2 Kolinito 2 - Tokelauan New Testament

¹ Ko te mea ia kua tonu ai i toku māfaufau ke nahe toe fanatu haku malaga ke fakatupu ai he loto tīgā ia te koutou.

² Auā kāfai e kō fakatupua te loto tīgā ia te koutou, ko ai nei la he tino ke ia fakafiafiagia mai au, kae ko koutou lava iēnā na hē fiafia ona ko au?

³ Ko te ala ia na tuhi atu ai taku tuhi tēnā ki a te koutou — ko au e hēki fofou ko au ke fanatu ke fakamahiahi e nā tino na tatau ke ki lātou faia nā mea e fakafiafia mai ki a te au. Auā e mautinoa lelei e au, kāfai au e fiafia, ko koutou uma foki e fiafia.

⁴ Na tuhi atu au ma toku loto popole ma te fakanoanoa lahi, vēnā ma te lahi o te loimata maligi; e hē ke fakatupu ai houtou hē fiafia, kae ke koutou iloa ai te lahi o toku alofa ki a te koutou.

Fakamāgalo te Tino kua Hehē

⁵ Kāfai na fai e he tino he mea ke hē fiafia ai hētahi tino, e hēki ia faia oioti ki a te au — kae i hētahi itū, na ia faia foki ki a te koutou uma. (Ko au kua lea atu vēnei ona ko au e hē fofou ke mamafa ātili ni aku kupu e fai ki te tino tēnei).

⁶ Kua uma te fakatonu e te tokalahi o koutou te tino tēnei, ma kua lava tona fakahalaga tēnā.

⁷ Ma, i te taimi nei, kua tatau ke koutou fakamāgaloa ma fakamālohi ki ei, kae ke nahe fakavāivai ai ona ko te mafatia lahi o tona loto.

⁸ Ko au la e talohaga atu ki a te koutou; fakailoa ko ki ei ko koutou e alolofa moni ake ki a te ia.

⁹ Ko te ala ia na tuhi atu ai taku tuhi tēnā. Nae fia kō tofotofoagia koutou pe i na uhitaki mai koutou ki a te au i ho mea e lea atu ai au.

¹⁰ Kāfai e fakamāgalo e koutou nā tino, e fakamāgalo foki koutou e au. Auā kāfai e kō fakamāgaloa — pe kāfai moni e i ei he mea e tatau ke kō fakamāgaloa ai — e fai e au i te fakatahi mai o Keliho ona ko koutou,

¹¹ kae ke nahe mafai ai ia Hātani ke manumālō ia te ki tātou; auā kua ki tātou iloa lelei ana fuafuaga.

Ko te Loto Popole o Paulo i Tolōata

¹² E taunuku atu au ki Tolōata ke tālaki te Tala Lelei e uiga ki a Keliho, kua uma te hāunia e te Aliki te avanoa mo tana gāluega i kinā.

¹³ Kae ko au nae popole lahi ona e hēki kō maua ki kinā, toku uho a kaukauna ko Tito. Oi na fakamāvae ai au ki nā tino nae i kinā, ma fano ai loa ki Maketonia.

Ko te Manumālō e Ala ia Keliho

¹⁴ Kae fakafetai ki te Atua, auā i te māfutaga ma Keliho ko ki mātou e takitakia pea lava e ia e vē ni pagotā, i te holo e fakailoa ai te manumālō o Keliho. Ko ki mātou e fakaaogā e te Atua ke fakahalalaua te tala ki a Keliho ke vē he meamanogi manaia, ki ho he koga.

¹⁵ Auā ko ki mātou e vē ko he meamanogi manaia kua ofo atu e Keliho ki te Atua, e fakahalalau ki a te ki lātou e fakaolagia ma ki lātou e hē fakaolagia.

¹⁶ Auā ko nā tino e hē fakaolagia, ko te manogi o te oti te ki lātou hogitia ma e maua ai ki lātou i te oti; kae ko nā tino e fakaolagia, ko te manogi o te ola te ki lātou hogitia ma e maua ai e ki lātou te ola. Ko ai la he tino e ia mafaia iēnei mea?

¹⁷ Ko ki mātou e hē vē ko te tokalahi o iētahi tino; e folafola e ki lātou te fekau a te Atua kae ke maua ai ni a lātou tupe; kae ona ko ki mātou na uga mai e te Atua, ko ki mātou e tautatala ma te fakamāoni i mua o te Atua, e ala ia Keliho.