ki mātou ki a te koutou iēnā kua taliagia te alofa tūnoa o te Atua, ke nahe koutou fakamāumauagia.

² Fakalogo ki te vāgana a te Atua, “I te taimi tatau na talia ai e au koutou, na lagona e au koutou; i te aho e tatau ke fakaola ai koutou e au, e fehoahoani atu au ki a te koutou.” Kikila, kua pa mai te taimi; ko tēnei te aho e fakailoa ai!

³ Ko ki mātou e hē fofou ke faitio he tino ki a mātou gāluega, oi e hē faitiogia foki la e ki mātou he gāluega a he tino.

⁴ Kae ko nā mea uma e ki mātou faia, e kitea ai ko ki mātou ni kaukauna e a te Atua. Ko ki mātou e onohai pea lava, e ui lava e maua ki mātou i te lahi o puapuagā, fakafītāuli ma lavelave.

⁵ Ko ki mātou e kini, e falepuipui ma ogohia i te nunu fetunaki mai o tagata; e gālulue fītatā ma tau hē maua he moe, ma fia kakaia.

⁶ Ko to mātou loto mamā, te iloa, te onohai ma te agalelei, kua fakaalia ai ko ki mātou ni kaukauna e a te Atua — e ala i te Agaga Paia, e ala i to mātou alolofa moni,

⁷ e ala i to mātou tautatala i te meamoni, ma e ala i te mana o te Atua. Ko ta mātou kaukupega ko te āmiotonu, e tau ma puipuia ai foki ki mātou.

⁸ Ko ki mātou e taku leleia e iētahi kae inohia e iētahi; e tauemua e iētahi kae fakavikiviki e iētahi. Ko faiga a tagata e fai mai ki a te ki mātou e vē ai ki mātou ni tino talapepelo, oi ka ko ki mātou e tautatala lava i te meamoni.

⁹ Ko ki mātou e vē ni tino e hē iloa e tagata, oi kae e iloa e tagata uma ki mātou; e vē ki mātou ni tino kua feoti, kae e vē oi koutou kitea, ko ki mātou e ola lava. E ui e kini ki mātou, kae e hē oti ai ki mātou;

¹⁰ e ui e fakanoanoa, kae ko ki mātou e fiafia i taimi uma; e ui e vē ki mātou e mātitiva, kae kua maukoloa te tokalahi o tagata ona ko ki mātou; e ui e vē ki mātou e hēai ni mea, kae ko nā mea uma lele e a ki mātou.

¹¹ Te kau uho pele i Kolinito, ko nā kupu kua tautatala atu ai ki mātou e moni lava; ko ki mātou e alolofa lahi atu ki a te koutou.

¹² E hē ko ki mātou te kua tapuniagia o mātou loto ki a te koutou, kae ko koutou te kua tapuniagia outou loto ki a te ki mātou.

¹³ Ko au e tautala atu e vē lava koutou ni fānau moni e āku; tatala lahi ko outou loto, ma alolofa mai foki ki a te ki mātou e vē oi alolofa atu ki mātou ki a te koutou.

Fakaeteete i nā uiga Fakapaupau

¹⁴ Koutou nahe taumafai ke gālulue kau fakatahi ma nā tino hē talitonu, auā e hē mafai he mea vēnā ke fai. E vēhea ona mafai ke kau fakatahi te āmiotonu ma te āmiokino? E vēhea ona mafai ke nonofo fakatahi te ao ma te pō?

¹⁵ E vēhea ona mafai ke maua he tahi ia Keliho ma Hātani? He ā ni mea e tutuha ai te tino kua talitonu ma te tino hē talitonu?

¹⁶ E vēhea ona mafai ke talia nā tupua i loto o te mālumalu o te Atua? Auā ko ki tātou ko te mālumalu ia o te Atua e ola! E vē oi vāgana te Atua, “Ka mau au i loto o oku tagata ma havali fakatahi ma ki lātou; ka fai au ma o lātou Atua, ma ka kavea ki lātou ma oku tagata.”

¹⁷ Na vāgana foki te Aliki, “Olo kehe ma ki lātou ma nahe toe koutou nonofo fakatahi. Koutou nā fakapipiki ki te mea e hē mamā, oi talia ai koutou e au.

¹⁸ Ka fai au ma outou tamana, ma ko koutou ni ataliki ma ni afafine e ōku, kua vāgana ai te Aliki Hilihilikehe.”