2 Kolinito 13 - Tokelauan New Testament

Ko nā Toe Lapatakiga

¹ Ko te tolu tēnei o taimi e fanatu ai au oi āhiāhi atu ki a te koutou. E vē oi lea mai te tuhituhiga paia, “Ho he mōliaga, e tatau ke fakamāonia i te molimau, a ni tino e toka lua pe hili atu.”

² Ko au e fia lea atu ki a te koutou iēnā nae agahala i te taimi kua teka, vēnā ma iētahi uma; na lea atu au i te mea tēnei i te lua o taimi na āhiāhi atu ai au, kae ka toe lea atu au i te taimi nei kua hē i kinā au: ko tētahi taimi e fanatu ai au, e hēai he tino e fakahaoa mai te fakahalaga.

³ Kua ia te koutou nā fakamāoniga uma ko Keliho e tautala kui atu ia te au. Ko Keliho e hē vāivai kāfai e fakatonu e ia koutou, kae e ia fakaalia tona mālohi i te fakatahi o ia ma koutou.

⁴ Auā e ui lava ko te vāivai o ia te na fakahātaulo ai, kae ko te mana o te Atua te ola ai nei. I te māfutaga ma ia, ko ki tātou foki e vāivai; kae i te mātou hokotaga ma koutou, ka maua fakatahi ai e ki tātou te mana o te Atua i te ola o Keliho.

⁵ Kikila ifo koutou ki a te koutou lava ma hukehuke ifo pe koi tūmau te koutou fakatuatua. E moni nei lava e hē koutou iloa ko Keliho Iehu e i ei fakatahi ma koutou — vaganā ai la pe kāfai kua matuā pakū lava koutou i te hukega.

⁶ E talitonu au ka koutou iloa ko ki mātou e hēki pakukū lele i te hukega.

⁷ Ko ki mātou e tatalo ki te Atua, ke nahe koutou faia nā mea hehē — e hē ona ke fakaalia ai ko ki mātou kua pāhi i te hukega, kae ke mafai ai ke fai e koutou te mea e tonu, e ui lava e vē ka ono fōliga ai ko ki mātou e hēki pāhi.

⁸ Auā e hēai he mea e mafai ke fai e ki tātou ke teteke ai te meamoni, kae nā ko te lagolago ki ei.

⁹ Ko ki mātou e fiafia kāfai ki mātou e vāivai kae mālolohi koutou. Ma ko ki mātou foki la e tatalo ke hili atu te tūlaga ka i ei ai koutou.

¹⁰ Ko au kua tuhi atu nei ka ko hēki fanatu au, kae ke pa atu ki te taimi e fanatu ai au, ka hē hona fakaaogā e au ki a te koutou, te pule kua tuku mai e te Aliki ki a te au — te pule ke fakamākekeke ai koutou, kae hē ke fakavāivai ai.

¹¹ Ma i te taimi nei la, ko au e fakatōfā atu ki a te koutou oku uho. Hui autou āmio ma fakalogo ki nā mea kua lea atu ai au. Fealofani ma ola i te fīlēmū, ma ka fakatahi te Atua o te alofa ma te fīlēmū ma koutou.

¹² Fakafeiloaki tētahi e tētahi i te feiloakiga faka-Kelihiano. E momoli atu nā alofaaga o nā tino uma o te Atua i kinei mo koutou.

¹³ Ke ia te koutou uma te agalelei o te Aliki ko Iehu Keliho, te alofa o te Atua, ma te māfutaga ma te Agaga Paia.