2 Kolinito 4 - Tokelauan New Testament

Koloa Fakateagaga i loto o nā Hiā Ele

¹ Ko te alofa tūnoa o te Atua kua tuku mai ai e ia tana gāluega ke fai e ki mātou, oi ko ki mātou e hē fakavāivai lele.

² Kua tuku kehe e ki mātou nā uiga mātagā uma ma nā faiga fakalilolilo; e hē taumafai ki mātou ke fakahehē he tino, pe fakaliliu hehē te fekau a te Atua. E molimau te Atua ko ki mātou e tautatala oioti i te meamoni, ma ko te mea ia ka mafai ai ke talitonu mai nā tino ki a te ki mātou.

³ Auā kāfai te tala lelei e ki mātou tālakia e mumuni, e mumuni oioti mai nā tino e tuku e fakaumatia.

⁴ Ko nā tino iēnei e hē talitonu, auā kua fakapoulitia o lātou māfaufau e Hātani, te atua kino o te lalolagi. E ia tāofiofia ki lātou ke nahe ki lātou kiteagia te mālamalama e huhulu ake ki a te ki lātou, te mālamalama e hau mai te Tala Lelei e uiga ki te mamalu o Keliho, tē e vē lava ko te Atua.

⁵ Auā e hē tālakia e ki mātou e uiga ki a te ki mātou lava; e tālaki e ki mātou ko Iehu Keliho ko ia ko te Aliki, ma ko ki mātou ni kaukauna ki a te koutou ona ko Iehu.

⁶ E lea mai nā Tuhituhiga paia, “Na fakatonu e te Atua te mālamalama ke huhulu i loto o te pōuliuli.” Nei kua fakahuhulu e te Atua tona mālamalama i loto o nā loto o ki tātou, ke iloa ai e ki tātou tona huhulu pupula i fōliga o Keliho.

⁷ Ka ko ki mātou iēnei kua i ei te koloa fakateagaga, e vē ki mātou ko nā hiā ele fakatauva, ke iloa ai ko te mālohi hilihilikehe, e mai te Atua kae hē mai ia te ki mātou.

⁸ E maua ho ki mātou i nā fakafītāuli, kae e hē haihaitia ai ki mātou. E maua ho ki mātou i nā fakahētonu, kae e hē fakavāivai ai ki mātou.

⁹ E maua ho ki mātou i fakahāuāga, kae e hē tuku tiakia lele ki mātou e te Atua. E kini ho ki mātou ma pakukū ki lalo, kae e hē oti ai ki mātou.

¹⁰ I taimi uma, nae taukave pea lava i loto o nā tino o ki mātou e fano e pala, te mate o Iehu, kae ke kitea ai foki te ōlaga o ia i loto o nā tino o ki mātou.

¹¹ I to mātou ōlaga kātoa, e lamatia pea lava o mātou ola ona ko Iehu, kae ke kitea ai tona ōlaga i loto o mātou tino e fano e pala.

¹² Ko tona uiga, ko te oti e galue i loto ia te ki mātou, ka ko te ola e galue i loto ia te koutou.

¹³ I te tuhituhiga paia, na lea vē he tino, “Ko au na tautala ona ko au kua talitonu.” I te agaga foki lava tēnā e tahi, kua tautatala ai ki mātou ona ko ki mātou e talitonu.

¹⁴ E iloa e ki mātou ko te Atua, tē na ia fakatūa te Aliki ko Iehu ki te ola, ka ia fakatutūa foki ki mātou ma Iehu, ma ia kavea ai ki mātou fakatahi ma koutou, ki te mea e i ei ia.

¹⁵ Ko nā mea uma iēnei kua fai mo koutou; ma ko te tokalahi o tagata e ki lātou iloa te alofa tūnoa o te Atua, ko te lahi foki ia o tatalo o te fakafetai ma vīkiga ki te Atua.

Ola i te Fakatuatua

¹⁶ Ko ki mātou la e hē fakavāivai lele. E ui lava ko o mātou tino fakatetagata e fano lava e pala, kae ko o mātou tino fakateagaga, e fakafougia pea lava i aho takitahi.

¹⁷ Ma ko nā tamā fakafītāuli iēnei e fetaiaki ma ki mātou ka maua ai e ki mātou nā vīkiga e fakavavau, e lahi mamao atu i lo nā fakafītāuli.

¹⁸ Auā ko ki mātou e hē kikila ki nā mea e kitea, kae e kikila ki nā mea e hē kitea. Ko nā mea e kitea e hē tūmau, kae ko nā mea e hē kitea, e tūmau ke pa ki te fakavavau.