2 Kolinito 11 - Tokelauan New Testament

Ko Paulo ma nā Pelofeta Pepelo

¹ Ko au te fofou ke maua koutou i te onohai i nā mea ka lea atu ai au, e tuha lava pe kāfai au e vē e tamā favalevalea.

² E lagona e au te fuā ki a te koutou, e vē ona fuā te Atua; auā ko koutou e vē ko he taupou lelei kātoatoa, ka tuku atu e au ke fakaipoipo ki he tamāloa e fokotahi oioti lava, ko Keliho tēnā.

³ Ko au e popole nā ia koutou e fakavaleagia, e vē ko te fakavaleaga o Eva e te gata tau fakahehē, ma takitaki kehe ai koutou mai te koutou tāpuaki ki a Keliho, i te agaga kātoatoa ma te fakamāoni.

⁴ Auā kua fiafia koutou oi fakataga ho he tino e fanatu oi folafola atu e uiga ki he Iehu kehe, e kehe ma te Iehu na folafola atu e ki mātou; ma talia e koutou he agaga ma he tala lelei e kehe mai te Agaga ma te tala lelei na maua e koutou mai ia te ki mātou!

⁵ E manatu au e hēai lele he mea e hili atu ai nā tino fakapitoa iēnei e takua e koutou “ni apohitolo” i lo au.

⁶ E ui lava ko taku tautala e hē matuā lelei e vē ko ki lātou, kae e hē vēake ai ka hili atu to lātou popoto i lo au; kua uma lava te ki mātou fakamālamalama lelei atua o nā mea uma lele ki a te koutou.

⁷ E hēki lea atu au ki hoku totogi i te kō folafola atuga o te Tala Lelei a te Atua ki a te koutou; na kō tukua au ki lalo kae ke fakatāua ai koutou? E hehē nei taku mea na fai?

⁸ I te taimi na galue ai au mo koutou, ko au nae totogi e iētahi Ekalehia.

⁹ Ma i te taimi tēnā, e hēki fakafītā lele atu au ki a te koutou, kāfai au e fofou ki he tupe; ko nā mea uma lele na manakomia e au, na kaumai e nā uho Kelihiano i Maketonia. E hēki fakafītā atu au ki a te koutou i te taimi kua teka, e vēnā foki oi hē fakafītā au ki a te koutou i te lumanaki.

¹⁰ E ala i te meamoni e uiga ki a Keliho i loto ia te au, e takutino atu ai e au, e hēai he tino i Akaia kātoa e ia mafaia oi tāofi toku fāfia.

¹¹ Ko au nei e lea vēnei ona ko au e hē alofa atu ki a te koutou? E iloa e te Atua ko au e alofa ki a te koutou!

¹² Ko nā mea nae fai e au ka fai pea lava e au, kae ke nahe maua ai e nā tino iēnei e lea koutou ni “apohitolo,” he avanoa ke fai ai ni o lātou fāfifia, ko a lātou gāluega e tutuha lava ma a mātou gāluega e fai.

¹³ Ko nā tino iēnā e hē ni apohitolo moni — ni apohitolo pepelo, e ki lātou pelogia ia tagata e uiga ki a lātou gāluega e fai, ma taumafai ke vē ki lātou ni apohitolo moni lava e a Keliho.

¹⁴ Ma e hetioa, auā e pa foki lava ki a Hātani, e ia fakahehēa ia tagata ke vēakē ko ia ko he agelu huhulu pupula!

¹⁵ Ko te mea ia, e hē he mea fou te taumafai o nā kaukauna a ia ke vē ki lātou ni kaukauna e o te āmiotonu. I te ikuga, ka maua e ki lātou te taui e tuha ai ma a lātou gāluega nae fai.

