2 Kolinito 3 - Tokelauan New Testament

Ko te Feagaiga Fou a te Atua

¹ Ko ki mātou nei e vē ni tino kua toe fakavikiviki lava ki mātou ki a te ki mātou? Pe ko te mea e tatau ke i ei ni o mātou tuhi fakamāonia pe ni tuhi lagolago, e vē ko iētahi tino, ke kavatu ki a te koutou pe kaumai foki ia te koutou?

² Ko koutou lava iēnā ta mātou tuhi fakamāonia, kua tūhia i o mātou loto ke iloa ma faitau ki ei ia tagata uma.

³ E manino lava ko Keliho te na ia tuhia te tuhi tēnei, ma na ki mātou kavatua ki a te koutou e ala i ta mātou gāluega. E hēki tuhia i he vaituhi, kae na tūhia i te Agaga o te Atua ola, ma e hēki tuhia ki luga o ni fatupapa māfolafola, kae na tūhia ki nā loto o tagata.

⁴ Ko ki mātou e lea vēnei atu ona e mautū to mātou fakamoemoe ki te Atua e ala ia Keliho.

⁵ E hēai ho mātou iloa ke mafai ai ke lea ki mātou e ki mātou mafaia oi fai tana gāluega. Ko te Atua lava te na ia fōki maia ki a te mātou, te iloa ma te mafai;

⁶ ko ia lava te na mafai ai ki mātou ke kavea ma kaukauna ki te feagaiga fou. Ko te feagaiga tēnei e hē ko he tūlāfono tuhituhia, kae ko he feagaiga i te Agaga. Auā ko te tūlāfono tuhituhia e maua ai te oti, kae ko te Agaga e maua ai te ola.

⁷ Ko te Tūlāfono na tūhia i ni mataituhi na vane ki luga o nā fatupapa māfolafola, ma na kitea te huhulu pupula uiga kehe o te Atua i te taimi na ia tuku atua ai te Tūlāfono. E ui lava ko te huhulu pupula nae i nā fōliga o Mohe na gaholo e mu vaivai, kae ko tona mālohi na hēki mafai ai ia tagata Ihalaelu ke tūmau te kikila a o lātou mata ki a Mohe. Kāfai la te Tūlāfono tēia e maua ai te oti kāfai e fakatino, na kaumai i he tūlaga e uiga kehe te huhulu pupula,

⁸ e vēhea nei la te uiga kehe lele atu o te huhulu pupula o gāluega a te Agaga!

⁹ Kāfai na i ei te huhulu pupula i te mea na maua ai te fakahalaga ki te oti, ka hē hili atu nei la te uiga kehe lele atu o te huhulu pupula i te mea e maua ai te fakaolataga!

¹⁰ Ko te meamoni, ko te lahi atu lele o te huhulu pupula o te feagaiga fou kua fōliga ai kua uma te aogā o te Tūlāfono.

¹¹ Auā kāfai nae i ei he huhulu pupula i te mea e hēki tūmau mataloa, ka hē hili atu nei la te lahi lele atu o te huhulu pupula o te mea e tūmau ke pa ki te fakavavau!

¹² Ona kua ia te ki mātou he fakamoemoe vēnei, kua maua ai e ki mātou te loto mālohi.

¹³ Ko ki mātou e hē vē ko Mohe, na ia pupunia ona fōliga i he kie ufimata kae ke nahe kitea e tagata Ihalaelu te huhulu pupula kua gaholo e mu vaivai ma mou atu ai lava.

¹⁴ Kae ko o lātou māfaufau nae makaka; ma ke pa mai ki te aho nei, kāfai e faitau ki lātou ki te feagaiga tuai, e vē o lātou māfaufau koi pupuni lava i he kie ufimata, auā e fātoā mafai lava ke kave kehe te kie ufimata, pe kāfai te tino e ia talia ia Keliho.

¹⁵ Io, ke pa mai lava ki nā aho nei, ko taimi uma lava e faitau ai ki lātou ki te Tūlāfono a Mohe, ko o lātou māfaufau e pupuni i te kie ufimata.

¹⁶ Kae ko te kie ufimata e mafai ke kave kehe, e vē oi lea mai te tuhituhiga paia e uiga ki a Mohe: “Na kave kehea tona kie ufimata i te liliuga o ia ki te Aliki.”

¹⁷ Ko te Aliki ko te Agaga, ma ko fea lava e i ei ai te Agaga, e i ei ai foki te haolotoga.

¹⁸ Ko ki tātou uma la te kitea ai te huhulu pupula o te Aliki e ala i o tātou fōliga e hē pupunia i he kie ufimata; ma ko te huhulu pupula lava tēnā e fokotahi e hau mai te Aliki, ko ia ko te Agaga, e ia fakaliuagia ki tātou ke vē lava ko ia, i he huhulu pupula e hilihili te uiga kehe.