2 Kolinito 5 - Tokelauan New Testament

¹ Auā e iloa e ki mātou kāfai te falekie tēnei e nonofo ai ki mātou — o mātou tino i te lalolagi nei — e fakakino, ka i ei he fale e hāunia e te Atua i te lagi mo ki mātou, he fale e ia faua lava ma e tūmau ke pa ki te fakavavau.

² Ma i te taimi nei, ko ki mātou e tagi momoko ke i na tuku ifo loa ko to mātou fale mai lagi ki luga o ki mātou;

³ ke vē he kofu e kokofu ai ki mātou, ma ke nahe maua mai ai ki mātou e hē lavalavā.

⁴ Auā kāfai ki mātou koi nonofo lava i te falekie fakatelalolagi tēnei, ko ki mātou e tagi momoko ma te agaga popole; e hē vē ko ki mātou e fofou ke tīaki o mātou tino fakatelalolagi, kae ko ki mātou e fofou ke tuku ifo ki o mātou luga te fale mai te lagi, kae ke līua ai o mātou tino e fano e oti, ke hē toe oti.

⁵ Ko te Atua lava te kua ia hāuniagia ki mātou mo te hūiga tēnei, ma kua ia tuku maia ki a te ki mātou tona Agaga, ke fai ma fakamāoniga ki nā mea uma kua ia hāunia mo ki mātou.

⁶ Ko ki mātou la e loto tetele i taimi uma. E iloa e ki mātou, kāfai ki mātou e i te fale i te tino fakatetagata, ko ki mātou e hē i te fale o te Aliki.

⁷ Auā ko ki mātou e ola ona ko te fakatuatua, kae hē ona ko nā mea e kitea i nā mata.

⁸ Ko ki mātou e loto tetele, ma e hili atu to mātou naunau ke tukua o mātou tino fakatetagata, kae fakatahi ma te Aliki i tona fale.

⁹ Kae e tuha lava pe ko ki mātou e i ei fakatahi ma te Aliki, pe nonofo kehe ma ia, e fakahilihili lava to mātou naunau, ke fai e ki mātou te mea e fiafia ia ki ei.

¹⁰ Auā ko ki mātou uma e tatau ke tutū i mua o Keliho, ke fakamahino e ia. Ka maua e te tino tona lava taui, fua ki ana gāluega nae fai, pe nae lelei, pe nae kino, ka koi ola ia i tona tino fakatetagata.

Ko te Va lelei ma te Atua e ala ia Keliho

¹¹ Kua iloa e ki mātou te mea e takua ko te mataku i te Aliki, ma ko te mea ia e fakamālohi atu ai ki mātou ki iētahi tino. Kua iloa lelei e te Atua ki mātou, ma e fakamoemoe ka vēnā foki oi iloa au e koutou i outou loto.

¹² Ko ki mātou e hē taumafai ke toe fakavikiviki lava ki mātou e ki mātou ki a te koutou; kae ko ki mātou e taumafai ke fai he mea ke fāfifia ai koutou ona ko ki mātou, kae ke mafai ai e koutou oi tali atu ki nā tino e fāfifia ona ko te tūlaga kua i ei he tino, kae hē ona ko nā mea i tona loto.

¹³ Kāfai e fōliga kua hē lelei o mātou māfaufau, ko he mea tēnā e i te va o te Atua ma ki mātou. Kae kāfai o mātou māfaufau e lelei, ko he mea tēnā e mo te koutou lelei.

¹⁴ Ko ki mātou e pūlea e te alofa o Keliho, ona kua mautinoa e ki mātou, kāfai na oti he tokatahi mo tagata uma, ko ki tātou uma foki la na oti.

¹⁵ Ma ko Keliho na oti mo tagata uma, kae ke nahe toe ola ai nā tino e ola mo ki lātou lava, kae ola oioti mo tē na oti ma toe fakatū mai ki te ola, mo ki lātou.

¹⁶ Ko te mea ia, e kāmata atu nei, e hē toe ki tātou fakamahinoa he tino, i te kikilaga fakatetagata. E ui lava na i ei te taimi na ki tātou fakamahinoa ai ia Keliho i te kikilaga fakatetagata, kae kua hē toe fai vēnā e ki tātou nei.

¹⁷ Ho he tino kua ia te ia te hokotaga ma Keliho, ko he tino fou ia; kua teka atu te mea tuai, kae kua hau te mea fou.

¹⁸ Ko te mea kātoa tēnei na fai e te Atua. Na ia fakaleleia to tātou va ma ia e ala ia Keliho, ma tuku mai e ia ki a te ki mātou te gāluega ko te fakaleleia o te va o ia ma iētahi tino.

¹⁹ Ko te uiga o ta mātou lea atu, kua fakaleleia e te Atua te va o ia ma te lalolagi e ala ia Keliho. E hēki ia faitaua ia agahala a tagata, ma kua tuku mai e ia ki a te mātou, ke fakaleleia te va o ia ma tagata.

²⁰ Ko ki mātou la na uga mai ke tautatala mo Keliho, ma ko te Atua e fakatagi atu ko koutou ke fakalogo ki ta mātou fekau. Ko ki mātou e tautatala i te igoa o Keliho ma aioi atu i te agaga moni, ke fakalelei ko te koutou va ma te Atua.

²¹ E hēki i ei lele he agahala a Keliho, kae mo to tātou lelei, na fai ai e te Atua ke agahala fakatahi ia ma ki tātou, kae ke kavea ai te fakaleleia o ki tātou ma Keliho, ma mea e talia ai ki tātou e te Atua.