2 Kolinito 12 - Tokelauan New Testament

Ko nā Fakaaliga na maua e Paulo

¹ Ko au e tatau ke fāfia, e ui lava e hēai hona aogā. Kae ko au ka tautala atu e uiga ki nā mea na fakailoa mai e te Aliki ki a te au, e ala i ni miti ma ni fakaaliga.

² E i ei he tino Kelihiano e iloa e au, na hikitia ake ki te lagi e hili te maualuga, e tuha kua hefulufa tauhaga taluai (e hē iloa e au pe ko te mea tēnei na tupu moni, pe ko he mea na fakailoa ki ei i he miti — nā ko te Atua oioti te ia iloa).

^3-4 Ko au e toe lea atu, e iloa e au ko te tino tēnei na hikitia ake ki Palataiho (ma e vē oi lea atu au, e hē iloa e au pe ko te mea tēnei na tupu moni pe ko he mea e vē he fakaaliga — nā ko te Atua oioti te ia iloa), ma i kinā, na ia lagona ai nā mea e hē mafai ke fakakupu i ni kupu, ma e hē mafai ke tautala ai he tino.

⁵ Ko au la ka fāfia ona ko te tino tēnei; kae ko au ka hē fāfia mo au lava, vaganā ai nā mea e kitea ai toku vāivai.

⁶ Kāfai au e fofou ke fakaali hoku fāfia, e hē vēakē ko au e valea, auā ko au e tautala lava i te meamoni. Kae ka hē fakaaliagia hoku fāfia, auā e hē fofou au ke fakatāua au e he tino o koutou, ona ko nā mea kua kitea e koutou e fai e au, ma kua lagona e koutou e lea ai au.

⁷ Kae ke tāofiofi ai au ke nahe hona mimita ona ko te lahi o nā mea mānanaia na kitea e au, na tuku mai ai ki toku tino he tauale tīgāina, ke galue e vē he kavefekau e a Hātani, ke fai ma fakahoehā ma ke nahe hona fiafia ai au.

⁸ E fakatolu lava ona tatalo au ki te Aliki e uiga ki te mea tēnei, ma fakatagi atu ki ei ke kave kehe tēnei mea ma au.

⁹ Kae na tali mai vē, “Ko toku alofa tūnoa e lava mo koe, auā ko toku mana e kātoatoa te mālohi i nā taimi e vāivai ai koe.” Ko au la e fiafia lahi ke fāfia i oku vāivaiga, kae ke ia te au ai te puipuiga a te mana o Keliho.

¹⁰ E kō taliagia la oku vāivaiga, nā kupu tau fakakino, nā fakafītāuli, nā fakahāuāga ma nā fakalavelave tutupu, ona ko Keliho. Auā kāfai au e vāivai, oi e mālohi ai au.

Ko Popōlega o Paulo ki te Ekalehia i Kolinito

¹¹ Ko au e vē he vale i aku mea e fai — kae ko koutou te kua māfua ai oi vēnei au, ona na tatau lava ke fakailoa e koutou kua koutou talia au. Auā e tuha lava pe ko au he tino e hēai he aogā, e hēai lele he mea e hili atu ai nā tino fakapitoa iēnei e takua e koutou ni “apohitolo,” i lo au.

¹² Ko te lahi o nā fakailoga ma nā mea ofoofogia e fakamāonia ai ko au ko he apohitolo, nae kō fakatinoa i te mea e i ei koutou ma toku onohai lahi.

¹³ He ā nei he mea na fai e au ki a te koutou e hēki kō faia ki iētahi Ekalehia? Oioti lava te mea, ko koutou e hēki fakafītatā lele e au i ni fehoahoani tau tupe? Fakamāgalo mai au kāfai kua hē fetaui taku mea kua fai.

¹⁴ Ko te fakatolu tēnei o taimi kua hāuni ai au ke āhiāhi atu ki a te koutou — ma e hē kō faia lele he mea ke fakafītatā ai koutou. Ko koutou te hakili e au, kae hē ko nā tupe a koutou. Auā e hē tatau nā tamaiti ke tuku kehe e ki lātou he hēleni mo te lumanaki o nā mātua, kae e tuku kehe e nā mātua mo nā tamaiti.

¹⁵ E fiafia lahi lele au oi fakafano uma aku mea vēnā ma toku tagata kātoa, ke fehoahoani atu ki a te koutou. Kāfai nei e ātili lahi toku alofa ki a te koutou, ka ātili fakaitiitia ai nei te koutou alolofa mai ki a te au?

¹⁶ E koutou iloa lelei lava ko au e hēki fakafītā atu ki a te koutou. Kae e lea koutou ko au e faitogafiti, ma kua kō māileia koutou i nā tala pepelo.

¹⁷ Vēhea? Na kō fakavalea nei koutou e ala i he tino o nā kavefekau na uga atu e au ki a te koutou?

¹⁸ Na tauanau e au ia Tito ke fanatu, ma uga atu ai fakatahi ma tētahi uho o ki mātou. Na fakavalea nei koutou e Tito? Nae hē tutuha nei la o ma loto, ma nā mea nae fai e ki māua?

¹⁹ Ātonu pe ko koutou e vēakē ko ki mātou e fīnau atu mo ki mātou lava. Hēai! Ko ki mātou e tautatala lava e vē ko te mea e fofou ia Keliho ke tautatala ai ki mātou i mua o te Atua, ma ko nā mea uma e ki mātou faia, e mo te atiakega o koutou a mātou uō pele.

²⁰ Ko au e popole nā ia au e pa atu kua kehe te tūlaga kua i ei koutou i lo te mea e fofou au ki ei, ma koutou kitea kua kehe te tūlaga kua i ei au i lo te mea e fofou koutou ki ei. Ko au e popole nā ia au e pa atu ko koutou e tauai miha ma loto kino, e loto ita ma manatu fakapito, e tau fakakino ma faitatala, e mimita ma hē pūlea.

²¹ Ko au e popole auā ia au i nā fakamahiahia e toku Atua i mua o koutou kāfai au e toe pa atu, ma ono tagi ai au ma te fakanoanoa mo nā tino e tokalahi na agahala i te taimi kua teka kae e hēki halamō ia lātou āmio mātagā nae fai — te fai āmio ma te nanau ki te tino.