2 Kolinito 10 - Tokelauan New Testament

Kua Tautala ia Paulo e uiga ki tana Galue mo Keliho

¹ Ko au ko Paulo, e aioi atu ki a te koutou i te igoa o Keliho, tē e agamalū ma agaalofa. Ko au tē e lea nā tino, e matamuli ma loto maulalo kāfai e fakatahi ma koutou, kae loto hāuā kāfai e i hētahi mea.

² Ko au e talohaga atu, ke nahe faia lele e koutou he mea ke fakaali ai toku loto hāuā kāfai au e fanatu; auā ko au kua hāuni ke fakakikila ki toku loto hāuā, nā tino e lea ko a mātou mea e fai e fakavae i nā lagona fakatelalolagi.

³ E hako ko ki mātou ni tino e ola i te lalolagi, kae ko ki mātou e hē tau ona ni lagona fakatelalolagi.

⁴ Ko nā meatau e ki mātou fakaaogā e hē ni meatau o te lalolagi, kae ko nā meatau mālolohi a te Atua, e mafai ai e ki mātou oi talepe nā olo mālolohi. E fakahēaogā e ki mātou nā talitonuga hehē;

⁵ e talepe ki lalo e ki mātou nā mea uma e fakatutū ke fai ma lave ki te mālamalama o tagata, e uiga ki te Atua. E puke fakamālohi e ki mātou ia manatu tau tokatahi uma, ma fakamālohia ke uhitaki ki a Keliho.

⁶ Ma kāfai kua fakamāonia te kātoatoa o te koutou uhitaki, ka hāuniuni ki mātou ke taku halagia ho he tino e hē fia uhitaki.

⁷ Ko koutou e kikila ki te tino mai o nā mea i te kikila atu ki ei i fafo. E i ei nei ni tino i kinā e ki lātou mautinoa ko ki lātou e ia Keliho? E tatau ke toe māfaufau lelei ki lātou e uiga ki a te ki lātou, auā ko ki mātou e a Keliho, e vē foki lava ko ki lātou.

⁸ Auā ko au e hē ma, e tuha lava pe kua hona fāfia ātili au ona ko te pule kua tuku mai e te Aliki ki a te ki mātou — te pule ke fatufatu ake ai ki luga te koutou fakatuatua, kae hē ke fakaumatia ai koutou.

⁹ Ko au e hē taumafai ke fakamataku koutou i aku tuhi.

¹⁰ Auā ko iētahi o koutou e lea vē, “Te loloto ma te mālolohi o nā tuhi a Paulo, kae kāfai e i kinei ma ki tātou, te vāivai ma te hēai o he uiga o ana kupu!”

¹¹ Ke mālamalama nā tino vēnei, e hēai lele he mea e kehekehe ai nā mea e tuhi atu ai ki mātou i nā tuhi, ma nā mea e fai e ki mātou kāfai ki mātou e fakatahi ma koutou i kinā.

¹² E hē vē ko ki mātou e taumafai ke fakatuhatuha ki mātou ki nā tino e manatu ko ki lātou lava e hili te lelei. Kai te vālelea ātili o iēnei tino! E fai e ki lātou lava te fua fakatatau ke fua ai te tūlaga e i ei ai ki lātou tau tokatahi, ma e fakamahino lava e tētahi tētahi e ala i te lātou lava fua fakatatau!

¹³ Kae e vē la ko ki mātou, ko to mātou fāfifia e i ei ona tuākoi; e gata mai lava i nā tuākoi o te gāluega kua tuku mai e te Atua mo ki mātou, ma e aofia ai to mātou gālulue ma koutou.

¹⁴ Ma e ona ko koutou e i loto o nā tuākoi iēnei, e hēki ova atu foki ki tua a mātou gāluega nae fai, i te oatuga o ki mātou oi kavatu te Tala Lelei ki a Keliho.

¹⁵ Ko ki mātou la e hē fāfifia i nā gāluega kua fai e iētahi tino i tua atu o nā tuākoi kua tuku mai e te Atua mo ki mātou. Kae ko ki mātou e fakamoemoe ka tuputupu pea te koutou fakatuatua, ma mafai ai ke fakaopoopo te tokalahi o nā tino ka aofia ia mātou gāluega i te mea e i ei koutou, i loto lava o nā tuākoi kua tuku mai e te Atua.

¹⁶ Oi mafai ai ke folafola atu te Tala Lelei e ki mātou ki iētahi atunuku i tua atu o koutou, e aunoa ma ho mātou fāfifia i ni gāluega kua uma te fai i he fatoaga a hētahi tino.

¹⁷ Kae e vē oi leamai te tuhituhiga paia, “Ko ai lava e fia fakaali hona fāfia, fāfia la ona ko nā mea kua fai e te Aliki.”

¹⁸ Auā, ko ki tātou e talia oioti e te Aliki pe kāfai ki tātou e lelei i tana kikila, kae hē ona ko ho tātou manatu ko ki tātou e lelei.