Ko Puapuagā o Paulo mo Keliho

¹⁶ Ko au e toe lea vēnei atu, nahe i ei he tino o koutou e manatu ko au e valea. Kae kāfai lava la e manatu koutou ko au e valea, tuku vē la au ke vē he tino e valea kae ke i ei ai hoku tamā fāfia.

¹⁷ E ui lava ko taku lea atu vēnei e hē ko te mea ia e fofou te Aliki ke lea atu ai au; kae e tuha ai ma te matākupu tēnei ko te fāfia, ko au e vē moni lava he tino valea i aku tala e fai

¹⁸ Kae ona e tokalahi lele ia tagata e fāfifia i nā mea fakatetagata, ko au foki la ka fāfia.

¹⁹ Ko te lahi o te koutou mālamalama, kua koutou mafaia ai oi onohai i nā mea a nā vale e fai.

²⁰ E onohai koutou kāfai koutou e fakapologa e he tino, pe fakavalea, pe honafai, pe manatu fakatauva ki a te koutou, pe fai ni ona uiga hē māfaufau ki a te koutou.

²¹ Ko au e mā oi taku hako atu, ko ki mātou nae palakakai oi fai ni mea vēnā! Kae kāfai i ei he tino e ia mafai oi fāfia e uiga ki ho mea — e mafai foki e au. (Ko aku tala iēnei e vē ni tala a he tino valea.)

²² Ni tino Epelu nei ki lātou? E vēnā foki au. Ni tino Ihalaelu nei ki lātou? E vēnā foki au. Ni lāpuna nei ki lātou e o Apelaamo? E vēnā foki au.

²³ Ni kaukauna nei ki lātou e a Keliho? Ko au e vē he vale — kae ko au he kaukauna e hili lele atu ia te ki lātou! E hili atu toku galue mālohi, e lahi atu nā taimi nae i te falepuipui ai au, e lahi atu nā taimi na kini ai au, ma e lahi atu nā taimi na mea e mate ai au.

²⁴ Kua fakalima ona kini au taki toluhefulu iva ia ta, i lima o nā tino Iutaia;

²⁵ kua fakatolu ona kini au i nā lākau e nā tino Loma, ma kua fakafokotahi oi fetogi au i nā fatu. Kua fakatolu te i ei o oku i luga o nā vaka e gōgoto, ma e fokotahi te taimi na opeopea ai au i te moana mo he luahefulu fa itūlā.

²⁶ I te lahi o aku malaga, nae lamatia toku ola i nā lolovai, nā tino fāomea, mai oku tagata tōtino ma tagata nukukehe; nae lamatia i nā kakai lalahi, i te vaomatua, i te moana, vēnā foki mai nā uō pepelo.

²⁷ Ko au nae galue ma te fītā; e lahi nā pō nae hē maua haku moe; nae fia kaia ma fia inua; e lahi nā taimi nae hē maua ai haku mea ke kai, he mea ke fakamalu ki ei, pe ni kofu ke fakamāfanafana ai.

²⁸ Ma e hē gata i iētahi mea kua hē tākua, ko au e fītā i aho uma lava i toku popole ki nā Ekalehia uma.

²⁹ Kāfai he tino e vāivai, oi e lagona foki e au te vāivai; kāfai he tino e takitakia ma pakū ki te agahala, ko au e tumu i te fakanoanoa.

³⁰ Kāfai au e tatau ke fāfia, ko au e fāfia i nā mea e kitea ai toku vāivai.

³¹ Ko te Atua ma te Tamana o te Aliki ko Iehu — ke fakamanuia tona igoa ke pa ki te fakavavau — e ia iloa ko au e hē pepelo.

³² Ka koi i ei au i Tamaheko, na fakatonu nā fitafita e te kōvana i lalo o te Tupu ko Aleta, ke leoleo nā faitotoka ki te kakai, kae ke ki lātou pukea ai au.

³³ Kae ko au na tukutuku ki lalo i he polapola, mai he pu i te puipui o te kakai, ma hola kehe ai ma ia.