2 Kolinito 1 - Tokelauan New Testament

¹ Mai ia Paulo, he apohitolo a Keliho Iehu e tuha ai ma te finagalo o te Atua, ma te koutou uho ko Timoteo — Ki te Ekalehia a te Atua i Kolinito, ma nā tino o te Atua i te itūmālō kātoa o Akaia:

² Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Kua Fakafetai ia Paulo ki te Atua

³ Ke vīkia te Atua, te Tamana o to tātou Aliki ko Iehu Keliho, te Tamana e alofa fua ma te Atua e ala mai ai ia fehoahoani uma.

⁴ E fehoahoani mai ia ki nā puapuagā uma o ki māua, ke mafai ai e ki māua oi fehoahoani ki iētahi tino e maua i te lahi o itūkāigā puapuagā kehekehe, e ala i te fehoahoani kua ki mā maua mai i te Atua.

⁵ E vē ona kau fakatahi ki māua ma Keliho i te lahi o ona puapuagā, e vēnā foki lava oi maua fakatahi e ki māua te lahi o fehoahoani mai te Atua, e ala ia Keliho.

⁶ Kāfai ki māua e maua i nā puapuagā, e mo he koutou fehoahoani ma he fakaolataga; kāfai e ki mā maua he fehoahoani, oi ka vēnā foki oi maua e koutou he fehoahoani, vēnā ma te mālohi ke tūmau ai te onohai i nā puapuagā, e vē ona onohai ai foki ki māua.

⁷ Ko to mā fakamoemoe la mo koutou, e hē māluelue lele; auā e iloa e ki māua e vē ona kau fakatahi koutou i o mā puapuagā, e vēnā foki oi kau fakatahi koutou i nā fehoahoani e maua e ki māua.

⁸ Ko ki māua e fofou ke fakamanatu atu ki a te koutou, te kau uho, nā puapuagā na pa ki māua ki ei i itūmālō o Ahia. Ko te lahi ma te mamafa o te kavega na fakauta mai ki o mā luga, na pa ai ki māua ki he tūlaga fakahētonu ma na mea e uma ai o mā ola.

⁹ Na vēake lava ki māua ko ki mā ka feoti. Kae ko te mea tēnei na tupu kae ke nahe fakalagolago ai ki māua ki a te ki māua lava, kae fakalagolago oioti ki te Atua, e ia toe fakatutūa ia tagata kua oti.

¹⁰ Na ia fakahaoa ki māua mai te fakamātakutaku kino o te oti; ma ka ia fakahaoa ki māua; ma kua tuku tahi to mā fakamoemoe ki a te ia, ka ia toe fakahaoa ki māua.

¹¹ E tatau foki koutou ke fehoahoani mai ki a te ki māua e ala i autou tatalo, kae ke tokalahi ia tagata e fakafetai mo ki māua mo nā fakamanuiaga kua maua e ki māua, ona ko nā tatalo iēnei e lahi.

Hūiga ki te Malaga a Paulo

¹² Ko ki māua e mafai ke fāfifia auā ko o mā lotofuatia e mamā lava. Ko a mā gāluega i te lalolagi nei, kae maihe lava i te va ma koutou, e fai lava ma te fakamāoni ma te loto mamā mai te Atua. Ko te mana o te alofa tūnoa o te Atua te mafai ai nā mea iēnei, kae hē ona ko he poto o te tagata.

^13-14 Ko ki māua e tuhi atu oioti i nā mea e mafai ke faitau ma mālamalama koutou ki ei. E ui lava la ko hēki kātoatoa te koutou mālamalama, kae e fakamoemoe au ka mafai ke fakakātoatoa lelei, kae ke pa atu ai ki te Aho o to tātou Aliki, ka mafai ke fiafia koutou ona ko ki māua, ma ka vēnā foki ki māua ona ko koutou.

¹⁵ Na mautinoa lelei lava e au te mea tēnei, ma ko te mea ia na fuafua ai e au ke fanatu muamua au ki a te koutou, kae ke fakaluaina ai te lahi o nā fakamanuiaga e maua e koutou, i toku āhiāhi atu fakalua.

¹⁶ Auā ko taku fuafuaga na fai, ko au e afe atu ke āhiāhi atu ki a te koutou kāfai au e fano ki Maketonia, ma vēnā foki kāfai e toe taliu mai, kae ke fehoahoani mai ai koutou ki taku malaga ki Iutea.

¹⁷ E i ei nei he manatu ia te koutou ko au e hēki māfaufau fakalelei muamua oi fai ai taku tonu tēnei? Ko koutou e vēakē ko te faiga o aku tonu e vē ko te faiga o tonu a tagata o te lalolagi, e “Io, io” oi toe “Hēai, hēai” i te taimi e fokotahi?

¹⁸ E molimau te Atua fakamāoni, ko taku folafolaga na fai atu ki a te koutou, e hē he “Io” pe he “Hēai.”

¹⁹ Auā ko Iehu Keliho, te Ataliki o te Atua, tē nae folafola atu ki a te koutou e ki mātou — e au vēnā ma Hila ma Timoteo, e hē ko he tino e “Io” ma “Hēai” i te taimi e fokotahi, kae e “Io” i taimi uma lava;

²⁰ auā ko ia ko te “Io” ki folafolaga uma a te Atua. Ko te mea ia e kui atu ai ia Iehu Keliho te tātou “Amene” mo te vīkiga o te Atua.

²¹ Ma ko te Atua lava ia te na mafai ai ki māua ke ola fakatahi ma koutou i te māfutaga ma Keliho; ko te Atua lava ia te na ia tōfiagia ki māua,

²² ma tuku maia tana fakailoga ki o mā luga, ke iloa ai ko ki māua e a ia, ma na ia tuku maia te Agaga Paia ki o mā loto, ke fakamāonia ai nā mea uma lele kua ia hāunia mo ki māua.

²³ E molimau te Atua — na ala toku hē fanatu ki a te koutou i Kolinito, ona e hēki fofou au ke toe fakamanuka outou loto.

²⁴ Ko koutou e hē fakatonu atua e ki māua ki nā mea e tatau ke talitonu koutou ki ei; e iloa e ki māua ko te koutou fakatuatua kua mautū lelei. Kae ko ki māua e gālulue fakatahi ma koutou ke fiafia ai koutou.